Jerimaya 44:4 - Ika

⁴ E zisọnmẹ m idibo m wụ ndị-amụma d'a gwa ụnụ oku. Wẹ nọ gbasọnmẹ ụnụ mkpịnsịn-ẹka ẹnya, a sị ụnụ, ‘Emẹzilẹ ni arụnị e ze m ize!’

Jerimaya 44:4 ပူးပေါင်းရင်းမြစ်များ

Ihiẹn Mẹni Nke Ẹbụọ 36:15

Osolobuẹ wụ Chuku ndị nẹdi wẹ hụ e zi ndị ozi d'a gwa wẹ oku, a gwa wẹ ọgụgwa-ọgụgwa, makẹni omikẹn ndị nke ẹ lẹ ebe obibi ẹ rị e mẹ ẹ.

Nehemiah 9:30

Ị nọ gi ndidin sọn wẹ ahụa bu ọda, gi Mmọn ị dọsọnmẹ wẹ ẹka-ntịn ghahanị ndị-amụma ị. Kanị egọnni wẹ ntịn. Ya ị nọ bu wẹ che ẹka ndị alị ọzọ nọhunmẹni wẹ.

Nehemiah 9:34

kẹ ndị-nze ẹnyi kẹ ndị-isi ẹnyi kẹ ndị nchụn-ẹjan ẹnyi kẹ ndị nẹdi ẹnyi wẹ kanị edọnmẹni Iwu i; egọnni wẹ ntịn ihiẹn ị sị ẹnyi mẹ mọbụ gi ẹka-ntịn ị dọ wẹ mẹ ihiẹn ọwụlẹ,

Jerimaya 16:18

“M jẹnkọ d'e ye wẹ afụnfụn njọ lẹ eje-ihiẹn wẹ mẹ, ye wẹ ya ụzọ ẹbụọ, makẹni e gigụọ wẹ eje-ihiẹn ndị ahụn wẹ kpụtọsọnmẹ mẹrụ alị m, ihiẹn ndị ahụn rụnị rịlẹni ndụn hụn wẹ rị e fe.”

Jerimaya 26:5

omẹni ụnụ egọnni idibo m wụ ndị-amụma ntịn — ndị amụma hụn m rị e zihẹni ụnụ ozihẹni-ozihẹni, hụn ụnụ jụ nị ụnụ egọnkọ ntịn,

Jerimaya 29:19

Makẹni egini wẹ oku m dọn, oku hụn m gi idibo m wụ ndị-amụma gwa wẹ ọgụgwa-ọgụgwa. Ya kẹ Osolobuẹ ku. Ụnụ nwẹn wẹ kpụnshi alị ndị-ọzọ egizikwọnị oku m dọn. Ya kẹ Osolobuẹ ku.

Jerimaya 32:33

“E bu wẹ azụụn zinmẹ m, ẹlẹ ihun; m hụ a kuzi wẹ ọkuzi-ọkuzi, w'a ra gọn ntịn, achọdẹni wẹ nị wẹ nụ.

Jerimaya 32:34

“A kọmadẹ wẹ mmọn wẹ ndị ahụn, ihiẹn ndị ahụn m'a sọ, ye imẹ ụlọ ahụn rị a za ẹfan m, gi wẹ mẹrụ a.

Jerimaya 32:35

A tụnsọnmẹ wẹ ukpo wẹ nọ a rụa Baalụ ye imẹ Ọdanmgbugbu Bẹn-Hinọm, a nọ ebẹhụ e gi ụmụ wẹ ikẹnnyẹ lẹ ikpoho a chụnyeni mmọn wụ Molẹkị ẹjan — bụ ezini m wẹ, obi m eshitudẹni izi wẹ d'e mẹ arụ nọ ẹnịna; wẹ nọ gi ẹ dọ Juda ye imẹ njọ.

Jerimaya 35:15

M hụ e zihẹni ụnụ idibo m ndị amụmanị ile ozihẹ-ozihẹ. Wẹ hụ a sị ụnụ, “Onyẹ ọwụlẹ ya mẹbehikwọ eje-ihiẹn ọ rị e mẹ, mẹmẹ ihiẹn rị mma; arụazịlẹ ni mmọn — kẹni ụnụ bisọnmẹ alịnị m ye ụnụ lẹ ndị nẹdi ụnụ.” Kanị, ụnụ achọnị nị ụnụ nụ, ụnụ egọnni m ntịn.

