Isaia 11:9 - Iaai Bible 1901 (New Caledonia)

⁹ Adre me ca he ka ovecâ me okongoâ hnyi anyik bucen hia ae kap: anyin ame he ka unöngötö hmeledrany ge wâ ûnykûme ga Iehova, helâ me köiö ame tube taben köiö ae gan.

Isaia 11:9 ပူးပေါင်းရင်းမြစ်များ

Jobu 5:23

Ke ame he je vetoiny hnyei ka tha hien möu; Ke ame he ka ûsoköu möu ta je menoiny hnyot.

Salamo 72:19

Ke so adre haisoâ ien ae hmanenang nyiele balua; Ke so e unöngöt hmeledrany hia thithö ge anyin hmanenang. Amen me Amen.

Salamo 78:54

Ke e ame hum ödra ka hnyi baten anyin dok ae kap, Wale becen ang, a ûco hnen hnyamen a metân.

Isaia 11:13

Ke ame he ka hia ciâ anyi Eferaima, ke adre me he ka subâ degecâ tavat adre me oveci Juda: ame ca he Eferaima ka ciâ ga Juda, kʼ ame ca he Juda ka oveci Eferaima.

Isaia 11:8

Ke ame he wanakat ame i ka walak hon hwanumen asip, kʼ ame he wanakat adre hnebaio ka ip hnyamen hon hâûen vaipa.

Isaia 2:4

Ke e ame he ka owisa ge ta je hnyei, me nâ je hnyei ae se: ke adre me he ka kokot anyidra je hele vat, me me hnân bi hwio kânâ, me dödra je ö hnân je bâlet adre dela kâu vine: ame ca he ke hnyei ka nang hele vat ka kot ke hnyei, ke adre me ca he hmetu bala he ka nâ vat.

Isaia 30:26

Ke ame he melaminy tehi ka helâ me melaminy seûno, kʼ ame he ka oseven melaminy seûno, helâ me melaminy je bong a seven, hnyi bong ame he Iehova ka lan aat ge lakeiny, me ometo aat a je hna dʼ ödra.

Isaia 32:16

Me ame he wisa ka laba hnyi hnyebuba, ke ame he hwakecin ae wisa ka laba hnyi hnyei belök.

Isaia 33:6

Ke ame he ka hu hwakecin ae tethmâ hnyi bongom ta je bong, wale ûhomeli ae gan, me metâ me wâhmakhmeto: haba tang omjehen bi, me ot kö Iehova.

Isaia 35:9

Ame he ka ba liona eling, ke ame ca he ka he kâe meno ame ûhûlû, adre me ca he ka wâ e eling: ke ame he tavat adre ûcû melidra ka vheno e:

Isaia 45:6

me me khanʼ ödra hwân hnyi hna o hnen seûno, me ûnyi jimeû, ae ba ju ke at, ke hake inya thibi: inya Iehova ke ba ju ke at.

Isaia 49:6

eke, haingen, ka habe, E ti hâhâ a u me he ka bi athnyabaik he ka ogöranyâ je tribu anyi Jekob, ke ohâtâ hmetu hnyat adre tuö a at Isaraela: me oge me he bi minya he ka hnö u hnân melaminy ta je Ethen, ke hnân anyik ûhomeli ka hnyi can hmeledrany.

Isaia 52:10

A hia but Iehova vhec ûkhaûen benyin ae kap hnyi hnyimakan je hnyei hia; ke ame he je can hmeledrany hia ka wâ ûhomeli anyin Khonguta.

Isaia 54:5

Anyin a âiâm bi at a up u: haba ien, me Iehova tuhan sabaoth: ke haba at a ûcû melam, me Kabi Isaraela; adre me he ka hawâ e me Khongon hmeledrany hia thithö.

Isaia 56:7

oge me he ka hom tavat eling ka hnyi anyik bucen ae kap, me osenyini ödra hnyi uma hnân hic könya; ke haba anyidra je hut adre le, ke anyidra je hut, adre me he ka kap hon tabök tap: ke adre me he ka ha ge umök uma, ka habe, ae uma hnân hic hobi kâu ta je hnyei hia thithö.

Isaia 59:19

Me adre me he ka outen iö Iehova ûhedra jimeû, me outen anyin hmanenang ûhedra hnyi hna o hnen seûno: anyin a e ame he ka o helâ me wagewe ae hwege, wale ame tûâ hnen; homenö Iehova.

Isaia 65:25

Ame he bi luko ka tha han me nokon mamoe, ke ame he liona ka han thatûnyin hwit helâ me bolok: ke haba sesâiny kânâ, me wale an ta je on. Ke adre me ca he bi ka okongo me ohia hnyi anyik bucen hia ae kap, haingö Iehova.

