Nehemiah 5:13 - Ika

¹³ M nọzị fapụha ẹkpa ẹwuru m, fechanpụ a, sị wẹ, “Osolobuẹ ya gi ẹrịra gha ụlọ ị lẹ ihiẹn i fechanpụ ị — onyẹ ọwụlẹ ị wụ — omẹni y'e mẹzuni nkwanị! Ya fechanpụ onyẹ nọ ẹrịra, gbama a ẹka!” Ya igunrun ahụn ile zu ebẹhụ nọ sị “Isẹẹ!” Wẹ nọ ja Osolobuẹ mma. Ndị hụ nọ mẹ ihiẹn wẹ kwe nkwa a.

Nehemiah 5:13 ပူးပေါင်းရင်းမြစ်များ

Ndị-nze Nke Ẹbụọ 23:3

Eze nọ wuzo ọnọdị a ẹhụ adansụn Ụlọ-nsọ, nọ ebẹhụ, idẹnya Osolobuẹ, kwedọnzi nkwa kẹ Osolobuẹ dọn chọ: n'o k'e sọn Osolobuẹ, n'o k'e gi obi ẹ ile lẹ umẹ-ndụn a ile mẹ ẹ, e mẹ ihiẹn ọ sị wẹ mẹ, e sọn usọnrọn ẹ, e sọn uhi ile o yi, gi ẹ mẹzu ihiẹn ndị rị nkwerigbama wẹ deye imẹ ẹkụkwọnị. Ndị Juda ile nọzị kwe nkwa hụ.

Ihiẹn Mẹni Nke Ibuzọ 16:36

Ọjịja-mma ya rịnị Osolobuẹ, Chuku Izrẹlụ jẹnrin ejẹn!! Ya ndị Izrẹlụ ile zu ebẹhụ nọ sị, “Isẹẹ!!” Ya wẹ nọ ja Osolobuẹ mma!!

Nehemiah 8:6

Ẹzra nọ ja Osolobuẹ, Chuku ahụn kachanrịnnị, mma; ndị hụ ile nọ kịshi ẹka elu, za, “Isẹẹ! Isẹẹ!!” Ya wẹ nọ kụnị Osolobuẹ isi alị.

Ẹbụ-ọma 119:106

E kungụọ m ẹfan ị, kunshi ẹ ikẹn, nị m k'a gha e dọnmẹ ezigbo uhi i yisọnmẹni ẹnyi.

Ẹbụ-ọma 50:14

Chụnyeni Chuku ẹjan-ekele, y'e mẹzuni Onyẹ Kachanrịnnị nkwa hụn i kwe ẹ;

Ẹbụ-ọma 76:11

Kwe ni Osolobuẹ wụ Chuku ụnụ nkwa, mẹzu ẹ; ndị ile nọhunmẹn'ẹ, wẹhẹsọnmẹ ni oyiye d'a gbaye Onyẹ Ahụn Rị Egun,

Itẹn 28:4

Ndị gbakịtọgụ Iwu-Osolobuẹ azụụn a ja ndị eje-omumẹ mma, kanị ndị e sọn Iwu-Osolobuẹ a ra yeni wẹ efe.

Ẹkịliziastisi 5:5

Ọ ka mma nị y'e kweni nkwa, karị n'ị kwe nkwa bụ y'e mẹn'ẹ.

Ọgụngụn 5:22

Mirinni hụn e buhẹ ọnụ-ẹsọn ya banye i ẹhụ, mẹ ẹfọ ị fun, mẹ ọgbọdọgbọ ị sekpọ.’ “O kugụ, hụn okpoho hụ a sị, ‘Isẹẹ. Isẹẹ!’

Matiu 10:14

Onyẹ ọwụlẹ mọbụ obodo ọwụlẹ nabanhanlẹni ụnụ mọbụ jụ n'o gọnkọ ozi ụnụ ntịn, gha nị iwe onyẹ hụ mọbụ obodo hụ pụ, ụnụ e tichanpụ ẹjan rị ụnụ ụkụ tọn'a.

Ọrụn Ndị-ozi 13:51

Ya kẹ Pọlụ lẹ Banabasị nọ tichanpụ ẹjan rị wẹ ụkụ tọnị wẹ, gi gwa wẹ nị ikpe a magụọ wẹ; ya wẹ nọ gha alị hụ pụ, shi Ikoniọm.

Ọrụn Ndị-ozi 18:6

Ogẹn ndị Ju gi bunụman'a, kparimẹ ẹ, ya kẹ ọ nọ zinzinpụ uzunzun rị a ẹkwa tọnị wẹ gi gwa wẹ n'e mẹọlẹ wẹ eje-ihiẹn, ọ sị wẹ, “Ẹdeke ụnụ rị ụnụ isi! Ẹka m rị ọchan! Gha kikẹnni jẹnmẹ, e buru m ndị wụlẹni ndị Ju.”

Ndị Kọrẹntị Ibuzọ 14:16

Omẹni ẹlẹ ẹrịra, i gi mmọn ị ja Osolobuẹ mma, nanị ogbori a dọn nwan sị “Isẹẹ!” bụ ọ marịn ihiẹn ị rị e ku?

Samuẹlụ Nke Ibuzọ 15:28

Samuẹlụ nọ sị a, “Lee ẹ, Osolobuẹ a dọkanarịngụọ ị alị eze Izrẹlụ tannị, w'ẹ ye onyẹ nọkunmẹn'i, onyẹ hụn ka ị mma.