Jerimaya 35:17

“Ufiri ẹ, Osolobuẹ ihiẹn ile rị okpuru ẹ, hụn wụ Chuku Izrẹlụ, rị nwan a sị, ‘Gọn nị ntịn! M jẹnkọ d'e mẹ alị Juda lẹ ndị ile bi imẹ Jerusalẹm eje-ihiẹn ile m sị nị m jẹnkọ d'e mẹ wẹ. Makẹni kẹ m gwa wẹ oku, egọnni wẹ ntịn; a kpọ m wẹ oku, azanị wẹ.’ ”

Jerimaya 7:13

Kẹ ụnụ rị e mẹ ihiẹn ndịnị, m hụ a gwa ụnụ ọgụgwa-ọgụgwa, kanị ụnụ egini dọn; a kpọ m ụnụ, ụnụ azanị. Ya kẹ Osolobuẹ ku.

Jerimaya 7:17

Y'a rị a hụn ihiẹn wẹ rị e mẹ imẹ obodo ile rị alị Juda lẹ ọgbara-ogbe ile rị Jerusalẹm?

Jerimaya 7:18

Ụmụẹka kpashimẹ ọkụn, ndị nẹdi wẹ a mụye ọkụn, ikpoho e shi ihiẹn-oriri wẹ gi a rụa mmọn wẹ w'a kpọ ‘Eze-okpoho Elu-igwee.’ Wẹ hụ a tụ manya e yeni mmọn ichẹn-ichẹn, e gi ẹ a kpasu m iwe.

Jerimaya 7:25

Ghakwọrị ogẹn hụ ndị nẹdi ụnụ gi gha alị Ijiptu pụha d'e ru ogẹnni, m hụ e zihẹni ụnụ idibo m ndị-amụma m ụhụọhịn-ụhụọhịn, e zi wẹ e zikwasị.

Izikẹlụ 16:36

Osolobuẹ Nwọn Ihiẹn Ile sị: Makẹni y'e kwọndọnzini enwẹn i lẹ ufiri ọtọ ị ndị yụ lẹ wẹ rị a sụọ hụn ebe ị rị a ghẹrẹ lẹ ufiri mmọn ị ndị hụ e ze m ize lẹ ẹdeke mmụ ị i gbuni wẹ,

Izikẹlụ 16:47

Ẹlẹdẹ n'i sọn nzọmụkụ wẹ bi eje-obibi sụọ, o bieni ebie y'e mẹkarịgụọ wẹ eje-ihiẹn.

Izikẹlụ 18:31

Ma nị nwan eje-ihiẹn ile ụnụ rị e mẹ tuhu; nwọnrin ni obi ọhụn lẹ mmọn ọhụn. Kị ụnụ k'a nwụnnị, ụnụ ndị Izrẹlụ?!’

Izikẹlụ 8:10

Ya m nọ banye, lee ẹnya: e lee ihiẹn wẹ sejun ụsụọ-ẹjan hụ ile: ụdị ihiẹn ile a rịnị lẹ anụmanụ ile Chuku sị ẹnyi sọ lẹzi mmọn ile ikpụlọ Izrẹlụ a rụa.

Daniẹlụ 9:6

Ẹnyi egọnni idibo i ndị-amụma ntịn — ndị amụma ị, hụn gi ẹfan ị gwa ndị-nze ẹnyi lẹ ndị-isi ẹnyi lẹ ndị nẹdi ẹnyi lẹ ndị alị ẹnyi ile oku.

Zẹkaraya 7:7

“ ‘Ẹlẹ okuni wẹ rị a gwa ụnụ kẹ Osolobuẹ gi ndị-amụma mbụ ku, kẹ wẹ kelẹni tikpọ Jerusalẹm? Ogẹn ahụn Jerusalẹm lẹ obodo ndị nọhunmẹn'ẹ gi rị e bi udọn-lẹ-ndọnkwa, ogẹn ahụn ịhịan bizi imẹ Nẹgẹvụ rị ẹbamịn ndịdan-mirin ọda-ọda lẹ imẹ Shẹfẹla rị nkpọtu òke ibẹka ọdịdan-ẹnyanwụn.’ ”

Pita Ibuzọ 4:3

Ẹghẹẹ, nị ụnụ e tuhuọlẹ ogẹn ọda-ọda ogẹn ụnụ gi rị e bi kẹ ndị ghalẹni e fe Chuku, e bi obibi ifẹnrẹn, adụdụ eje-ihiẹn hụ a dụ ụnụ, ụnụ hụ a ra manya a tụ, e mẹ eje-mmẹmmẹ, e jẹn ọgbọ manya, a rụa mmọn ụnụ a marịnzị hụn ụnụ rụakọ.