Ọgụngụn 23:21 - Ika

²¹ Onwọnni eje-isi wẹ hụn ebọn Jekọpụ ẹhụ; onwọnni ụya wẹ hụn Izrẹlụ ẹhụ. Osolobuẹ wụ Chuku wẹ nọyeni wẹ anọyeni; Eze e yiọlẹ oro n'ọ hụ imẹ igunrun wẹ!

Ọgụngụn 23:21 ပူးပေါင်းရင်းမြစ်များ

Ẹbụ-ọma 23:4

Ọsụọn'a nị m ghakọ imẹ ọdanmgbugbu ẹkpa-ishi lẹ ụya, egun eje-ihiẹn atụkọ m, makẹni mmẹ lẹ yụ wị; mkpịnsịn ị lẹ ọkpọ ị a rọkọ m obi.

Matiu 1:23

“Lee ẹ, okpoho kelẹni marịn okẹnnyẹ jẹnkọ d'a tụ imẹ, mụ okẹnnyẹ; wẹ k'a kpọ nwa hụ ‘Imanuẹlụ’, ya wụ, ‘Osolobuẹ rị imẹ igunrun ẹnyi.’ ”

Jerimaya 50:20

O ru ogẹn ahụn, o ru ogẹn m k'e gi mẹ ẹ, wẹ k'a chọ njọ hụ m gi ma Izrẹlụ ikpe, ọ rịkọ a; wẹ k'a chọ njọ hụn Juda mẹ, ahụnkọ w'a — makẹni m k'a gbagharị ndị ahụn m k'e dọnmẹ ndụn imẹ wẹ. Mmẹ wụ Osolobuẹ ku ẹ.

Azaya 38:17

Eziẹ, erere m rọ nị ẹnya hụn m ihiẹn ọ hụn m. Makẹ ufiri ihiẹn-ọsụsụọ ị y'a nịnị m danye olu ntikpọ ahụn; y'e nugụọ njọ m ile ye azụụn ị —

Ẹbụ-ọma 46:11

Osolobuẹ ihiẹn ile rị okpuru ẹ nọyeni ẹnyi anọyeni; Chuku Jekọpụ rị e che ẹnyi nche! Sẹla

Azaya 33:22

Makẹni Osolobuẹ wụ onyẹ a hannị ẹnyi eṅẹn; Osolobuẹ wụ onyẹ e ye ẹnyi iwu; Osolobuẹ wụ eze ẹnyi. Ịya jẹnkọ d'a zụọpụha ẹnyi.

Azaya 8:10

Zu ni umẹ agha ụnụ k'e zu, kanị o k'a kpayịya; tụ nị iroro ile ụnụ k'a tụ, kanị ọ bụnkọ. Makẹni, Osolobuẹ nọyeni ẹnyi anọyeni.

Azaya 1:18

Osolobuẹ sị, “Bịa nị nwan nị ẹnyi ku: ọsụọn'a njọ e mẹgụọ ụnụ nwunmẹ ododo-ododo, m k'e mẹ ụnụ nwunmẹ kẹ ẹkwa-ọchan! Ọsụọn'a n'o mẹgụọ ụnụ nwunmẹ ufie-ufie, ụnụ k'e nwunmẹ kẹ oruru ọchan.

Ndị Rom 6:14

Ẹghẹẹ, njọ akịkọ ụnụ, makẹni ụnụ arịzị okpuru iwu, kanị okpuru ẹfọma.

Azaya 41:10

Atụlẹ nwan egun, nị mmẹ lẹ yụ wị; anịlẹ obi nahịn ị, nị mmẹ wụ Chuku i. M jẹnkọ d'a gba ị umẹ, yeni i ẹka; m k'e gi ẹka-nni m rị ọchan kwọndọn i.

Ẹbụ-ọma 118:15

Wẹ rị nwan a nụ olu ịghọghọ iwe ndị ezi-omumẹ — ịya lẹ olu ndị wẹ zụọpụha: wẹ rị e yi, “Osolobuẹ a kpaka ikẹn!

Ẹbụ-ọma 97:1

Osolobuẹ wụ eze; elu-ụwa ya ghọghọma! Alị ndị rịkwọrị mkpẹnrẹn-ohimin wẹ ghọghọma!

Ditrọnọmi 33:5

Osolobuẹ họnrin eze Jẹshurunu, eze Izrẹlụ hụn o mẹ kụrụ ọtọ. Ogẹn ndị-ndu wẹ gi zugbama, wẹ lẹ ebọn ile rị Izrẹlụ.

Izikẹlụ 48:35

“Azụụn ẹnịnọ obodo hụ k'a wụ maịlị isin. Gha ogẹn ahụn jẹnmẹ, ẹfan obodo hụ k'a wụ ‘Osolobuẹ Rị Ebẹhụ.’ ”

Ẹbụ-ọma 103:12

Kẹ ọwụwa ẹnyanwụn tehan ebe ọdịdan ẹnyanwụn rị, ẹrịra k'o wetehan njọ ẹnyi.

