Hosia 3:4 - Ika

⁴ Ẹrịra kẹ ndị Izrẹlụ k'a nọbie — eze arịkọ, onyẹ-ndu arịkọ; ịchụn-ẹjan arịkọ, ihiẹn wẹ e zumẹni mmọn arịkọ; ẹfọdụ wẹ gi jụ Osolobuẹ ihiẹn arịkọ, nwa-mmọn arịkọ.

Hosia 3:4 ပူးပေါင်းရင်းမြစ်များ

Jẹnẹsisi 31:19

Ogẹn Labanị gi jẹnmẹgụ d'a kọ atụnrụn a ẹṅẹnrẹn, Rechẹlụ nọ zunrun mmọn ndị nẹdi ẹ lẹ ezi-lẹ-ụlọ a a rụa.

Jẹnẹsisi 31:34

Rechẹlụ e weriọlẹ nwan mmọn ndị ahụn che imẹ ihiẹn w'e gi a nọdị elu anyịnyan-mkpukpuke. Ọ nọ nọdịkwasị wẹ. Labanị a gwalọchanrịn ihiẹn ile rị ọdụ ahụn — onwọnni ihiẹn ọ hụn.

Jẹnẹsisi 49:10

Ọkpọ-eze aghakọ Juda ẹka pụ, ọkpọ onyẹ-ọkịkị aghakọ a ngadan pụ — d'e ru mgbe onyẹ nwọn ọkpọ ahụn e gi bịa. Ndị alị ichẹn-ichẹn k'a gha e buhẹ ihiẹn d'a chann'a ẹnya, e sekpun'ẹ alị.

Samuẹlụ Nke Ẹbụọ 6:14

Defidi yi ẹfọdụ, ẹwuru ndị nchụn-ẹjan wẹ gi linẹni kwa; ọ hụ e gi ikẹn ẹ ile e tẹnni Osolobuẹ egu,

Ndị-nze Nke Ẹbụọ 23:24

Josaya e wepụzịghọ ndị a gba ẹfa lẹ ndị e du ndị-mmọn e ku lẹ mmọn ndị alị kọmasọnmẹ iwe wẹ lẹ mmọn-lẹ-iyi ichẹn-ichẹn lẹ ihiẹn ọzọ ile w'e fe, kẹ imẹ alị Juda ile kẹ imẹ obodo Jerusalẹm. Ihiẹn ndịnị ile k'o gi mẹzu Iwu Osolobuẹ wẹ de imẹ ẹkụkwọ hụ onyẹ-isi nchụn-ẹjan wụ Hil'kia hụn imẹ Ụlọ-nsọ Osolobuẹ.

Ihiẹn Mẹni Nke Ẹbụọ 15:2

Azaria nọ jẹn d'e kunrun Asa, sị a, “Asa lẹ ndị Juda lẹ ndị Bẹnjamini ile, gọn ni m ntịn. Osolobuẹ a nọyeghọnị ụnụ omẹni ụnụ a nọdịyen'ẹ. Ụnụ chọ a, ụnụ k'a hụn a, kanị ụnụ gbakitọ a azụụn, ọ gbakitọ ụnụ azụụn.

Ọpụpụ 28:4

Lee ẹkwa ichẹn-ichẹn wẹ jẹnkọ d'a kwa: Ẹkpa Elu-obi, ẹfọdụ w'e yiyechanrịn elu ẹ, ẹwuru tueghafe mkpụkụ, ẹwuru ọrụn nchụn-ẹjan tueru alị wẹ kpa, okpu isi ohu lẹ eriri ohu. Ẹrọnụ nwẹnẹ i lẹ ụmụ a ikẹnnyẹ kẹ wẹ k'a kwanị ẹkwa-nsọ ndịnị, nị wẹ hụn ụzọ a rụnnị m ọrụn ndị a chụn ẹjan.