Isaia 66:18

Anyin ae khanö nya hnödra hna ânyâ, me je ûnykûmenödra: ame o thö ûen, me oge me he ka ûkhacaköuâ ta je hnyei hia thithö, me je hwen hnyei; ke adre me he ka o but, me wâ anyik hmanenang.

Isaia 66:20

Ke adre me he ka hom je liamekeiny möbun hia thithö ûnyi hnyi ta je hnyei hia thithö hnân hut kö Iehova, hon ta je hors, me ta je kariota, me hon je tap, me je miul, me hon je meno adre me he logot, ka hnyi anyik bucen ae kap a Jerusalema, haingö Iehova, helâ me lakon Isaraela adre me hom bwihlany hnyi kaia ae kalaöt ka hnyi uma umo Iehova.

Jeremia 31:23

Walang hna ha hnö Iehova tuhan sabaoth, Khongu Isaraela, ka habe, Adre me he hmetu ka ha hofuc ang hnyi hnyei Juda, me je tauniny, iny ka he ka ohmetu ödra ûhedra hnyi hna bâ me ha, ka habe, Hnyaban hna owisa lö, me bucen ae kap, E so e he Iehova ka ohnahici u.

Jeremia 31:34

ke adre me ca he hmetu ka ve nâ tavat ae hakekeny kodra, me je liamekeiny mödra, me ha, ka habe, Khanʼ öbun dö Iehova: anyin adre me he hia ka khanʼ ödra inya, hwâu ge ta je hoûmonu ke ne o but ka tavat ae beönua, haingö Iehova: anyin oge me he ka hna but hwakecidra ae kong, ke oge me ca be hmetu ka ûnykûme anyidra ta je hulo.

Ezekiela 34:25

Ke oge me he ka ânyâ ûhihinyköu ûsoköu mʼ ödrin, ke oge me he ka ohia ta je meno ae kong ûnyi hnyi hnyei: ke adre me he ka laba khotkic hnyi hnyebuba, ke mokut hnyin hnyi hnyot.

Ezekiela 47:5

Ke hwaban dö e e ame tuluto khaca thauzan; me wale wagewe but, me ca khanö nya hmetu he ka vheno: anyin ame khibi thö göranyai köiö, a köiö hnân hai hnyin, wagewe a ca hnân vheno.

Daniela 11:45

Ke e ame he ka otilâ je uma manoiny hnyaban hnyi wanben köiö me bucen ae hmanenang ae kap; ke ame he ka o obiny kâu, ke ba at ame he ka hadruâ e.

Daniela 12:4

Ke haba u Daniela lö, ikhâlâ ju je hofuc, me ohmâ ju haten tusi, ke ne o but hnyi ûen obiny: kʼ ame he tavat ae se ka wadring ehele, me ame he metâ ka gan tot.

Hosea 2:18

Ke hnyi ûen eling oge me he ka ânyâ ûhihinyköu hobi ködrin me je menoiny hnyot, me je meno ame gâ ethö, me je meno ame iyawâ kânâ: ke oge me he ka thu cafana me hele vat, me vat ûnyi hnyi hnyei, ke oge me he ka omokulic ödrin hnyi sot.

Joela 3:17

Me öbun e he ka wâ a inya Iehova Khongubun, at ame laba hnyi Ziona, anyik bucen ae kap: me ame he ka kap bi Jerusalema, ke ame ca he hmetu ta je atkanyua ka vheno e.

Habakuka 2:14

Anyin ame he ka unöngöt hmeledrany ge hna wâhmakhmetoâ hmanenangi Iehova, helâ me köiö ame tube je taben e.

Zakaria 14:9

Ke ame he Iehova ka Thaniny hmeledrany hia: hnyi bong eling ame he Iehova ka khaca thibi, ke khaca thibi ien.

Zakaria 8:3

Walang hna ha hnö Iehova, ka habe, Oge me laba hmetu hnyi Ziona, ke oge me he ka laba hnyi wanben Jerusalema: ke adre me he ka hwenyi ien Jerusalema, me Taun ae hnathu; kʼ adre me he ka hwenyi ien bucen anyi Iehova tuhan sabaoth, ka habe, Bucen ae kap.

I. Thesalonika 5:15

Ca he ke at ka bi hwaban monu ge monu ka ke at; ke hnu bala hoton so unyibun bi, me tavat hia.

Hna Omanenâ 21:27

ke ame ca he ka hnyi dit kâe ke ûnyi ae kong, me at ame ânyâ ikiki me thoi: ke hake ödra thibi tavat adre sihnalimidrin hnyi tusi anyin Arenio a tusiny möt.