Jeremia 22:3 - Iaai Bible 1901 (New Caledonia)

³ Walang hna ha hnö Iehova, ka habe, Anyâ thö wisa me ûnyi ae ûcû, ke omelo thö at adre söh ûnyi hnyi hnyamen at ûöveci: ca he ka ânyâ monu, me ûokonguny ka atkanyua, me nakahme, me safac, ke ca hingâlâ dra ae ba hnyikongon hnyi dok ang.

Jeremia 22:3 ပူးပေါင်းရင်းမြစ်များ

II. Samuela 23:3

Ame ha Khongu Isaraela, Ame fuc könya kic anyi Isaraela: At ame muso tavat hnyi wisa Ame musi me outen Khong;

II. Je Than 24:4

me can minya dra ae ba hnyikongon, waleji e ame hingâlâ; anyin a e ame ounöngötâ Jerusalema ge dra ae ba hnyikongon: ke ame höcö Iehova he ka hna degecâ.

Jobu 22:9

U je hia but kunâ je safac me ba ke ûnyi, Ke adre hia but thu je benyin je nakahme.

Jobu 24:9

E hu keihen tavat ödrin e hûgûnâ nakahme ûnyi hnyi ûlainy at, Me hom hnân haten ûnyi hnyi unyin at ae theduoc:

Salamo 68:5

Haba Khong hnyi hnyaban ae kap, E thibi kamen ta je nakahme, me at owisa ka ta je safac.

Salamo 82:4

Omelo at ae sënyin me ba ta ûnyi: Thong ödra bi ûnyi hnyi hnyamen tavat ae kong.

Salamo 94:21

Adre me tha ûkhacaköu he ka okongoâ hanon at ae wisa hwakecin, Me ohnaûbangöâ dra ae ba hnyikongon.

Salamo 94:6

Adre me hlingâ safac me atkanyua, Me hlingâ ta je nakahme.

Esodo 22:21

U me ca he ka okongoâ atkanyua, me ovecâ: anyin a öbun je atkanyua hnyi hnyei Aigupito.

Esodo 22:22

Ca he ka okongoâ safac me nakahme.

Ta je Vejec 23:10

Ca oc bi hnyigöulen kâû adrem; Ke ca hnyi he ka hnyi hnyei iny nakahme:

Ta je Vejec 6:17

Bi gan, me bohmen at ame thoi, Me li hnyam ame hingâlâ dra ae ba hnyikongon;

Isaia 1:23

Tavat ûkhin fuc je tuhâm, ke lahanen tavat venöu; ödra hia thithö adre me hnyok ta je bwihlany, ka hnu hoton je hwaban: adre me ca owisa hobi kâu at a mokcu kamen, ke adre me ca oâ kodra hna ivino hobi kâu safac.

Isaia 58:6

Hawa, ca walang bi ca han oge me wek? a gʼ adre me he ka hna baûâ at adre me ca monoâ, ke thang je toiny ûnyi hnân ûhûkâlâköuâ, ke hna baûâ tavat adre me oveci ödra, ke, thamuâ je hna ûhûkâlâköuâ hia thithö.

Isaia 58:7

Hawa, ca e bi minya, he ka khenâ âm je jeû ka at ae mekihnânem, ke u me he ka hom tavat ae theduoc adre me obâ but ka hnyi hnyabam? ke u ka wâ at ame he thu mʼ u me he ka okhavâ e; ke u me ca he bi ka lubaduöng ge je liamekeiny möu.

Jeremia 19:4

Anyin adre hia but hna degeci nya me okebongonâ bi dok ang, me leû utö eang ae bo so ka ke je khong, waleji ae ca khanʼ ödra, ödra me je lakamödra me je than Juda; ke adre hia but öunöngötâ dok ang ge dra dren tavat ae ba hnyikongudrin:

Jeremia 21:12

Lap anyi Davita lö, walang hna ha hnö Iehova, ka habe, Ânyâ thö ûnyi ae wisa hnyi hnyomakatu, ke omelo thö at adre söh ûnyi hnyi hnyamen at ûöveci, wâ e nye gâ but anyik hmonyin helâ me meic ame ubâhlâ, ke ba at ama ume, can ûkongon anyibun ta je huliwa.

Jeremia 22:17

Ke haba li emâkâm me hnyekom hobi kâu hnâm hna behnyekon, me he ka hingâlâ dra ae ba hnyikongon, me hobi kâu hna okongâo, me ûokonguny, me me ânyâ thö.

Jeremia 26:16

Me ame ha hnen je taben me tavat hia ka tavat bihut me ta je perofeta, ka habe, E ca ûcû bi at ang he ka mok, anyin a e ame fuc köta hnyi iö Iehova Khonguta.

Jeremia 5:28

Ödra pipikhenya me habubut; eke, adre me beönua hnyi hulö: adre me ca ivinö, wale ivino hobi kâu at a mokcu kamen, mʼ adre me he ka sot; ke adre me ca owisa ge wisainy at ae theduoc.

Jeremia 7:23

ke wale bi ang ûnyi oge hûna kodra, ka habe, Long ju öbun hok hofuc, ke oge me he ka Khongubun, ke Öbun e he ka lakeik: ke tha vheno thʼ öbun gethen oge hûna, mʼ öbun e so.