Ọpụpụ 28:6

“Wẹ gi ẹkwa-linẹni riẹnni kwa ẹwuru ẹfọdụ, kpayesọnmẹ ẹ ihiẹn goru lẹ oruru bru lẹ nke pọpụ lẹ nke ododo, kpayesọnmẹ wẹ ọhụnma.

Ẹkwan 2:9

Ọnụ-mgbọn Jerusalẹm a dangụọ; ọ kpagipụgụọ ihiẹn ndị wẹ gi fidọn wẹ, wiwipụ wẹ. Eze ẹ lẹ ndị-isi ẹ rị nwan alị ndị ọzọ; Iwu Osolobuẹ arịzị, ndị-amụma rịn'a ara hụnzị ihiẹn ọwụlẹ ebe Osolobuẹ rị.

Izikẹlụ 19:14

“ ‘Ọkụn a ghagụọ agala a ohu banye ẹ, ripụ mkpụrụ a. Onwọnzini agala ọwụlẹ zeni họdụnị hụn furu a wụ ọkpọ ọkịkị.’ Ẹbụ-ụya rọ; wẹ rị nwan e gi ẹ a kwan ụya.”

Izikẹlụ 20:32

“Ihiẹn hụ ụnụ rị e ro aghakọ, ihiẹn hụ ụnụ rị a sị enwẹn ụnụ, ‘Nị ẹnyi nọ kẹ alị ndị ọzọ, ebọn ndị rị alị ndị ọzọ, ndị hụn e fe mkp'osisi lẹ ọmụma.’

Izikẹlụ 21:21

Makẹni, eze Babilọnụ k'e wuzo ebe ụzọ ahụn nọ wa ẹbụ, e ro hụn o k'a ghashi: O k'e gi ọbara-ụta a gba ẹfa; o k'a jụ mmọn a ọnụ; o k'e wepụha imegi anụ, gi ẹ nyan utẹn kẹ wẹ e mẹ.

Izikẹlụ 21:31

M k'e hu ọnụma m kpu i, fụ olulu ọkụn m kpu i; m k'e we i che ẹka ndị ẹfọ jọ, ndị ahụn marịn ẹnya ntikpọ.

Daniẹlụ 11:31

“Ndị-agha a k'a pụha d'e mẹrụ Ụlọ-nsọ, ebẹhụ Izrẹlụ gi e dọn ẹnya, kagbu ẹjan w'a chụnyeni Osolobuẹ ụhụọhịn-ụhụọhịn, a bịa wẹ d'e tumẹ arụ ahụn hụn e buhẹ ntikpọ.

Daniẹlụ 12:11

“Gha ogẹn w'e gi kagbu ẹjan w'a chụnnị Osolobuẹ ụhụọhịn-ụhụọhịn d'e ru ogẹn w'e gi tumẹ ihiẹn ahụn e mẹrụnị e buhẹ ntikpọ k'a wụ akpọhịn iri kwasị ọgụn-ẹnọ kwasị nnụ-ẹtọ (1,290).

Daniẹlụ 9:27

Onyẹ-ọkịkịnị lẹ ndị bu ọda k'e kwerigbama ọrọgbọ ‘ẹsa.’ ‘Ẹsa’ hụ ruọlẹ ahanmahan o k'a kụsị ẹjan w'a chụnị Osolobuẹ lẹ oyiye ndị w'e ye Osolobuẹ. O k'e bu ihiẹn e mẹrụnị tumẹ azụụn ohu imẹ Ụlọ-nsọ, gi ẹ sehẹ ntikpọ — d'e runi Osolobuẹ e mẹ ẹ ihiẹn ọ sị o k'e mẹ, nke ẹ a gụ.”

Hosia 13:10

Ebe eze ụnụ rị nwan n'ọ gbapụha ụnụ imẹ obodo ụnụ rị ichẹn-ichẹn? Elebe kẹ ndị-ọkịkị ụnụ rị nwan ndị nwẹn ụnụ sị m, ‘Ye ẹnyi eze lẹ ndị-isi hụn k'e duni ẹnyi’?

