Jeremia 30:19 - Iaai Bible 1901 (New Caledonia)

¹⁹ Ke ame he ka o gadra hwan ole, me hwan tavat adre me senyin: ke oge me he ka osehiʼ ödra, ke adre me ca he ka wakhalet; ke oge me he ka ogânʼ ödra, kʼ adre me ca he bi ka ûhnyûkong.

Jeremia 30:19 ပူးပေါင်းရင်းမြစ်များ

Ezera 6:22

me ânyâ senyinâ hnyi seven je bong bijeûiny areto adre ca levenâ: anyin a Iehova ame osenyini ödrin, me wia ködrin hnyekon than Asuria, me ohwegiâ je hnyamödrin hnyi huliwainy uma umen Khong, wale Khongon at Isaraela.

Nehemia 8:12

Ke ame he tavat hia he ka han me ic, me kunâ je jekhoû, me ti senyin, anyin a ödrin e wâhmakhmetoâ je hofuc adre me omanenâ ködrin.

Nehemia 8:17

Haba ûkhacaköu hia tavat adre me hmetu ûheny hnyi hna bâ, adre me ânyâ je uma menâ, me labâ je uma menâ: anyin a lakon Isaraela ödrin e ca ânyâ helâe hwân hnyi bong bongu Josua nöku Nuna ke ne o but hnyi bong ang. Ke e ti gan senyin.

Salamo 53:6

E na o but ûhomeli anyi Isaraela ûheny Ziona! E ka he Khong ka ohmeto lakeiny tavat adre bâ, Me me he Jekob ka senyin, kʼ ame he Isaraela ka hobâ.

Isaia 12:1

KE haba hnyi bong eling, me u me he ka ha, ka haba, Iehova lö, oge me he ka oleâ köu; anyin a eja ke ne u je ne hmonyin könya, me ame hwio but ânyâm hmonyin, me u je otubweli nya.

Isaia 26:15

Iehova lö, u je hia but osehiâ hnyei, u je osehia hnyei; adre hia but oganö u: u je oc ûsâkâûöâ je hnyigöuleny hnyei hia.

Isaia 27:6

Hnyi ûen ame he ka o me ame he Jekob ka hu iwân; kʼ ame he Isaraela ka vhei me vhong: kʼ ödru me he ka ounöngötâ hon hmeledrany ge ta je wan ûö.

Isaia 35:10

ke ame he ka hmetu tavat a ûcû melidra Iehova, me o hnyi Ziona me hwan khumöng; ke e hon je bödra senyin a nyiele balua: kʼ adre me he ka senyin me hobâ, kʼ ame he ka hia hlöuhlöu me mâng.

Isaia 51:11

Ke ame he ka hmetu tavat a bi hwaban melidra hnö Iehova, me o hnyi Ziona me hwan khumöng; kʼ ame he ka e bi hon ta je bödra senyin a nyiele balua: adre me he ka senyin me hobâ, kʼ ame he ka hia hlöuhlöu me mâng.

Isaia 51:3

Anyin ame hia but Iehova otubweli Ziona; e ame hia but otubwelâ je dok hia thithö unyin ae ba wan, me wia hnyebubainy me me ûcû me Edena, me iny hnyei baga me me helâ me hna belök hnö Iehova; adre me he ka wâ hnyin e senyin me hobâ, me ole, me hwan khumöng.

Isaia 52:9

Ie tha hongot senyin dö goranyai, öbun je dok ae ba wan hnyi Jerusalema: anyin a hia but Iehova otubwelâ lakeiny, e ame ûcû meli Jerusalema.

Isaia 55:5

Wâ bi, u me he ka hawâ hnyei ae ca khanö u, kʼ ame he ka wadring hotom tavat ae ca khanö u bi, ûnyi ga Iehova a Khongom, me Kabi Isaraela; anyin a e ame hia but oganö u.

Isaia 60:19

Ame ca he hmetu seûno ka hnân melamâm hnyi lany; ke ame ca he ka omelami u ge melaminy tehi: kʼ ame he Iehova ka olanyi u nyiele balua, ke Khongom a mecâm.

Isaia 60:22

Ame he ka wan thauzan bi, tavat ae wakhalet, ke ame he ka hnyei ae hwege bi, hnyei ae ûhnyûkong: oge me he, inya Iehova, ka ologotâ e hnyi ûen e.

