6 Ọnụ onyẹ-nzuzu e sehẹn'ẹ oku, ọnụ a e mẹ wẹ e gbu ẹ ili.
Onyẹ nzuzu a ghọsị iwe rị e wen'ẹ ozigbo-ozigbo, kanị onyẹ nwọn uche e wepụzị ẹnya wẹ kpari ẹ.
Ikpe-ikpe kẹ mpache e se, kanị ẹka ndị a nụ ndụnmọdụn kẹ ịhịan a nọ a hụn amamihiẹn.
Onyẹ nwọn uche e gi egun Osolobuẹ a gbanị eje-ihiẹn ọsọ; kanị nzuzu e mẹ isi-mgbaka, ara tu ihiẹn ọwụlẹ.
Oku-ọnụ onyẹ-nzuzu e mẹ wẹ a fịan a mkpịnsịn, kanị oku-ọnụ onyẹ nwọn uche e gbọndọnn'ẹ nsọngbu.
Ibidọn ikpe nọ kẹ itikpọ ụgba wẹ gi gbọndọn okẹn mirin; la nwan oku hụ tọ o gini e se ikpe.
Onyẹ obi-ọkụn k'e girịrị isi ẹ buru ihiẹn rịn'a; ị zụọpụhagụ a, ị k'a zụọpụhazị a ọzọ.
Ndị-ẹwobi kẹ wẹ dọnmẹtọnị afụnfụn; ụgba-azụụn ndị-nzuzu kẹ wẹ dọmẹtọnị mkpịnsịn.
Onyẹ nu oku ẹka ye enwẹn ẹ ọghọ, kanị ikpe-ikpe kẹ onyẹ-nzuzu ọwụlẹ e kpe.
Chụpụ onyẹ-nlelịa, ikpe a pụ, ndọndọ lẹ mkpari a kụsị.
Ọ ka mma nị ịhịan bi ụsụọ ohu elu ụlọ, karị nị ya lẹ nwunyẹ hụn e mẹ oku bi imẹ ụlọ.
Ọmụma a nyịnghọ, ẹjan a nyịnzịghọkwọ, kanị iwe onyẹ-ẹwobi a kpasu ịhịan nyịnnahịn wẹ ẹbụbụọ.
Onyẹ marịn ihiẹn lẹ onyẹ-nzuzu dọma oku, olulu-olulu kẹ onyẹ-nzuzu e bu, a mụ ịhịan ẹmụ — ara nị wẹ ku oku ahụn.