Hosia 13:11

Iwe kẹ m gi ye ụnụ eze; m nọzị gi olulu wepụ a.

Hosia 2:11

M k'a kụsị mmẹmmẹ wẹ ile: kẹ ndị wẹ e mẹ ahụa-ahụa, kẹ hụn Ifọn gi pụ kẹ Ụhụọhịn Ezumikẹn, mmẹmmẹ-ofufe ile wẹ tumẹni wẹ.

Lẹvitikọsụ 8:7

Ọ nọ yimẹ Ẹrọnụ ẹwuru ọrụn nchụn-ẹjan ahụn tueru alị, gi nfifie hụ fiemẹ ẹ ukun; o yimẹ ẹ ẹwuru hụ tueghafe mkpụkụ ya lẹ ẹfọdụ a wị, yimẹ ẹ ẹfọdụ elu ẹ. Ọ nọ gi nfifie ẹfọdụ hụ wẹ kpa ọhụnma fiemẹzi ẹ ukun, o kẹnrẹn.

Zẹkaraya 10:2

Makẹni mmọn wẹ kpụ wụ ihiẹn-ẹti; ndị-ẹfa hụ a gba ẹfa ntụ, ndị nrọ hụ a rọ hụn nwọnlẹni isi, a rọkọ ịhịan obi nwọnlẹni isi; ịhịan hụ a wahunmẹ nọkẹ atụnrụn, a ta afụnfụn makẹni enwọn wẹ onyẹ e duni wẹ.

Zẹkaraya 13:2

Osolobuẹ ihiẹn ile rị okpuru ẹ sị: “O ru ogẹn ahụn, m k'e wepụchanrịn ẹfan mmọn imẹ alị Izrẹlụ, nke wụnị anyanhankọzịdẹ wẹ wẹ; m k'e wepụzịkwọ ndị-amụma ntụ lẹ mmọn eje-obibi alịnị,

Luku 21:24

Wẹ k'e gi ọpịa-agha gbu wẹ, kpụnrụn wẹ shi alị ile rị ichẹn-ichẹn. Alị ndị ọzọ jẹnkọ d'a zọ Jerusalẹm ụkụ d'e ru nị ogẹn alị ndị ọzọ e zu.

Jọnụ 19:15

Wẹ nọ yi, “Gbu ẹ! Gbu ẹ! Kpọgbu ẹ!” Paịleti nọ sị wẹ, “Ụnụ chọ nị m kpọgbu eze ụnụ?” Ndị-isi nchụn-ẹjan nọ sị a, “Siza, eze Rom, ịya sụọ wụ eze ẹnyi nwọn!”

Hibru 10:26

Makẹni, ẹnyi kpachanpụ ẹnya tọ njọ e mẹ ebe ẹnyi marịngụ ezioku, onwọnzini ẹjan họdụnị wẹ jẹnkọ d'a chụn gi wepụ njọ;

Ndị Han Eṅẹn 17:5

Maịka nwọn ụlọ wẹ nọ e fe Chuku; ọ kwa ẹwuru ẹfọdụ ndị nchụn-ẹjan Osolobuẹ; ọ pịnrịnzị mmọn ndị o pịnrịn; o we nwa a okẹnnyẹ ohu tumẹ ohẹn a.

Ndị Han Eṅẹn 18:14

Ya kẹ ikẹnnyẹ isẹn hụ gi nzuzue chọpụhanị wẹ alị Laishi nọ sị umunẹ wẹ, “Ụnụ a marịnghọ nị o nwọnghọ ụlọ rị ebeni hụn nwọn Ẹfọdụ ndị nchụn-ẹjan Osolobuẹ e yi lẹ mmọn ezi-lẹ-ụlọ lẹ mmọn wẹ pịn gi siliva nyankwama a? Ụnụ a marịngụọ nwan ihiẹn ụnụ k'e mẹ.”

