Isaia 9:6 - Iaai Bible 1901 (New Caledonia)

⁶ Anyin adre me hnokoâ hobi köta wanakat, kʼ adre me ham köta da; ke ame he ka e bi hon bajebenyin musi; ke adre me he ka hwenyi ien e, Hnân lâiâ, me At ame obongon, me Khong ae man, me Kamen a nyiele balua, me Thaniny ûsoköu.

Isaia 9:6 ပူးပေါင်းရင်းမြစ်များ

II. Samuela 7:13

Me e ame he ka otilâ uma hobi kâu iök, me oge me he bi nya ka ohmâ theroniny dokhon dökhu nyiele balua.

II. Samuela 7:16

Ke adre me he ka otilâ hmâ ânyâm lap me dokhom dökhu hnyi hnyimâkâm nyiele balua: adre me he ka ohmâ ânyâm theron nyiele balua.

I. Je Than 10:9

Ole kö Iehova Khongom, at ae weny u, he ka otilö u hon theroni Isaraela: anyin a Iehova ame betenge ka at Isaraela nyiele balua, anyin a wale e ame otilö u ka than, he ka ânyâ wisa me ûnyi ae ûcû.

I. Je Than 2:33

Ke ame he hmetu drödru ka mokut hon bö Joab me hon ban je mâtrâniny nyiele balua: ke ame he ka hu hnahic ûnyi ga Iehova nyiele balua kö Davita, me je mâtrâniny, me anyin lap, me anyin theron.

I. Je Than 2:45

ke ame he Solomona than ka hnahic, ke ame he ka tet hmâ theron anyi Davita hnyi hnyimakö Iehova nyiele balua.

Nehemia 9:32

Ke walang ang Khonguhmun lö, at ae gan, ke at ae hwege, a Khong hnân outen, at ame tuö ûhihinyköu me ibetengiö, e na ca he ka ûnyi baû hnyi hnyimâkâm ta je vec hia ame o kohmun, ka latuhöhmun, me anyihmun je than, me tavat bihut unyihmun, me anyihmun je perofeta, me lakamöhmun, me lakem hia, hwân hnyi bong bongon je than Asuria ke ne o but hnyi bong ang.

Salamo 45:3

At ae hwege lö, weikâ ju ânyâm hele vat hon jevam, Wale ânyâm hmanenang me bongon than gam.

Salamo 45:6

Khong lö, e bi ânyâm theron nyiele balua: Uci ae wisa uciny dokhom dokhu.

Salamo 45:7

U je hia but hnyok ka hwakecin ae wisa, me ikiki ge hwakecin ae kong: Anyin a wale Khong a Khongom ame hia but hû u Ge wakacoiny senyin hon je lahanâm bi.

Salamo 50:1

HABA Khong, a Khong Iehova ame hia but fuc, Me hawâ hmeledrany ûnyi hnyi hna o hnen seûno ke ne o but hnyi hnen hna dit.

Salamo 72:17

Amo he ka tethmâ ien nyiele balua; Kʼ ame he ka e bala bi e ka tiga hu seûno ethö: Ke ame he ka hnahic tavat ûnyi gan; Ame he ta ogo hnyei hia ka ha a e ame senyin.

Salamo 72:3

Ame he ta je bucen ka okûâ ûsoköu hobi kâu tavat, Me je dok minya ae hut, hnen hwakecin ae wisa.

Salamo 72:7

Hnyi bonginy ta je bong ame he at ae wisa ka kû khulelau; Kʼ ame he ka gan hmâ ûsoköu ke ne o but ame aû but tehi.

Salamo 85:10

A ûkhanö thö ibetengiö me hnathu; A ûcimhnyimak dö wisa me ûsoköu.

Salamo 89:5

Iehova lö, ame he ta je drany ka olungâ ânyâm ta je ûnyi hnân lâiâ; Me ânyâm hnathu minya hnyi ûkhacaköu anyin wakap.

Ta je Vejec 8:23

Adre otilö nya kâû adrem bala, hnyi hwân, Hnyi ûen ae tiga ba bi hmeledrany.

Isaia 10:21

Ame he ka hmetu ke kolon, wale kolon unyi Jekob, ka Khong ae man.

Isaia 11:5

Ke wen hnyekon hwakecin bi ae wisa, ke wen fetriny hwakecin bi ae hnathu.

Isaia 16:5

Ke adre me he ka otilâ ke theron hnyi ibe-tengiö, kʼ ame he ka tabâ e ke at hnyi hnathu, hnyi uma mano umo Davita; he ka owisa, me elâm hna owisa, me logot he ka ânyâ wisa.

Isaia 26:12

Iehova lö, u me he ka otilâ ûsoköu hobi kohmun: anyin a u je hia but ânyâ hobi kohmun anyihmun ta je huliwa hia thithö.

Isaia 26:3

U ma he bi ka tuö hnyi hnahic ie bekhot at ame tethmâ hnyok unyâm: anyin a e ame labageju köu.

