Hosia 12:6 - Ika

⁶ Rogharị nị ni nwan d'e kunrun Chuku ụnụ! e kwọnkẹnmẹ ni ihiẹn-ọsụsụọ e mẹ ni ịhịan k'o furu, e che eyemẹka Chuku ụnụ ogẹn ile.

Hosia 12:6 ပူးပေါင်းရင်းမြစ်များ

Jẹnẹsisi 49:18

Euu Osolobuẹ, ịyụ kẹ m rị e lekwọ n'ị zụọpụha m!

Ẹbụ-ọma 123:2

Ẹghẹẹ, kẹ ikẹnnyẹ wụ idibo dọn a tụ ẹnya ihiẹn rị di-nwọnni wẹ ẹka lẹ kẹ ikpoho wụ idibo dọn a tụ ẹnya ihiẹn rị nnẹ wẹ ẹka, ẹrịra kẹ ẹnyi dọn nwan rị e lee Osolobuẹ wụ Chuku ẹnyi ẹnya, d'e ru n'o mẹ omikẹn ẹnyi.

Ẹbụ-ọma 27:14

Gi Osolobuẹ dọn ẹnya. Turu, y'e kwọndọn obi i, y'e gi Osolobuẹ dọn ẹnya.

Ẹbụ-ọma 37:7

La ihiẹn ile tọnị Osolobuẹ, y'e nwọn ndidin cheri ẹ; agbakalẹ obi nị ọ hụ a ghanị onyẹ rị e mẹ ihiẹn ẹ, onyẹ rị e rotọ eje-ihiẹn e mẹ ẹ.

Ọpụpụ 3:15

Chuku nọzị sị a, “Gwa ndị Izrẹlụ, ‘Osolobuẹ hụn wụ Chuku ndị nẹdi ụnụ, Chuku Ebraham, Chuku Aziki, Chuku Jekọpụ zihẹ m d'e kunrun ụnụ.’ Ọnwan wụ ẹfan m jẹnrin ejẹn, ẹfan agbọ ile jẹnkọ d'e gi a nyanhan m.

Itẹn 1:23

Omẹni ụnụ te gọn ntịn kẹ m rị a jụgbọ ụnụ, nkẹ a gwachanrịn m ụnụ ihiẹn rị m obi, mẹ ụnụ marịn ihiẹn m rị e ro.

Itẹn 21:3

Ezi-omumẹ lẹ imẹ onyẹ ọwụlẹ k'o furu kẹ Osolobuẹ ka a nabanhan karị ịchụn-ẹjan.

Azaya 1:16

wụ nị ẹhụ; kẹni ụnụ nwunchan! Wepụ nị nị m eje-ihiẹn ndịnị ụnụ rị e mẹ! Mẹbehi ni eje-ihiẹn!

Azaya 30:18

Ya haịn Osolobuẹ gi rị e che n'o mẹni ụnụ ọhụnma; o lihigụọ n'o mẹni ụnụ omikẹn. Osolobuẹ wụ Chuku e mẹ ihiẹn furuni. O k'a rịnị ndị ile e gi ẹ e dọn ẹnya mma.

Azaya 31:6

“Euu ndị Izrẹlụ, kin ni nwan azụụn buru Osolobuẹ, ọ sụọn'a nị ụnụ e gigụọ nnupụ-isi ụnụ mẹ ẹ njọ ọda-ọda.

Azaya 40:31

kanị nke ndị gi Osolobuẹ e dọn ẹnya, ndụn k'a banzị wẹ. Wẹ k'e fe imẹ-elu kẹ ugọn; wẹ k'a gba ọsọ, ndụn agụkọ wẹ; wẹ k'e jẹn ijẹn, asọhịkọ wẹ.

Azaya 58:6

Ọnwan wụ ọnụ m sị ụnụ e bu: ịkpọpụ ndị wẹ rị e mẹ eje-ihiẹn ẹgan lẹ ịtọpụ ndị wẹ rị a kịgbu ẹgbụn, ịhatu ndị wẹ rị a bịangbu lẹ itibepụ agbụn ile rị wẹ olu. Ẹlẹ ịya?

Azaya 8:17

M jẹnkọ d'e cheri Osolobuẹ, hụn rị e zuemẹni ikpụnọ Jekọpụ ihun ẹ. M jẹnkọ d'e gi ẹ e dọn ẹnya.

Jerimaya 22:15

“I ro nị inwọn osisi sida bu ọda k'i gi wụrụ eze? Josaya nẹdi i a hụnnị ri, ra? Kanị o mẹghọ ihiẹn furuni lẹ ihiẹn rị mma, ihiẹn nọ ghan'a.

Izikẹlụ 18:30

“Osolobuẹ Nwọn Ihiẹn Ile rị nwan a sị, ‘Ụnụ ndị Izrẹlụ, obibi onyẹ-onyẹ kẹ m'e gi kin ẹ ikpe. Bihutọ nị nwan ẹka! La nị eje-ihiẹn ile ụnụ rị e mẹ tọ, amamgbe njọ ụnụ e mẹ ụnụ uke.

Hosia 10:12

“Kụnnị nị enwẹn ụnụ ezi-omumẹ, nị ụnụ ghọrị ihiẹn-ọsụsụọ m; rụn nị nwan alị ụnụ kelẹni rụn; ogẹn w'e gi rogharị d'e kunrun Osolobuẹ e rugụọ, kẹni o mẹni ụnụ ihiẹn furuni, mẹ ẹ zue kẹ mirin.

Hosia 14:1

Rogharị nị nwan, ndị Izrẹlụ, kweyeni Osolobuẹ wụ Chuku ụnụ makẹni ụnụ a kpọgburugụọ njọ dan.