Ẹbụ-ọma 46:7

Osolobuẹ ihiẹn ile rị okpuru ẹ nọyeni ẹnyi anọyeni; Chuku Jekọpụ rị e che ẹnyi nche. Sẹla

Ẹbụ-ọma 32:5

Ya kẹ m nọ kweri gwa ị n'e mẹọlẹ m njọ; ezuemẹzinini m'ị njọ m; e sị m enwẹn m, “M jẹnkọ d'a gwaghọsị Osolobuẹ eje-ihiẹn ndị m mẹ.” Ya ị nọ gbagharị m njọ m. Sẹla

Ẹbụ-ọma 32:2

Onyẹ wẹ gọzi a gọzi wụ onyẹ hụn nwọnzilẹni njọ hụn Osolobuẹ jẹnkọ d'a jụ a ukwere ẹ, makẹni onwọnzini njọ o zuemẹ imẹ obi ẹ.

Ihiẹn Mẹni Nke Ẹbụọ 13:12

Ẹnyi lẹ Chuku wị; ịya wụ onyẹ-ndu ẹnyi. Ndị nchụn-ẹjan a sikọ d'e gbu opi ye ụnụ isi. Ndị Izrẹlụ, a lụsọnkwọlẹ ni Osolobuẹ wụ Chuku ndị nẹdi ụnụ agha — ụnụ emẹrikọkwọ!”

Ndị Han Eṅẹn 6:13

Gidiọnụ nọ sị a, “Diọkpa, omẹni Osolobuẹ nọyeni ẹnyi anọyeni, kị haịn nwan ihiẹnni ile gi rị e mẹ ẹnyi? Elebe kẹ ọrụn-atụmẹnya a ile rị — hụn ndị nẹdi ẹnyi wẹ kọnị ẹnyi ogẹn wẹ gi sị, ‘Osolobuẹ gha alị Ijiptu wepụha ẹnyi?’ Bụ Osolobuẹ a lagụọ nwan ẹnyi tọ, we ẹnyi che ẹka ndị Midianị.”

Ọpụpụ 34:9

sị, “Euu Di-nwọnni ẹnyi, omẹni ihiẹn m a sụọghọ ị, dodo Di-nwọnni ẹnyi, sọnjẹn ẹnyi nwan. Ezioku-ezioku ndịnị wụ ndị isi-akwanran, ka gbagharị ẹnyi eje-ihiẹn lẹ njọ ẹnyi mẹ, y'e weri ẹnyi nọkẹ ndị nke i.”

Ọpụpụ 13:21

Eki rị elu, Osolobuẹ e buruni wẹ ụzọ imẹ orukpu o gi e du wẹ, a ghọsị wẹ ụzọ; uhinhin, o buruni wẹ ụzọ imẹ ọkụn o gi e du wẹ, e ye wẹ ukpẹ, hụn o gi saẹka e jẹn kẹ uhinhin kẹ efinaị.

Ndị Kọrẹntị Nke Ẹbụọ 6:16

Kị Ụlọ-nsọ Osolobuẹ lẹ mmọn gi? Ẹnyi wụ Ụlọ-nsọ Osolobuẹ, Chuku hụ rị ndụn, nọkẹ kẹ Osolobuẹ dọn ku ẹ, sị, “M k'e biri imẹ wẹ, e jẹnhunmẹ imẹ igunrun wẹ. M k'a wụrụ Chuku wẹ, a wụrụ wẹ ndị nke m.”

Ndị Kọrẹntị Nke Ẹbụọ 5:19

Ya wụ nị Osolobuẹ rị imẹ Kraịstị e dọnzi ẹgbata ya lẹ ụwa, ara gizi njọ wẹ e sọn wẹ, o we ozi idọnzi-ẹgbata ahụn che ẹnyi ẹka zisọnmẹ.

Ndị Kọrẹntị Nke Ẹbụọ 2:14

Kanị ekele ya rịnị Osolobuẹ — makẹni o yesọnmẹ ẹnyi mmẹri okpuru Kraịstị ebe-lẹ-ebe ẹnyi jẹn, e gi ẹnyi e mẹ ishin-ọma ozi Kraịstị e kungbarị ebe ile.

Ndị Rom 8:1

Ya wụ, onwọnzini nwan ikpe hụn ma ndị rị imẹ Kraịstị wụ Jizọsị, ndị rịzịlẹni e bi kẹ ịhịan-mmaka kanị kẹ Mmọn-nsọ dọn chọ.

Azaya 12:6

Yikẹnmẹ ni oro, ụnụ a bụ ẹbụ ịghọghọ, ụnụ ndị Zayọnụ, makẹni Onyẹ-nsọ Izrẹlụ e mẹkẹ okẹn-ihiẹn imẹ igunrun ụnụ!”