Isaia 28:29

Ame o minya ûnyi ga Iehova tuhan sabaoth, at ae khana bongon hnân lâiâ, ke e gan hmâ anyin metâ.

Isaia 32:1

WÂ bi, ame he ke than ka musi hnyi hwakecin ae wisa, kʼ ame he je taben ka owisa hnyi hna owisa.

Isaia 37:32

Anyin ame he ka he ûheny Jerusalema ta je kolon, kʼ ame he ka he ûnyi hnyi bucen Ziona tavat adre me he ka möt: ame he ka ânyâ e ge weny ae gan ga Iehova tuhan sabaoth.

Isaia 53:10

Ke so bi e ûcû kö Iehova he ka thu hwetö e; e ame hia but ohlöuhlöuâ e: ke u ka he ka hudo e hnân hudiny hulo, me e ame he ka wâ je mâtrân, e ame he ka osehia bongon je bong, ke haba we Iehova ame he ka sot unyin.

Isaia 53:2

Anyin a e ame kû tot hnyi hnyimakan helâ me bâtân, ke helâ me wân ûnyi hnyi kânâ ae atgec: e ba anyin hmanenang, ke ba meciny; ke ate me wâ e, me ba hmanenang gan mʼ ate me he ka weta.

Isaia 53:5

Ke so bi e ame aat dö can hnöta ta je hna hanyâûâ, kʼ adre me khaû e can hwakecita ae kong: adre me ip hon e je hna kot mʼ ate me hnahic bi, ke öta metu but can hna khûâ hnân.

Isaia 63:16

Anyin a u kamöhmun, eja ke ne a ne ca ö ʼhmun Aberahama, ke ca khanö Isaraela öhmun: Iehova lö, u thibi kamöhmun; at a ûcû öhmun hwân nyiele, wale iâm.

Isaia 66:12

Anyin a walang hna ha hnö Iehova, ka habe, Wâ bi, oge me he ka inâ hnahic kâu helâ me wagewe, me hmanenanginy je hnyei helâ me di ame bahihingölö, ke öbun e he ka ic; adre me he ka abiny öbun, me jijingʼ öbun hon li jevan.

Isaia 7:14

Anyin a wale, ame he Than ka ham köbun haten; wâ bi, ame he hlu ka erkin, me hnokoâ da, me hwenyi ien e Emanuela.

Isaia 8:18

Wâ bi, haba inya ke lakuk a ham könya Iehova, me hnân je haten ke hnân lâiâ hnyi Isaraela ûnyi ga Iehova tuhan sabaoth, at ame laba hnyi bucen Ziona.

Jeremia 31:22

Ke ne o but kehö u me he ka he monu, u hlu ame labö kolu? anyin a Iehova ame hia but op ûnyi ae teb ûnyi hnyi hnyei, ame he momo ka ton ge baga.

Daniela 2:44

Ke haba hnyi je bong bongon je than eling, me ame he Khongon drany ka oâ ke dokhu a gʼ adre me ca he ka ohia nyiele balua, ke adre me ca he ka hna dokhu eling ka ke hnyei; ke e ame he ka kot omomono me ohia ta je dokhu hia eling, ke e ame he ka tethmâ nyiele balua.

Daniela 7:14

Ke adre me ham kâu musi, ke hmanenang, ke dokhu, me me he tavat hia, ke ta je hnyei, ke je ve hwen hnyei ka bi athnyabainy: ke haba anyin musi, me musi ae tethmâ, kʼ ame ca he ka hia; ke haba dokhon dokhu, me adre me ca he bi ka ohia.

Hagai 2:9

Ame he bi ka gan hmâ hmanenanginy uma eang a biliny hon uma a bân, haingö Iehova tuhan sabaoth: ke oge me he ka ham ûsoköu hnyi dok ang haingö Iehova tuhan sabaoth.

Mataio 1:1

TUSI hnân aû je dö anyi Iesu Keriso, mâtrâni Davita, mâtrâni Aberahama.

Mataio 1:23

Wâ bi, ame he hlu ka erkin, me hnokoâ da, Kʼ adre me he ka hwenyi ien Emanuela; walang bongon, E but unyita Khong.

Mataio 11:27

A hia but Cica ham könya ta je ûnyi hia: ke ba ke at ame wâhmakhmetoâ Nokon, ke Kamen thibi; ke ba at ame wâhmakhmetoâ Kamen, ke Nokon thibi, me at minya ame weny Nokon he ka omanenâ kâu.

Mataio 28:18

Me haba Iesu ame o but ködrin me ba hofuc ködrin, haingen, ka habe, Adre hia but ham könya musi hia hnyi drany me eang hmeledrany.

Luka 1:35

Ke haba angela ame thu me ha kâu, ka habe, Ame he ka o köu Hanu Kap, me ame he ka tungi u hnen man maniny Beönua: anyin a wale adre me he ka hwenyi ien at adre me he ka hnokoâ, me kap; a Nokon Khong.

