Ndị Rom 16:26 - Ika

²⁶ hụn rị nwan a pụha ifọn; wẹ rị nwan e gi ihiẹn ndị-amụma de imẹ Ẹkụkwọ-nsọ a kọwanị ndị alị ile ya. Osolobuẹ rị ndụn jẹnrin ejẹn sị wẹ kọwanị wẹ ya, kẹni ndị alị ile hụn ụzọ kweri, gi okweri ahụn wẹ kweri humẹn'ẹ isi.

Ndị Rom 16:26 ပူးပေါင်းရင်းမြစ်များ

Jẹnẹsisi 21:33

Ebraham nọ gbọ osisi Tamarisi ye Biẹshẹba, nọ ukun osisi ahụn ọ gbọma fe Osolobuẹ, Chuku Itẹbitẹ.

Azaya 40:28

Y'a marịn? Y'e ke nụ? Osolobuẹ wụ Chuku hụn rị jẹnrin ejẹn, Onyẹ hụn ke ebe ile ụwa ru. Ndụn agụkọ a, ẹhụ arọkọ a, onwọnni onyẹ marịn kẹ nghọta a han.

Azaya 9:6

Makẹni a mụgụọnị wẹ ẹnyi nwa, e yegụọ wẹ ẹnyi nwa-okẹnnyẹ; ịya jẹnkọ d'a kị. Wẹ k'a kpọ a Onyẹ-ndụnmọdụn Hụn Pụ-ichẹn, Chuku Hụn wụ Dikẹn, Nẹdi Itẹbitẹ, Eze-Udọn.

Maịka 5:2

Kanị, ịyụ, Bẹt'lẹhẹm Ẹfrata, hụn nwọnlẹni ihiẹn ọ wụ imẹ ebọn ndị rị Juda, imẹ i kẹ onyẹ-ọkịkị a gha pụhanị m, d'a kị ndị Izrẹlụ, Onyẹ hụn rị ẹdẹi, rị kete-kete.

Makị 16:15

Ọ nọ sị wẹ, “Ghagbama nị ụwa ile d'e zi ihiẹn ile Chuku ke oziọma.

Ọrụn Ndị-ozi 10:43

Ndị-amụma ile shịan'a ẹri nị onyẹ ọwụlẹ kwerinin'ẹ gi ẹfan a e nwọnrin mgbagharị njọ.”

Ọrụn Ndị-ozi 6:7

Oku-Chuku hụkwọ a ghagbarị, e ru ndị bu ọda ẹka, ndị kwerini hụ e buwaye ọda imẹ Jerusalẹm; ndị nchụn-ẹjan bu ọda nọ gbehutọ sọnmẹ Ụzọ Jesu.

Ndị Rom 1:2

Oziọma Osolobuẹ kwe nkwa a ẹdẹi imẹ Ẹkụkwọ-nsọ ghahanị ndị-amụma a rọ.

Ndị Rom 1:20

Ebe o mẹ ni kete Osolobuẹ kelẹ ụwa, ihiẹn ile wẹ ghalẹni e legha banyeni Osolobuẹ pụhachanrịn ifọn, kẹ ikẹn-itẹbitẹ ẹ kẹ ihiẹn o gi wụrụ Osolobuẹ; makẹni w'e gi ihiẹn o ke a ghọta wẹ. Onwọnzini nwan ihiẹn wẹ k'e kin!

Ndị Rom 1:5

Osolobuẹ a ghalẹ nwan ẹka Jesu Kristini mẹni ẹnyi ẹfọma, gha ẹka a ye ẹnyi ọrụn ndị-ozi pụ-ichẹnni ẹnyi rị a rụn, kẹni ẹnyi hụn ụzọ wẹhẹ ndị alị ọzọ ile d'e kwerin'ẹ, humẹn'ẹ isi kẹ ndị kwerinin'ẹ, kẹni o gi ẹ ye ẹfan a ọghọ;

Ndị Rom 15:18

Ekukọdẹ m ihiẹn ọwụlẹ karị ihiẹn Kraịstị gi m rụn imẹ igunrun ndị alị ọzọ wụlẹni ndị Ju, hụn o gi mẹ wẹ wụrụ ndị e humẹni Osolobuẹ isi. Ihiẹn o gi oku-ọnụ m lẹ ihiẹn m rụn mẹ,

Ndị Rom 15:4

Wẹ de ihiẹn ile wẹ de imẹ Ẹkụkwọ-nsọ ẹdẹi kẹni wẹ gi ẹ kuzi ẹnyi, kẹni ẹnyi hụn ụzọ e din ndidin, e gi ya lẹ nkasị-obi Ẹkụkwọ-nsọ e ye nwọnsọnmẹ olilẹnya ẹnyi.

