1 Samuweli 14:36 - Mazu Otchena a Mulungu

³⁶ Evale Sawuli ohowongaga na atwaye atene eraga: <<Mahiyu vano ndoweni nawane na aFilistewu. Ante fiyeda unde unatchege atu nnomala awaka jatene jinna atu eto nnomala apa, nne mmohi kannamuhiya.>> Evale aliwa kohowakula keraga: <<Tabo, iranani nnga munaonela nyo.>> Mbwenye namakuta ohowongaga, liye ira: <<So nahanairena, inafwanela nibabihe nfuka Mulugu inafuna hiyo irana.>>

1 Samuweli 14:36 ပူးပေါင်းရင်းမြစ်များ

Izaiya 58:2

Fwanyeya ira aliwa anodivenda malambo matene, anovenda joiziwa ndila yaga, kalaga nnga ba atu oirana japama, kalaga nnga kahi atu oviringaniha matongelo a Mulugu wewa. Eto aliwa anodivepa ira daavahe matongelo a upama eto anovenda jodikwivela miyo Mulugu.

Malakiya 2:7

Mwasiwa mmilomoni mwa anamakuta inafwanela mukumege zelru eto inafwanela atu kadowege wa aliwa ira kafundjihiwe na aliwa. Tchoira anamakuta ba aliba milanyo aga miyo Yehova wa Makuru Matene.

Tiyagu 4:8

Mmukwivele Mulugu, mwaira eno na liyene unoukwivelani. Muhuwe manda enyu nyo atu otega. Muhuwe mmirimani mwenyu nyo atu oumbuwela ja wu na wu.

Jozuwe 10:19

Nyo mbwenye kamuhale evo, mudowe mwaapege amwidani anno kahalenle mundulri. Kamwaahiye ira kawelele musidadi mwewa mwasiwa Yehova Mulugu wenyu uhuvahedani aliwa mmandani mwenyu.>>

Jozuwe 11:14

Evale Ana Izarayeli kohotukulaga jengo jatene jaawakile atu amwidaniwa roma jengo jofuneya jafwanyeya muwari mwa sidadi dagondjihile atu dile vamohi na jifuwo jiwa, jatene kala jewa. Mbwenye annyiwa kohomala apa atene na masupadiwa fiyeda aliwa atolotcha atene. Tchaamuhiyilege nne mutu mmohi ira akalewo.

1 Samuweli 1:23

Evale mamunaye Elikana ohorumelaga eraga: <<Tabo, uirena nnga mwemo munaonela we. Ukale eva fiyeda mwanola ahiye wamwa. Eto Yehova aukamihede ira uwande kwakwaneliheda nipangano neno napanganne we.>> Evale Ana ohalaga, liye muwamwihaga mwanaye ule fiyeda mwanole hiya wamwa.

1 Samuweli 11:11

Mmetcheloni muwa unde wahanatche pama, mulombwana Sawuli ohagawa alombwana anna liye makuru mararu. Unde utchaga aliwa kohovenyihanaga, aliwa dowa vamisasani vevo vakala aAmoni, aliwa roma wana. Ante fiyeda ora ya ntana kohomalaga apa akuda Amoni adjindjene. Mbwenye ale kavuluwile kahapiwa kohomwadeyaga kada mutu ayaga waye wene, aliwa tawa.

1 Samuweli 14:3

Muwari mwa atu kafwanyeya na liye ale, mmohi ali namakuta wenno awaretcha kuleti ya unamakuta. Nzina naye ali Ayiya. Ayiya ali mwana Ayitube. Ayitube wenno afwanyeya agali Ikabu mbalaye eto ali mwana Fineyasi. Fineyasi eto ali mwana Eli, wenno ali namakuta wa Yehova ilambo ya Silo. Eto atu atene a Sawuli tchaiziwile ira Jonata ohovenyavo.