Luka 2:11

anyin adre hnokoâ hobi köbun hnyi bong ang hnyi taun anyi Davita, At ûhomeli, wale Keriso a Than.

Luka 2:14

Ogânâ thö Khong ae nua ethö görany; Ke haba hnyi hmeledrany hnahic unyin tavat wale e ame betenge gadra.

Luka 21:15

anyin oge me he ka ham köbun hnyem me metâ, me me ca khana iwahnaihmiony möbun he ka ûkhin fuc möbun me ton.

Ioane 1:14

Adre me bi unyin Logo bi, kʼ ame laba unyita (ke ohmun e wâ but anyin hmanenang, wale helâke me hmanenanginy Nokon a khaca a hnokoâ hnen Kamen), a unöngöt do ge ibetengiö bâu me hnathu.

Ioane 1:16

Eke, ate me hia but ve kap jekhoû ûnyi hnyi anyin unöngöt, wale betenge bâu ke betenge bâu.

Ioane 14:27

Oge me ip hnahic unyibun; oge me ham köbun anyik hnahic: oge me ca ham köbun helâ me hna ham hnen hmeledrany. Ca hlohlo je hnyekubun, ke ca ot bi.

Ta je huliwa 10:36

Haba hofuc waleji e amo kunâ ka lakon Isaraela, kʼ ame khetâ ûthumetu ae so hnyi ûsoköu a deny Iesu Keriso, (e thibi Tuhan ae nua)—

Ta je huliwa 20:28

Anyin a wale, o ʼbun âu, ke hnahat mamoe hia, wale hnen Hanu Kap hnaʼ otilʼ öbun he ka tuö, he ka hat ekalesia anyin Khong, waleji e ame ûco ge dren.

Roma 8:32

Hawa, ame ca he ka ham bâûâ köta ta je unyi hia, hnen at ame ca behânâ Nokon, kʼ ame hna but e hobi köta hia?

Roma 9:5

ödra je mâtrâniny ta je lakamöta, helâe minya Keriso hoton unyin, e nua hon ta je ûnyi hia thitliö, Khong adre haisoâ nyiele balua. Amen.

I. Korinito 1:30

Ke ûnyi gan öbun hnyi Keriso Iesu, at adre wia köta ûnyi ge Khong hnân metâ, me hwakecin ae wisa, me kap, me hnân möt:

I. Korinito 15:25

Anyin ae ûca kâu he ka musi ke ne o but a hia but ip hmelen li can ta je iwahnaihmiöny më hia.

II. Korinito 5:19

waleji, a e unyin Keriso bi Khong, ame öûsoköuâ hmeledrany më, kʼ ame ca ip hnödra je hna hanyâûâ kodra bi, ke ame ham kohmun hofucin ûsoköu.

Deuteronomi 10:17

Anyin a haba Iehova Khongubun, me Khongon je khong, me Thaniny je than, e Khong ae gan, me man, me hnân outen, kʼ ame ca wâhmakhmetoâ at, kʼ ame ca kap hwaban.

Kolose 2:3

at adre ikhâlâ unyin ta je omjeûiny hia metâ me wâ ûnykûme.

I. Timoteo 3:16

Ke ca hnân ivinoâ, ka habe, e gan hmâ ûiyonginy hwakecin ae ûcû me Khong, ka habe, E ame manen dut hnyi unyin, ame haiwisa hnyi hanu, ame wâ hnen ta je angela, adre me khetâ hnyi ta je hnyei, adre me labageju kâu hnyi hmeledrany, adre me kap goranyai ka hnyi hmanenang.

Tito 2:13

me halubahingen geju ae hnahic, me he ka manen dut hmanenanginy Khonguta ae beönua me At omeli öta Iesu Keriso;

Heberu 1:8

ke e ame hâiâ Nokon, ka habe, Haba ânyâm theron, Khong lö, me nyiele nyiele balua; Ke haba uciny hwakecin ae hnathu, me wale thibi e uciny dokhom dokhu.

Heberu 13:20

Ke haba Khongon ûsoköu, waleji at ame hom hmetu but Tuhöta Iesu ûheny hnyi hna mok, wale at ae nua ame tuö ta je mamoe, hnen dren ûhihinyköu a nyiele balua,

I. Ioane 5:20

Ke e khanʼ öta a gʼ ame hia but o Nokon Khong, ke a hia but ham köta hna wâhmakhmeto, me me khanʼ öta e at ae hnathu, ke öta but eû hnyi hnyekon at ae hnathu, wale eû hnyi hnyekon Nokon a Iesu Keriso. Wale Khong ae hnathu, me möt ame ca ba balua.

Hna Omanenâ 19:16

Ke e ame khavâ khaûen, ke adre set ke ien hnyi jevan, ka habe, TUHAN TA JE TUHAN ME THANINY TA JE THAN.

Owisa 13:18

Me ame ha angela anyi Iehova, ka habe, Anyin a ieû u me hnö iök, anyin a e me hnân lâiâ gan?