Ọpụpụ 3:12

Chuku nọ za sị, “M jẹnkọ d'a nọyen'i. Ihiẹn sikọ d'a ghọsị ị nị mmẹ zi i wụ ọnwan: ị ghagụ Ijiptu wepụha wẹ, ụnụ k'a nọ uguni fe m.”

Ọgụngụn 14:18

‘Osolobuẹ ara bukẹnrin olulu; o nwọnkẹnmẹkẹ ihiẹn-ọsụsụọ; ọ gbagharị njọ lẹ nnupụ-isi. Kanị ara hatu onyẹ ikpe ma — o gidẹ ufiri njọ nẹdi e ye ụmụ afụnfụn d'e ru agbọ nke ẹtọ lẹ nke ẹnọ.’

Ọgụngụn 14:19

Gi nwan okẹn ihiẹn-ọsụsụọ ị gbagharị ndịnị njọ — k'i dọn rị a gbagharị wẹ ghakwọrị ogẹn wẹ gi gha alị Ijiptu pụha d'e ru ogẹnni.”

Ditrọnọmi 9:24

Isi-isi kẹ ụnụ e nupụnị Osolobuẹ kete m'a marịnlẹ ụnụ.

Ditrọnọmi 31:23

Osolobuẹ nọ tumẹ Joshụa nwa Nọnụ, sị a, “Kakẹnmẹ; rikin obi; makẹni ịyụ sikọ d'e weban ndị Izrẹlụ alị ahụn m kun enwẹn m kwe wẹ nkwa a; mmẹ lẹ enwẹn m k'a nọyeni i.”

Ditrọnọmi 32:5

Kanị, ndị nke ẹ e mẹgụọ a arụ, ifẹnrẹn ya mẹgbu wẹ makẹni ẹlẹ wẹ ezigbo ụmụ a; agbọ rụnị, zinlẹni kẹ wẹ wụ.

Lẹvitikọsụ 9:24

Ọkụn nọ gha ebe Osolobuẹ rị bịa d'e ripụ ẹjan hụ w'a dụn ọkụn lẹ ụtọrọ ndị hụ rị elu ukpo nchụn-ẹjan. Ogẹn wẹ gi hụn ihiẹnni, wẹ ile nọ yi oro, kụ isi alị.

Ọgụngụn 9:22

Ọsụọn'a akp'ọhịn ẹbụọ mọbụ ọrọgbọ ifọn mọbụ ahụa kẹ orukpu ahụn nọ elu Ọdụ ahụn, ndị Izrẹlụ sikọ d'a nọdị ebe wẹ ziẹntọ, ebulikọ wẹ; kanị o buli, e buli wẹ.

Ọgụngụn 16:3

Wẹ nọ zuni Mozizi lẹ Ẹrọnụ eje-umẹ, sị wẹ, “Ụnụ rị e mẹkarị enwẹn ụnụ! Ndị Izrẹlụ ile rị nsọ, onyẹ ọwụlẹ imẹ wẹ; Osolobuẹ nọyezikwọnị wẹ anọyeni! Kị ụnụ rịzị e bushini enwẹn ụnụ elu a karị ndị nke Osolobuẹ ile?”

Samuẹlụ Nke Ibuzọ 25:28

Dodo, gbagharị mmẹfie mmẹ wụ odibo i, makẹni Osolobuẹ k'e yerịrị yụ wụ di-nwọnni m eze e-rigụ-e-ye-nwa jẹnrin ejẹn, makẹni ị rị a lụ ọgụn Osolobuẹ. Ahụnkọ wẹ eje-ihiẹn ẹka ị y'e we bigụ.

Ẹbụ-ọma 99:2

Osolobuẹ wụ okẹn-ịhịan imẹ Zayọnụ; ịya kazịkwọ ndị alị ọzọ ile.

Ẹbụ-ọma 135:21

Gha nị obodo Zayọnụ ja Osolobuẹ mma, ja nị Onyẹ hụ bi Jerusalẹm mma. Ja nị Osolobuẹ mma!

Azaya 33:21

makẹni Osolobuẹ k'e gi ọghọ a nọdị ebẹhụ, wụrụ Dikẹn ẹnyi, wụrụnị ẹnyi iyi uku lẹ iyi nta; ụgbọ-amaran ndị-iṅẹnrẹn asakọ ẹka a banhan a, okẹn ụgbọ wẹ hi-ogbe a ghakọ a.

Juwẹlụ 2:27

Ogẹn ahụn kẹ ụnụ e gi marịn nị m rị imẹ Izrẹlụ lẹni mmẹ Osolobuẹ sụọ wụ Chuku ụnụ — onyẹ ọzọ arịa. Onwọnzini ogẹn ụya e gi ri ndị nke m.