At Khet 5:1 - Iaai Bible 1901 (New Caledonia)

¹ TUÖ ju li cam u ka he ka hnyi uma umen Khong; anyin ae so he ka hakekeny dö he ka long, hon he ka hudo bi hut anyin at ae monu.

At Khet 5:1 ပူးပေါင်းရင်းမြစ်များ

II. Man Ûlabainy Je Than. 26:16

Kʼ a hwege but e, me ame bi gan hnyekon, me e ame ânyâ ûnyi ae kong, anyin a e ame hanyâûâ hnanyibu anyi Iehova Khongon; anyin a e ame dit ka hnyi uma umö Iehova he ka leû utö ae bo so hon taben leû utö ae bo so.

Jobu 11:2

Hawa, adre me ca he ka thu hmetu ta je hofuc ae se hia? Adre me he bi ka hawisa at ame unöngöt ge je hofuc?

Jobu 22:12

Hawa, ame ca laba Khong ethö hnyi göranyin drany? Ke wâ bi ûgöranyin je okhû, e ti gorany hmonyin!

Salamo 89:7

Wale Khong adre outen hnyi ûkhacaköu anyin wakap, Me hnân outen hudra hia adre me laba igigilö e?

Esodo 3:5

Ke ame thu, ka habe, Ca hakekeny bi kââng: uny jut taben li hnyeûcam ûnyi hnyi li cam, anyin a haba dok e u me tot hnyin, me, wale kânâ ae kap

Esodo 30:18

U me he minya ka ânyâ taben soû a bras, kʼ ame he ka bras je can, hnân soû: ke u me he ka ip e hnyi wanben uma ûkhacaköu me taben hut, ke u me he ka hingâlâ köiö hnyin.

Ta je Vejec 10:19

E ka se hia hofuc, me ca ba hulo: Ke metâ at ame noc bohmen.

Ta je Vejec 15:8

Hmiö Iehova hut anyin tavat ae kong; Ke e ame senyin ge hic hijin at ae wisa.

Ta je Vejec 21:27

Ûnyi ae ikiki hut anyin at ae kong: Ke beönua monuiny, e ka hom e me ûnykûmenen ae kong.

Isaia 66:3

Haba at ame hlingâ bolok, me ame helâ me at ame hlingâ at; haba at ame hudo nokon mamoe, me ame helâ me at ame thu nyin kuli; haba at ame hudo bwihlany, me ame helâ me at ame hudo dren buaka; haba at ame leû libanu, me ame helâ me at ame hahnahicâ hnatheat: eke, adre hia but ûca dedra bi je gethen, ke ame senyin je hanudrin hnyi anyidra bi ta je ûnyi ae ikiki.

Levitiko 10:3

Ke haingö Mose kö Arona, ka habe, haba ûnyi ang waleji ame ha Iehova, ka habe, Ame he ka okabi nya ge tavat adre me hakekeny könya, kʼ adre me he ka oganö nya hnyi hnyimakan tavat hia. Ke haba Arona ame ca fuc.

Ta je huliwa 10:33

Anyin a wale oge me ie ûkhûnöng köu; ke so anyin a u but ang, a u je o thö. Anyin a wale ohmun hia but ang hnyi hnyimakan Khong, he ka long ta je ûnyi hia ame he Than ka hûna köu.

Ta je huliwa 17:11

Ke beönua hwakecin ae so ge tavat ang hon at Thesalonika, anyin adre me kap hofuc ge je hnyekudra ke wedra, kʼ adre me elâm je hna sihnalimen hnyi je bong, he ka wâ hnathuiny ta je unyi e.

I. Korinito 11:22

Hawa? e ba umöbun je uma he ka han me ic hnyin? ke hawa, öbun e oûnyibâûâ ekalesia anyin Khong, me ohmehma ta je theduoc? Ieû oge me he ka ha köbun? oge me he ka haisoi öbun hnyin e? Oge me ca haisoi öbun.

Heberu 10:26

Anyin ate ne ânyâ hulo ge weta, öta ka hia but wâ ûnykûme hnathu, me ba hmetu bihut can ta je hulo,

Iakobo 1:19

Hnyat me lakeiny mönya a oûnykûmik lö, e khanʼ öbun dut e. Ke so e he tavat hia ka ie löng, me bec he ka fuc, me bec he ka hmonyin:

Josua 5:15

Ke haba taben je utbavat anyi Iehova, ame ha kö Josua, ka habe, Uny jut tangen hnyeûcam ûnyi hnyi li cam, anyin ae kap utkânâ e u me tot hnyin. Ke Josua ame ânyâ helâe.