6 Y'e hiemẹgụọ m, welụachanrịn m alị; ẹkwan-ẹkwan kẹ m'a kwan eki e we gi;
E gikpochanrịngụọ m — bụ ẹlẹ anwụn gikpo m; m'e wuzo imẹ ọgwa ndị nke ẹnyi, a kwan nị wẹ yeni m ẹka.
Ọhọrị lẹ ẹjan e jun m ẹhụ ile, ẹtẹ lẹ ẹbụn e jun m akpụkpọ-ẹhụ.
Ụfọdụ e zuzu mẹ njọ, afụnfụn nọ bịanị wẹ;
Osolobuẹ e yeni ndị rị a dannị ẹka; o weli ndị rị imẹ nsọngbu.
M'e d'a nwụn yeni ẹkwan; m'e d'a nwụnchu yeni ẹkwan; njọ m mẹ a gụchanrịngụọ m ndụn, gụ m ndụn d'e rudẹ imẹ ọkpụkpụ.
ẹhụ ekezini m ọkụn, a nọ m kẹ sị ọwụ m mọbụ nwẹnẹ m rọ. M hụ e bu ihun a kọma alị, a kwan, nọkẹ sị m rị a kwan nnẹ m.
Obi m, kẹ ndụn rị a gụn'ị? K'ị rị e sọngbuni m? Lemẹkwọ Chuku, nị m sikọ d'a jazị a mma; ịya wụ onyẹ e yeni m ẹka; ịya wụ Chuku m.
M sị Chuku hụn wụ ọmụma e che m nche, “Kị haịn i gi zọ m? Kẹ m k'a tọnị a kwan makẹ ndị-iṅẹnrẹn rị a bịangbuni m?”
makẹni ịyụ wụ Chuku hụn m gbọnni. K'ị jụtọnị m nwan? Kẹ m k'a tọnị a kwan makẹ ndị-iṅẹnrẹn rị a bịangbuni m?
Wẹ te shitọnị m ọnyan kẹ ndụn gụgụ m; Wẹ gutọnị m mgbugbu ụzọ, kanị wẹ lẹ enwẹn wẹ a danyegụọ imẹ ẹ. Sẹla
Ndụn m gi a sụn udẹn a gụgụọ m; ẹnya-mirin m e huru elu-ukpo m kẹ uhinhin han; ẹnya-mirin e jun ihiẹn m gi firi isi.
Ẹnya e mẹ m bishi-bishi yeni afụnfụn m rị a ta. Dodo Osolobuẹ, ụhụọhịn ile kẹ m gi a kịshi ẹka elu, a rịọ ị!
M hụ a rịa kẹ achụ, e yi kẹ nduru. E lebe m ẹnya elu m gi a chọ eyemẹka, ẹnya m a chan. Euu Osolobuẹ, m rị imẹ nsọngbu, dodo d'e yeni m ẹka.”