Ndị Rom 3:21

Osolobuẹ a ghọsịgụọ ezi-omumẹ hụn wụ nke ẹ, bụ ẹlẹ oku Iwu Mozizi. Kanị Iwu Mozizi lẹ ihiẹn ndị-amụma de imẹ Ẹkụkwọ-nsọ hụ a shịa ẹri nị ya wụ ezi-omumẹ Osolobuẹ:

Ndị Galeshịa 3:8

Ẹkụkwọ-nsọ e kutọgụọ a nị Osolobuẹ jẹnkọ d'e gi okukwe ndị wụlẹni ndị Ju kuni wẹ ọhụnma; ọ sị nị Chuku zi Ebraham oziọma ẹdẹi, sị, “Ẹka ị kẹ Osolobuẹ k'a gha gọzi ndị alị ile.”

Ndị Ẹfẹsọsụ 1:9

Ọ nọ nwan mẹ ẹnyi marịn ihiẹn o zuemẹye imẹ obi ẹ, ihiẹn hụn o rotọ n'o jẹnkọ d'a rụnpụha imẹ Kraịstị.

Ndị Ẹfẹsọsụ 2:20

Osolobuẹ a tụngụọ ụnụ nọkẹ ụlọ ye elu iyetọ ahụn wụ ndị-ozi pụ-ichẹn lẹ ndị-amụma. Ọmụma gi ụlọ ahụn wụ Jesu Kristi lẹ enwẹn ẹ.

Ditrọnọmi 33:27

Chuku rị ẹdẹi wụ igungun, ẹka itẹbitẹ ẹ hụ okpuru. O k'a chụpụnị ụnụ ndị iṅẹnrẹn ụnụ, a sị, ‘Tikpọ a!’

Ndị Kolosị 1:26

mẹ wẹ marịn ihiẹn-omimi hụ Osolobuẹ zuemẹ ketekete, hụn agbọ ile ghafegụnị marịnlẹni, kanị o kpupụ a nwan ghọsị ndị nke ẹ.

Timoti Ibuzọ 1:17

Eze Itẹbitẹ kẹ Osolobuẹ wụ! Eze ghalẹni a nwụn! Onyẹ wẹ ghalẹni e legha ẹnya! Chuku ohu sụọ rịnị! Mgbaye lẹ ọjịja-mma ya rịn'a jẹnrin ejẹn! Isẹẹ!

Timoti Ibuzọ 3:16

W'a rụ ụka a, ihiẹn-omimi rị ofufe Osolobuẹ e hikẹ — nị O gi ẹhụ pụha, Mmọn-nsọ a ghọsị nị ịya rọ nke-esi; ndị mmọn-ozi a hụnghọ a. Ịhịan e zisọnmẹgụọ ozi ẹ alị ichẹn-ichẹn; e kwerigụọnị w'a imẹ ụwa. O gi ọghọ lashi elu-igwee.

Timoti Nke Ẹbụọ 1:10

ọ nọ mẹ ẹ pụha ifọn ogẹnni ghahanị ọbịbịa Kraịstị wụ Jizọsị Onyẹ-nzụọpụha ẹnyi bịa imẹ ụwa. Kraịstị wụ Jizọsị e mẹrigụọ ọnwụn, napụ a ikẹn. O gigụọ Oziọma wepụha ndụn lẹ ibi-jẹnrin-ejẹn ifọn.

Hibru 13:8

Jizọsị Kraịstị wụkwọ ihiẹn ọ wụ ụnyanhụn, tannị lẹ jẹnrin ejẹn.

Hibru 9:14

ya wụ nị ẹdeke Kraịstị, onyẹ hụn gi enwẹn ẹ chụnyeni Osolobuẹ ẹjan nwọnlẹni ntụpọ ghahanị Mmọn itẹbitẹ, jẹnkọ d'a sa ẹka chanchan obi ẹnyi, chan a ezigbo ọchịchan, chanchanpụ ihiẹn ile ghalẹni e ye ndụn hụn ẹnyi mẹ, ẹnyi a hụn ụzọ fe Osolobuẹ rị ndụn.

Jọnụ Ibuzọ 5:20

Ẹnyi a marịnghọ nị Nwa Osolobuẹ a bịagụọ, n'o yegụọ ẹnyi nghọta hụn ẹnyi e gi marịn onyẹ ahụn wụ Ezioku. Ẹnyi rị nwan imẹ onyẹ ahụn wụ Ezioku lẹ Nwa a wụ Jesu Kristi. Ịya wụ Osolobuẹ nke-esi lẹ ndụn-itẹbitẹ.

Rẹvẹleshọnụ 1:17

Ogẹn m gi hụn a, m nọ fiẹnrin alị ụkụ a kẹ onyẹ nwụnhụnnị. Kanị, ọ nọ bu ẹka-nni ẹ kwasị m, sị, “Atụlẹ egun. Mmẹ wụ Ibuzọ lẹ Ikpanzụụn.

Rẹvẹleshọnụ 19:10

Ya m nọ gbu osekpu ụkụ a kẹni m kụn'a isi alị. Kanị, ọ nọ sị m, “Emẹkwọlẹ a! M wụhụ odibo nọkẹ yụ lẹ umunẹ i, ndị ile kwọndọn oku Jesu. Kụ nị Osolobuẹ sụọ isi alị, makẹni ozi Jesu wụ nkọwa ihiẹn ile ndị-amụma ku.”