Hosea 9:4 - Iaai Bible 1901 (New Caledonia)

⁴ Adre me ca he ka hingâlâ waina kö Iehova, ke e ame ca he ka senyin kodra: haba anyidra je hut e ûcû me han anyin tavat adre me hnyamok ködrin; adre me he hia ka kong tavat adre me an e: anyin a haba ö ʼdra jeû me hnân behan bi, ke ame ca he ka o ka hnyi uma umo Iehova.

Hosea 9:4 ပူးပေါင်းရင်းမြစ်များ

Esodo 29:40

ke haba ke keihen a libenyitainy bath salawa adre ûhaniken me tap wakaco adre kokot a ke keihen a vakiny hin; me tap waina minya a ke keihen a vakiny hin hnân hudiny ic, tha e me nokon mamoe.

Esodo 40:23

Ke e ame ip gaga je areto hon e hnyi hnyimakö Iehova; helâ me Iehova ame hûna kö Mose.

Isaia 57:6

Haba jekhom, me eû hnyi hnyigöulen bucen hnyi wanben je veto ae haûhaû; wale, wale bi hna khenâ köu: u je hia but hingâlâ hudiny ic bi kodra me bi hut. Hawa, oge me he ka hna baûâ ta je ûnyi e?

Isaia 66:3

Haba at ame hlingâ bolok, me ame helâ me at ame hlingâ at; haba at ame hudo nokon mamoe, me ame helâ me at ame thu nyin kuli; haba at ame hudo bwihlany, me ame helâ me at ame hudo dren buaka; haba at ame leû libanu, me ame helâ me at ame hahnahicâ hnatheat: eke, adre hia but ûca dedra bi je gethen, ke ame senyin je hanudrin hnyi anyidra bi ta je ûnyi ae ikiki.

Jeremia 16:7

ke ame ca he tavat ka tha subö areto hnyi tenge gadra wale hnân otubweli ödra ge je komok; kʼ ame ca he tavat ka ham kodra kaia ka habelidra hnân otubwelâ ge kamödra me hinyödra a mokcu.

Jeremia 6:20

Hnân eû könya libanu adre me oâ ûheny Sheba, me ûö ae hnebwia ûnyi hnyi hnyei ae sâkâu? oge me ca kap soâ je hudiny anyibun leû, ke oge me ca senyinâ anyibun ta je hut.

Ezekiela 24:17

Mâng ju ke ca hwege; ca he bi ka hnyamok, wano ju hnabicom, ke inâ ju li tangen hnyeûcam, ke ca tube li esongodâm, ke ca an ju jeû an tavat.

Ezekiela 24:22

Ke öbun e he ka ânyâ helâji me hnok hna ânyâ: öbun e ca he ka tube je esongodibun me an jeû an tavat.

Daniela 1:8

Ke e mou hnyi hnyeku Daniela a gʼ ame ca he ka okongoâ e hnen jeu than, ke waina a belen: anyin a wale e ame sumâtâ tuhan je eunuka, me me ca ka hamen bi okongoâ e.

Hosea 3:4

Anyin ame he lakon Isaraela ka laba thibi hnyi se hia je bong ke ba than, ke ba taben, ke ba at bihut, ke ba veto ame tot, ke iefoda ke hnatheat:

Hosea 7:16

Adre me hmetu ke ca kâu bi ethö gorany; ödrin ûcû me cafana ae iyawo; kʼ ame he anyidra je taben ka ta ge hele vat can ae hwege ifucidra: wale hnân hlumʼ ödra hnyi hnyei Aigupito.

Hosea 8:13

Ke haba je bwihlany adre me hudo könya, adre me hudo utiö me an e; ke ame ca he Iehova ka kop ödra: e ame he walang ang ka ûnykûme anyidra hulo, me bi hwaban hwakecidra ae kong; adre me he ka hmetu Aigupito ai.

Joela 1:13

Tavat bihut lö, oweikʼ öbun ju, ke tenge; tavat huliwan taben hut lö, kuku tenge thö; lathnyabainy Khonguk lö, ai öbun, mokut hnyi lit hia hnyi mano ae gan nân: anyin ae ba hmetu hudiny han me hudiny ic hnyi uma umen Khongubun.

Joela 1:9

Adre me subâ degecâ hudiny ban me hudiny ic ûnyi hnyi uma umo Iehova; kʼ ame tenge tavat bihut a lathnyabai Iehova.

Joela 2:14

E khanö ia, a gʼ ame ca he bi ka hmetu me ietra, me ip bi hnahic hwaban, wale hudiny han ke hudiny ic hobi kö Iehova Khongubun.

Levitiko 17:11

Anyin a e hnyi dra melen unyin: ke oge hia but ham e köbun hon taben hut, me me bi hwaban anyibun möt: anyin a haba dra, me, wale at ame bi hwaban möt, anyin ae hu möt hnyin.

Levitiko 21:17

Ha thö kö Arona, ka habe, Ame ne hu mâtrânâm hnyi anyidra je dö ae hu hnyikongon unyin, me e ame ca he ka hakekeny he ka hnyi hudo an Khongon.

Levitiko 21:21

e ba at hnyi je mâtrâni Arona at bihut, ame he ka hakekeny ka hudo je hut a an hnen meic kö Iehova a ne hu hnyikongon unyin: e at ae hu hnyikongon; e ame ca he ka hakekeny he ka hudo an Khongon.

Levitiko 21:6

Odrin hnyat ae kap ka Khongudrin, ke odrin e ca he ka okongoâ ien Khongudrin: anyin a odrin e hudo je hut a an hnen meic kö Iehova, a an Khongudrin: anyin a wale odrin e he ka kap.

Levitiko 21:8

Ke u me he ka okabi odrin: anyin a odrin hnyat hudo an Khongom: odrin hnyat ae kap köu: anyin a inya Iehova ae kap at ame okabi öbun.

Amosa 5:22

Eke, öbun e ne hudo könya anyibun je hudiny leû me hudiny han, me oge me ca he bi nya ka kap: ke oge me ca he ka wâ anyibun je hudiny ûsoköu a halebun je meno ae pipikhenya.

Malaki 2:13

Ke wale minya ang hnobun hna ânyâ: öbun e tube taben hut anyi Iehova ge dân ecmak, me tenge, me mâng, me me ca wâ hmetu hut, me ca kap senyinâ e ûnyi gabun.

Numera 19:11

Haba at ame kâlâ komok, me e ame he ka bo kong hnyi seven ta bong:

Numera 28:2

Hûna thö ka lakon Isaraela me ha ködra, ka habe, Haba hut könya, wale jeû hobi kâu je hut a an hnen meic me me bo so könya, me wale ûnyi öbun e he ka tuö he ka hudo könya hnyi je ûen adre thu.

Numera 4:7

Ke adre me he ka ulolo imano ae udrudrâ hon laulau areto hnân omanenâ, me ip hon e je mini, me je spun, me je utkaia, me je kaia hnân hingâlâ: ke ame he ka hnen hon e areto ae bala bi:

Ioane 6:51

Inya ang areto ae möt ame utut ûheny hnyi drany: a ne an dö ke at areto eang e ame he ka möt nyiele balua: eke, ke haba areto oge me he ka ham me wale unyik, hnân malen hmeledrany.

Deuteronomi 26:14

oge me ca hia but han ûnyi hnyin hnyi ûen oge me tenge, me hom ûnyi hnyin iny ka bo kong, me ham ûnyi hnyin hobi kâu je komok: oge hia but löng hoton hofuc ho Iehova Khonguk, oge hia but ânyâ hia hoton hnâm hna hûna könya.