Hosia 4:1

Gọn ni ntịn, ndị Izrẹlụ, gọn ni ntịn oku Osolobuẹ; nị Osolobuẹ rị e du ndị alịnị e kpe: ọ sị: ezioku arịzị alịnị onwọnzini onyẹ w'e gi dọn ẹnya; w'a ra gizi nke Osolobuẹ dọn alịnị.

Juwẹlụ 2:12

Kanị Osolobuẹ sị, “Echẹn kẹ oghere rịkwọ nwan! Gichanrịn nị nwan obi ụnụ ile kinhẹn ya lẹ ibu-ọnụ lẹ ẹkwan lẹ ihulụa-isi;

Juwẹlụ 2:13

dọwa nị obi ụnụ, ẹlẹ ẹwuru ụnụ. Kinhẹn ni ebe Osolobuẹ wụ Chuku ụnụ rị; onyẹ ẹfọma lẹ omikẹn k'ọ wụ; ara bukẹnrin olulu; o nwọn ihiẹn-ọsụsụọ ọda-ọda; ọ latọ afụnfụn o te k'e ye ịhịan alatọ.”

Emọsụ 4:13

Lekwọ nị ẹnya, Onyẹ hụn mẹmẹ ugu ile, Onyẹ hụn ke ufere; Onyẹ hụn a gwa ịhịan uche ẹ; Onyẹ hụn e mẹ efinaị a gba ishi; Onyẹ hụn a zọ ebe ile jẹn elu elu-ụwa ụkụ; Osolobuẹ, Chuku ihiẹn ile rị okpuru ẹ ịya wụ ẹfan a!”

Emọsụ 5:24

“Kama, nị nị ezigbo eṅẹn humẹ kẹ mirin, ezi-omumẹ ya humẹ kẹ mirin iyi ghalẹni a tahị.

Maịka 6:8

Ịhịan, Osolobuẹ agwagụọ ị ihiẹn rị mma i k'e mẹ. Kị Osolobuẹ chọ ẹka ị karị iye ịhịan ihiẹn ẹ lẹ ihiẹn-ọsụsụọ lẹ iwelụa enwẹn i alị bini Chuku i?

Maịka 7:7

Kanị, mmẹ nwẹn, Osolobuẹ kẹ m'e lee; m k'e cheri Chuku hụn a zụọpụhanị m; Chuku m jẹnkọ d'a za m.

Habakọkụ 2:3

Makẹni ogẹn ihiẹnni k'e rugụ o kebe mẹ; o sikọ d'e mẹzurịrị — omẹkọ ntụ; ọsụọn'a o bie ebie, cheri ẹ, n'o k'e mẹrịrị — o bieghafekọ ogẹn ẹ.

Zẹfanaya 3:8

Gbacherikwọ nị m nwan! Ya kẹ Osolobuẹ ku; cheri ni ụhụọhịn m k'a kpa ikẹn kwarị ihiẹn m gbu. E kugụọ m'a nị m k'e wegbama alị ichẹn-ichẹn, nị m k'a kpọgbama alị-eze ichẹn-ichẹn, kẹni m mẹ wẹ ihiẹn kẹ olulu han m obi kẹni m gi okẹn iwe-lẹ-ọnụma m mẹ wẹ ihiẹn, makẹni m k'e gi ẹnya rị a fụnị m hu ọnụma m kpu wẹ ile ri nọkẹ ọkụn.

Zẹkaraya 1:3

Sị nwan ndị nke ụnụ, ‘Osolobuẹ ihiẹn ile rị okpuru ẹ sị: Kinhẹn ni nwan ebe m rị, nị m kinhẹn ebe ụnụ rị. Ya kẹ Osolobuẹ ihiẹn ile rị okpuru ẹ ku.’

Zẹkaraya 7:9

Osolobuẹ ihiẹn ile rị okpuru ẹ sị: “Han nị ezigbo eṅẹn; e gi ni ẹfọma lẹ omikẹn e sọn ibe ụnụ;

Zẹkaraya 8:16

“Ka lee ni ihiẹn ndị ụnụ k'e mẹ: A gwa nị ibe ụnụ ezioku; a han nị ezigbo eṅẹn imẹ ọgwa ụnụ ile — eṅẹn udọn gi a rị;

Ọrụn Ndị-ozi 2:38

Pita nọ za wẹ, sị, “Onyẹ-onyẹ imẹ ụnụ ya rogharị, ni wẹ gi ẹfan Jizọs Kraịstị mẹ ẹ mirin-Chuku, Osolobuẹ a gbagharị a njọ, ogẹn ahụn, o nwọnhẹn oyiye hụ wụ Mmọn-nsọ.

Ọrụn Ndị-ozi 26:20

Kama, e zimẹ m ozi hụ imẹ Damaskọsụ ebẹhụ. E zigụ m ndị rị Damaskọsụ ozi hụ, m nọzị zi ẹ imẹ Jerusalẹm lẹ ẹgbẹrẹ Judia ile, zizikwọ ndị alị ndị ọzọ ya, a sị wẹ rogharị buru Osolobuẹ, bimẹ kẹ ndị rogharịnị.

Jemisi 1:27

Ezigbo ofufe zu oke, rụlẹni ẹnya Osolobuẹ Nẹdi ẹnyi wụ hụnnị: ịtụnị ndị nwọnlẹni nẹdi mọbụ nnẹ lẹ ikpoho di wẹ nwụn rị e ri ụya ụya, lẹzi idọnmẹ enwẹn ịhịan makẹ ụwa gha e mẹrụ a.

Jemisi 2:13

onyẹ ghalẹni e mẹ omikẹn, emẹkọnị w'a omikẹn wẹ gha e kin ẹ ikpe. Omikẹn e mẹri ikpe-ọmụma.