1 Samuweli 14:6 - Mazu Otchena a Mulungu

⁶ Evale mulombwana Jonata ohowonga na muzombwe anna liye ule, liye ira: <<Ndowe vakapamentoni va anyakondo a aFilistewu anno kahaineliwe. Ha ejo Yehova afuna, unonikamiheda. Tchoira liye anikamiheda masiki nilive ambinli, nnoagondjiha. Mwasiwa Yehova ira agondjihe kavali yorutcha. Masiki mukale adjindji eto masiki mukale a vang'ono, jatene jinowandeya.>>

1 Samuweli 14:6 ပူးပေါင်းရင်းမြစ်များ

2 Samuweli 1:20

Kamudowe mwawonga sidadi ya Gate nne mmarampani a Ajikelomi zela jiireyile, tawiha ira anamwali a aFilistewu kavwa, anahagalalege. Kamuwongege tawiha ira anamwali a atu ohoineliwa anaze kavwe, karome lupalupa moteyela.

2 Samuweli 16:12

Eto Yehova afuna, liye podi za direliha miyo zela tembelrelriwa nnatembelrelriwa miyo wu!>>

2 Amwene 19:4

Mwene wa Asiriya ohomuruma mundimuwa ule unawongetcha mazwaye ira aze wa hiyo, ampokihe Mulugu Okalawo. Yehova Mulugu wenyu avuruwane joruwana jatene jeji eto amutonge mutu wenne uwongile mazu abure matene anna. Mwa eno, inafwanela munilobelele hiyo atu a vang'onove nihanlewo.>>

Matewuji 19:26

Evale Yesu ohaing'anaga, liye ira: <<Mwa mutu ekave kinawandeya. Mbwenye na Mulugu jatene jinowandeya!>>

Roma 8:31

Kodi nnafuna niwonge avi muwari mwa jatene eji? Akala Mulugu gunanisogolrelra, kodi bani unafuna nigondjiha?

Detoronomiyo 32:30

Kahakale atu a zelru kogoiziwa mwasiwa gwa nni vikalaga jowandeya mutu mmohi wandaga wana na atu 1.000 eto atu ambinli wandaga atawiha atu 10.000. Mwa eno, kogoiziwa ira jinaireyela na mwasa oira wenno unafwanyeya agali Nibwe newa uhaguliha eto Yehova uhavaheda mmandani mwa amwidaniwa.

Filipo 3:3

Mwasiwa anafwanyeya kagali atu oineliwa mwa ibaribari kahi aliwa, mbwenye gu hiyo nnamutamalela Mulugu muwari mwa Munemba waye eto nnamutitimiha Yesu Kiristu eto nahanyindelaga joira jinerana hiyo na kopolo dehu.

Jozuwe 14:12

Nona miyo nnafuna ira udivahe ilambo yenna ya mwangoni nnga mwemo Yehova mwapanganne liye na miyo tempu yenne. Tchoira siku nenne weyo wohovwa zela aAnaki anno kali atu alukulu vamohi na sidadi dolimba nnafwanyeya wewule. Mbwenye Yehova afuna, akala na miyo, nnoatamangiha mwilamboni mwewa, nnga mwemo mwapanganne liye.>>

Anamasogolrelra 15:18

Noira eno, Samisawu ohokana ntona nohokala na masika. Evale oholobela wa Yehova monla, liye ira: <<Yehova nyo muhavaha atwinyu vuneya ulukulu wu muwari mwa namalaba wenyu. Nnga kodi vinokala wandeya ira miyo dikwe tchineneva na mwasa wa ntona eto digwele mmandani mwa atu ohoineliwa?>>

1 Samuweli 14:5

Nipedi naitaniwa Minga nne nafwanyeya pandi ya suli sogolro wa ilambo ya Jeba. Nkumiwa aitaniwa Vojerimela afwanyeya pandi ya norti sogolro wa ilambo ya Mikimasi.

1 Samuweli 14:7

Muzombwaye atukula jowanana jaye ule ohorumelaga eraga: <<Iranani malringana munaonela nyo, miyo nnouharani nyo na mmirimani mwaga mwatene.>>

1 Samuweli 17:26

Mwa enne Davi ohafukaga alombwana aawandamenlege liye, eraga: <<Kodi mutu wenne unampe nFilistewu ule, amaliha manyazo anna hiyo aIzarayeli, unavahiwa nni? Kodi nFilistewu mutu ohoineliwa nnga wenna bani ira liye aze apokihege na makalelo anna nikuru na anyakondo a Mulugu Okalawo?>>

1 Samuweli 17:36

Miyo namalaba wenyu, dahaapa apodogoma na aurusu. Eto nnafuna dimusakanye na makalelo amohive nFilistewu ule, mutu ohoineliwa, mwasiwa liye upokihile nikuru na anyakondo a Mulugu Okalawo.

1 Samuweli 17:46

Peno eva Yehova unodivaheda weyo mmandani mwaga eto miyo nnoupa, digwade muru wawo. Miyo peno nnotukula maningo a anyakondo a aFilistewu, daavahe mbalrame dovava zulu na anavinyama a mukokolani. Jaireya eno, pa evo vanafuna atu atene a mwilamboni ya vati kaiziwe ira Mulugu wa Izarayeli ukalawo.

1 Samuweli 17:47

Eto atu atene anafwanyeya eva anoiziwa ira Yehova kanagondjiha muwari mwa supada nne muwari mwa mwanango. Mwasiwa unawana gu Yehova! Eto liye unonivaheda nyo aFilistewu atene mmandani mwihu.>>

1 Samuweli 31:4

Evale mwene Sawuli ohomuwongana nkamihedi waye wenno atukuletcha fwaramento daye dowanana, liye ira: <<Kapulula supada nawo, udimarihena tawiha ira atu ohoineliwa ala anaze kadizuzumihe!>> Evale nkamihedi ule ohoovaga. Na mwasa wenno kaampilege. Sawuli agaonne ira: <<Nkamihedi wagola kanafuna dipa!>>, ohotukulaga supada naye, liye imetcha vati, viwambana mwinnya.