Ndị Han Eṅẹn 8:27

Ya Gidiọnụ nọ gi goru hụ kpụrụ ẹfọdụ, ẹwuru ndị nchụn-ẹjan, bu ẹ che imẹ obodo ẹ wụ Ọfra. Ndị Izrẹlụ ile nọ gbasọnmẹ ẹfọdụ hụ, femẹ ẹ. Ọ nọ wụrụnị Gidiọnụ lẹ ezi-lẹ-ụlọ a ọnyan.

Samuẹlụ Nke Ibuzọ 14:3

Onyẹ nchụn-ẹjan wụ Ahija rị imẹ ndịnị; o yi ẹfọdụ, ẹwuru ọrụn ndị nchụn-ẹjan. Ahija wụ nwa Ahitubu, nwẹnẹ Ikabodu nwa Finẹhasị. Finẹhasị wụ nwa Ẹlaị onyẹ nchụn-ẹjan Osolobuẹ imẹ Shilo. Onwọnni onyẹ marịnnị Jonatanị a pụgụọ.

Samuẹlụ Nke Ibuzọ 15:23

“Nnupụ-isi lẹ ịgba-ẹfa wụ ohu; imẹ-karị-enwẹn ịhịan lẹ ịrụa-mmọn wụ ohu. Ebe o mẹ ni ya jụgụọ oku Osolobuẹ, Osolobuẹ a jụgụọ ị nị y'e ẹlẹzi eze.”

Samuẹlụ Nke Ibuzọ 2:18

Kanị Samuẹlụ hụ a rụnnị Osolobuẹ ọrụn, nwa-ndu rị e yi ẹwuru ẹfọdụ wẹ gi ẹkwa linẹ kwa hụn ndị nchụn-ẹjan e yi!

Samuẹlụ Nke Ibuzọ 21:9

Onyẹ nchụn-ẹjan nọ sị a, “Ọpịa-agha Golịatị onyẹ Filistia ahụn i gbu imẹ Ọdanmgbugbu Ẹla hụ ebeni; wẹ gi ẹkwa fụma a tọ azụụn ẹwuru nchụn-ẹjan Ẹfọdụ hụ wẹ kpụ. Omẹni i chọ a, y'e weri ẹ; onwọnzini ọpịa-agha ọzọ rị ebeni karị ọhụn.” Defidi nọ sị, “Onwọnni hụn nọ kẹ ya; ye m'ẹ.”

Samuẹlụ Nke Ibuzọ 22:18

Ya kẹ eze nọ sị Duẹgị, “Yụ nwẹn, d'e gbu ndị nchụn-ẹjannị.” Ya kẹ Duẹgị onyẹ Ẹdọm nọ gbehutọ, gbu wẹ. Ndị nchụn-ẹjan isẹn kwasị ọgụn-ẹnọ gbegbegbe yi ẹwuru Ẹfọdụ wẹ gi ẹkwa linẹ kwa k'o gbu ụhụọhịn ahụn!

Samuẹlụ Nke Ibuzọ 23:6

Abiata nwa Ahimẹlẹkị wẹhẹ ẹfọdụ hụ wẹ gi a jụ Osolobuẹ uche ẹ k'ọ gbala d'e kunrun Defidi imẹ Kẹila.

Samuẹlụ Nke Ibuzọ 23:9

Mgbe Defidi gi marịn nị Sọlụ rị e zun'ẹ eje-umẹ, ọ nọ sị Abiata onyẹ nchụn-ẹjan, “Wẹhẹ Ẹfọdụ hụ wẹ gi a jụ Chuku uche ẹ!”

Samuẹlụ Nke Ibuzọ 30:7

Ya Defidi nọ sị Abiata onyẹ nchụn-ẹjan, nwa Ahimẹlẹkị, “Wẹhẹni m Ẹfọdụ hụ wẹ gi a jụ Osolobuẹ uche ẹ.” Abiata nọ wẹhẹn'ẹ ya.