Jeremia 9:24

ke so at ame hobâ he ka hobâ ûnyi ang, a e ame wâhmakhmeto me khana inya, a inya Iehova at ame ânyâ betenge, me owisa, me ûnyi ae ûcû eang hmeledrany: anyin a inya oge me senyin ka ta je ûnyi eling, haingö Iehova.

Je tenge anyi Jeremi 3:36

Adre ne omono at hnyi hna ivinöâ e bi, ame ca so bi ka Than.

Ezekiela 18:12

ke a hia but iyawâ at ae vec me at ae theduoc, ke hûgûnâ omjeû, ke ame ca ohmeto haten, ke ame hia but bwele göranyai ka je idola, me ânyâ ûnyi ae ikiki,

Ezekiela 18:7

ke ame ca iyawâ ke at, ke ame ohmetoâ haten ka at ame me hom omjeû gan, ke ame ca hûgûnâ ta je ûnyi anyin ke at, ke ame hûn at ae mekihnânem, ke ame okhavâ at ae ba ûkhaû:

Ezekiela 22:7

Ödrin e ca hia but oûnyihnathoâ je kamen me hinyen unyâm; ödrin e hia but seda atkanyua hnyi wanbâm: ödrin e hia but okongoâ at a mokcu kamen, me je safac unyâm.

Ezekiela 45:9

Walang hna ha hnen Than Iehova, ka habe, Je than Isaraela lö, soju; degec ut öbun ûokonguny, ke sei, me anyâ thö ûnyi ae ûcû me ûnyi ae wisa; ohia ju hnobun hna musi hwege hon lakeik, haingen Than Iehova.

Joela 3:19

Ame he ka ba wan Aigupito, ke ame he Edoma ka hnyebuba ae ba wan, can hna ovecâ lakon Juda, anyin a adre hia but hingâlâ dra ae ba hnyikongon hnyi idrin hnyei.

Levitiko 19:15

Ca he öbun ka ânyâ hwali hnyi owisa: u me ca he ka wâhmakhmetoâ at ae ba ta ûnyi, me ogânâ at ae tren omjeû: ke hamâm he ka owisa at ame laba hakekenyi u hnyi wisa.

Amosa 5:15

Hûkotiâ thö hulo, ke hnyok bi ka so, ke otilâ hmâ ju wisa hnyi homagoule: me ame he la Iehova Khongon sabaoth ka betenge ge je kolon ga Josefa.

Amosa 5:24

Ke so ame di hna owisa helâ me köiö, me hwakecin ae wisa helâ me wagewe ae hwege.

Mika 3:11

Ke haba je homakan, me adre me owisa hnân hwaban, kʼ ame ûne tavat bihut ge hwaban, kʼ ame bi kong hnen je perofetainy ge mone: ke so bi hwakecidra he ka labageju kö Iehova, me ha, ka habe, Hawa ca Iehova hnyi wanböta? ke ba ûnyi ae kong ame he ka o köta.

Mika 6:8

At lö, e ame hia but omanenâ köu ûnyi ae so ke ie ke ûnyi ame we Iehova gam, ke so bi he ka ânyâ wisa, me hnyokâ ibetengiö, me tha he me Khongom ke hnyok ae hnyikânâ?

Malaki 3:5

Ke oge me he ka hakekeny köbun he ka owisa; ke oge me he ka ie omanenâ at ae tren khong, me tavat bi ûnyi monu, me tavat khemanyin thoi; me tavat ovecâ at ame huliwa ge hwaban e, me safac, me nakahme, me tavat ohavâ wisa ka atkanyua, me ca outö nya, haingö Iehova tuhan sabaoth.

Mataio 23:23

Ekölö gabun hnyat sihnalimen me ta je Faresaio hnyat thoi hnyok! anyin a öbun e ham ke hanen a libenyitainy minet, me aneto, me komina, ke öbun e hia but hna biju ta je ûnyi ae gan hnyi hnanyibu, wale hna owisa, me ibetengiö, me labageju: e ûcû öbun e ânyâ ta je ûnyi e, ke ca hna bi ta je ûnyi eang.

Deuteronomi 10:18

E ame owisa hobi kâu nakahme, me safac, kʼ ame betenge ge atkanyua, me han, me okhavâ.

Deuteronomi 24:17

U me ca he ka ohwalö hna owisa ka atkanyua me nakahme; me hom ûkhaûen safac hnân haten:

Deuteronomi 24:7

Adre me ne wâ ke at ame venâu liamekeiny mē a at Isaraela, ke ame ânyâ kâu helâ me ka at adre ûco, me ûco bi; awe ame he ka mokcu at venöu eling: helâe u me he ka ohia hulö unyâm.

Deuteronomi 25:1

A NE hu ivinö anyin tavat, kʼ ödrin e hom ka hnyi hna owisa, kʼ adre me owisa ködrin; me adre me he ka haisoâ at ae wisa, me hangâ at ae kong;

Deuteronomi 27:19

Hnaûhangö at ame ohwalö hna owisa ka atkanyua, me nakahme, me safac. Kʼ ame he tavat hia ka ha, ka habe, Amen.

Iakobo 1:27

Walang hwakecin hmi ae kalaöt me ba hnyikongon hnyi hnyimakan Khong a Kamen, ka habe, he ka senâ je nakahme me je safac hnyi anyidra vec, me hamen he ka tuö e, me me ca hu hnyikongon hnen hmeledrany.