Efesios 6:10 - Táurinakene máechejiriruwa’i ema Viya tikaijare

¹⁰ Puiti nutuparaka'eware, nuparapenaveana, ekasiñawa yátupina maye'e ema Viákenu apaesa máijaraka'e ema eta matumewa étapa eta máitupajijiasirawa.

Ignaciano

¹⁰ Puiti nutupa­ra­ca­hevare, nupara­pe­naveana, ecasiñava yátupina mayehe ema Viáquenu apaesa máijaracahe éma eta matumeva étapa eta máitupa­ji­jia­sirava.

Efesios 6:10 ပူးပေါင်းရင်းမြစ်များ

1 Corintios 16:13

Ekuneuchawa yátupina. Túme'ena'i taye'e eta juka vé'iru'i. Yátupina eta éjairawawakaina. Wa'i ekupika eta vikatajiwairana'i.

2 Corintios 13:11

Tiuri puiti, nuparapenaveana, ítatijirikawa'i. Etánukayare eta táurikeneana eta ítaresirana. Ekurisamurechakaka. Takuija'ini eta semanerena eta eye'e. Tákutikaka eta epanereruana. Máijaraka'e'ini ema Viya eta tanarasiraina eta iáchanewana, taicha tétavikawa'i eta máemunaraiwa'i ema.

Efesios 1:19

Nuwara'a ekaikutiaraware eta táetaviuchira'i eta máitupajijiasirawa'i ema Viya, wá'ikene tivitaima'i ema. Makaemataneaka'i eta vítaresira, mawaraira'i viúripanayare viti vikasiñawana'i maye'e,

Efesios 3:16

Nuyaseaka ema máijaraka'eni eti, ichapena'ini eta ítupajijiasirawa étapa eta étumewaina'ini te iáchanewana, maicha ema Machanewa Viya. Taicha ema Viya, tétavikawa eta máitupajijiasirawa, wá'iware mayawanaima'i,

Filipenses 3:1

Nuparapenaveana, ewapinawa eta makachanera'eipa ema Viákenu. Nuti, wa'i nuyakuji eta nápechirayare numetaka'e te juka néchejiriruwa'i te nájure taicha eta tiúricha'eyare eti.

Filipenses 4:13

Nurata'a'i nukamicha tamutu, taicha ema Cristo ema tétumechanu'i.

Filipenses 4:8

Títekapa, nuparapenaveana, epanerechinawayare taye'e tamutu eta yátupikeneana, taye'e tamutu eta tipikauchakareana, taye'e tamutu eta ítauraiwaya takuija taviucha'e, taye'e tamutu eta tikatajika'eyare eta íchira'i eta táurikeneana. Epanerechayarewa taye'e tamutu eta ekurisamurechira'i ema Viya, taye'eware tamutu eta tikunachakareana. Ekasamure tamutu jákani táurikeneana apaesa tikunachakareyare tamutu eta íchakeneanaya.

Colosenses 1:11

Énerichuware viyaseaka'i ema Viya máijaraka'eni eta ichapekene máitupajijiasirawa apaesa ekamicha'ini tamutu eta ekatajiwairana, apaesa ekamicha'ini muraka, iúrisamurereakawachuchaini

2 Timoteo 2:1

Pítisera némunarukene nuchicha Timoteo, nuwara'a yátupina máetumechavini ema Viákenu Jesucristo.

2 Timoteo 4:17

Émasera ema Viákenu tijaneakanu'i, tímikatakanu'i, wa'i máisapanu'ini nanakanu'ini te tapena eta sárareana tinikara'iana. Nítujikawa'i núchuka nuyana taye'e eta apanakeneana awasareana, nukametarairu'i naye'e ena apawasakeneana.

1 Pedro 3:8

Ámutu eti, ákutikaka'i eta epanereruana, ejapanukaka, émunakakaware naye'e namutu ena echamuriana, ekajira'i, mánsu'ena'i.

1 Pedro 4:11

Eti máimitureana ema Viya, eta échejisira, ekuneuchawa yátupi eta máechejiriruwana ema Viya. Eti ímikatara'iana ítatiwaka ena echamuriana, wa'i éñamaima'i eta etumewa máijararu'e'i ema Viya. Étavene'i eta é'isira'i ema Jesucristo, tamutu tauri eta jákani íchakeneana apaesa nakunacha ema Viákenu namutu ena tíma'a'eana. Ema, ¡tétavikawa'i eta makunachakarewa'i! ¡Máitawakaka'iware eta vé'isiraya ema! Amén.

1 Pedro 5:10

Ema Viya, tíchu'a'avi'i, mawara'a'i visiapa te máwasa, táichavene'i eta vé'isira'i ema Jesucristo. Ánipinesera eta ekatajiwairaya puiti juka sácheana. Émasera ema Viya, tétavikawa'i eta majapanuraiwa'i. Ema, tímararaka'e'i eta ekamichira'i; tási'a ema, tíjaraka'enapa eta ewayuchirawaya eta etúmewaya.

1 Juan 2:14

Eti átinaveana, éneichuware nímiajureka'e'i taicha tanasi'ichu iúnaka'i te esamureana eta máechajiriruwa ema Tata. Nímiajureka'e'i eti naiyanaveana taichavene eta ímatiraipa ema mainapure'i te taepaninewa'i eta juka apake'e. Étipa amaperuana nímiajureka'eware taichavene eta étumechirawa'i ejakapira'i eta máechejiriruwa ema Viya, eta te esamureana tási'a étapa eta ekapakechira ena ereanana.