Isaia 60:9

E hnathu, ame he je bomene ka halubahing nya, kʼ ame he ka bân je huiny Tasesa he ka hom lakom obaga ûnyi hnyi dok ae sâkâû, ke e unyidra anyidra sileva me gol, hobi kâu iö Iehova a Khongom, me Kabi Isaraela at ame ohmanenangi u.

Jeremia 17:26

Ke adre me he ka o ûnyi hnyi je tauniny Juda me je ke keihen igigilo Jerusalema, me ûnyi hnyi hnyei Beniamina, me hnyei ae tha hon, me je bucen, me ûnyi hnyi Hwaiöu, adre me hom je hudiny leû, me je hut, me je hudiny han, me libanu, me adre me he ka hom je hudiny ole, ka hnyi uma umö Iehova.

Jeremia 3:16

Ke öbun ka se hia but, me ti osehia hnyei, hnyi je bong eling, haingö Iehova, adre me ca he hmetu ka ha, ka habe, Tangen ûhihinyköu anyi Iehova: ke adre me ca he ka ûnykûme ka hnyin; ke adre me ca he ka ûnykûme gan; ke adre me ca he ka senâ e; ke adre me ca he ka ânyâ hmetu.

Jeremia 31:27

Wâ bi, ame he ka o je bong, haingö Iehova, me oge me he ka tû lap anyi Isaraela me lap anyi Juda, a je wan at, me wan meno.

Jeremia 31:4

Hluiny Isaraela lö, oge me he ka up u hmetu, me adre me he ka up u; adre me he ka ohmanenangi u ge ânyâm je bwinybet, ke u me he ka he hnyi bibiâ anyin tavat adre me senyin.

Jeremia 33:22

E ca khanʼ ödra he ka aû ta je ûnyi ethö hnyi drany, me tuluto je önyin köiö; ke helâe oge me he ka osehia je mâtrâni Davita athnyabaik, me at Levi a anyik tavat huliwa.

Ezekiela 36:37

Walang hna ha hnen Than Iehova, ka habe, Can ûnyi e, hamen lap anyi Isaraela he ka elâm unyik, he ka ânyâ hobi kodra; oge me he ka osehiʼ ödra helâ me hnahat mamoe.

Ezekiela 37:10

Me oge me perofeta helâ me hnen hna hûna könya, me ame dit hnyi hnyidrin homenâ, mʼ ödrin e möt dö, mʼ adre me tot ge cadra, a utbavat ae gan hmâ hmonyin.

Ezekiela 37:26

Ke oge me he ka ânyâ mʼ ödra ûhihinyköu ûsoköu: me ûhihinyköu a nyiele balua mʼ ödra: me oge me he ka ti ödra, me osehiʼ ödra, me ip unyidra anyik dok ae kap nyiele balua.

Zakaria 10:8

Oge me he ka hûlûhwajû ködra, me ûkhacaköu ödra anyin oge hia but ûcû melidra: ke adre me he ka si helâ me hwakecin ûsehiaidra.

Zakaria 12:8

Hnyi bong eling ame he Iehova ka söng aten Jerusalema; ke haba at ae sënyin gadra hnyi bong eling ame he ka helâ me Davita; ke ame he lap anyi Davita ka helâ me Khong, helâ me angela anyi Iehova hnyi hnyimaködra.

Zakaria 2:4

me haingen kâu, ka habe, Më wadring dö he ka ha ka hidröu eling, ka habe, Adre me he bi ka labâ Jerusalema helâ me je taun ae ba haginy, anyin ae se hia but tavat me meno hnyi wanben e.

Zakaria 8:19

Walang hna ha hnö Iehova tuhan sabaoth, ka habe. Haba hna ânyâ ca han hnyi tehi a vakiny, me hna ânyâ ca han hnyi tehi a thabûnginy, me hna ânyâ ca han hnyi tehi a seveniny, me hna ânyâ ca han hnyi tehi a teniny, me ame he ka hnân senyin me hobâ ka lap anyi Juda, me bijeû ae so.

Ioane 17:22

Ke haba hmanenang u je hia but ham könya, oge hia but ham kodra; mʼ adre me he bi ka khaca thibi, helâ me ötu a ötu khaca thibi;

I. Peteru 1:7

mʼ adre me he ka wâ hna ohnathoâ anyibun labageju ae ûnyi hnathu hon gol, ke so bi adre cubec e ge meic, mʼ adre me he ka haisoâ me ogânâ me olungâ e ka manen dut Iesu Keriso: