रोमी 10:10 - ह्योल्‍मो

¹⁰ च्‍यिबेमाना मिहकी यिहगी यिह छ्य़ेदीॱराङ किन्‍ज्‍योगी दिनला टाहङबु सी़हगे ओहले खोगी यिह छ्य़ेक्‍योगी तामया़ राहङगी खागी लोक पेहती थार्पा ज्‍योर्के।

रोमी 10:10 ပူးပေါင်းရင်းမြစ်များ

मर्कूस 9:23

येशूगी खोला सुङ नाङसीन, “राहङगी ला़ खासीमाना म़ेदी ख्‍ये च्‍यिबे म़े तेहके? यिह-छ्य़े पेहकें मिहया़गी तेहन्‍दालानी च्‍यि माॱनाङ तेहन्‍दा डुप्‍के।”

लूका 8:15

ओहले या़हबु साला लेप्‍क्‍योगी सेनगी तेहन्‍दादी च्‍यि यिहम्‍बा मासीमाना, लाहलागी किन्‍ज्‍योगी सुङदेन ङ्यिहन्‍दी सेमला ज़्‍या़एँ, ओहले सुङदेनगी सुङग्‍यो ल़ेहमुराङ ल़ेहया़ पेहकें ओहले ती़हजी लेप्‍केमु माहङबु म़ेदी माहङबु सेदो या़हगे” म़ेदी येशूगी स्‍याहप्‍च्‍यीया़ला ह्‍अ कोह च्‍य़ू नाङसीन।

ल़ेह-पेन 8:37

[ ओहले फिलिपगी मासीन, “सेम तिहङ यिहन्‍ज्‍युराङ यिह-छ्य़े जे नाङसीन माना राहङगी बप्‍तिस्‍मा ल़ेहन ख़ूएँ।” ओहजेला खोगी, “यिहम्‍बा, येशू मास्‍यीकाॱराङ किन्‍ज्‍योगी स़ेबु यिहन म़ेदी ङाह यिह-छ्य़े पेहके” म़ेदी ओ़ह मिहगी ल़ेहन क्‍याहप्‍सीन।]

रोमी 10:11

सुङरापगी दि ल़ेहमु सुङ नाङगे, “मास्‍यीकाला यिह छ्य़ेगे सुज्‍यीॱआङ ङोहजाला छ्यिच्‍ये म़ेह।”

रोमी 10:9

च्‍यिबेमाना का़हलेॱआङ ख्‍येगी येशूला चो़वो यिहन म़ेदी राहङगी खागी लोक पेहसीन, ओहले किन्‍ज्‍योगी मिहरोला टोहङग्‍योया़लेगी सोम्‍बो ज़्‍याङ च्‍य़ू नाङसीन म़ेदी राहङगी सेमला यिह छ्य़ेसीन माना ख्‍ये थार्च्‍ये येह।

गलाती 2:16

यिहॱनाङ, दि केच्‍या ङ्यिहगी ङोह स्‍ये़सीन– येशू मास्‍यीकाला तेहपा पेहना मिहम्‍बा, छ्य़े-ठिम ची़देनी मिह किन्‍ज्‍योगी दिनला टाहङबु सी़ह मी़हखुएँ। ओ़ह सोङबे ओहराङ छ्य़े-ठिम लाहमले मिहम्‍बा यिहॱनाङ मास्‍यीका थो़ला पेहक्‍योकी यिह-छ्य़े लाहमले टाहङबु सी़ह ख़ूज्‍यु म़ेदीराङ ओहराङगीॱआङ ओहराङगी तेहपा मास्‍यीका येशू थो़ला ज़्‍या़क्‍यो यिहम्‍बा, च्‍यिबेमाना छ्य़े-ठिम लाहमले सुज्‍यीॱआङ टाहङबु सी़ह मी़हखुएँ।

फिलिप्‍पी 3:9

ओहले ङाह मिहरो ल़ेहमुराङ काहल्‍ग्‍यो थोङज्‍यु। छ्य़े-ठिम ची़दे किन्‍ज्‍योकी दिनला ठाबे सी़हगेन ङाह राहङदीराङ टाहङदेन मिहन। यिहॱनाङ ता़ह किन्‍ज्‍योगीॱराङ ङाहला मास्‍यीकाला तेहपा नाङग्‍यो सोङबे ठाबे सी़ह च्‍य़ू नाङगे। दि टाहङदेन तेहपाला छ्या़दी येहबा।

हिब्रू 10:22

ता़ह ओहराङ किन्‍ज्‍योकी कुम्‍देनला डोएँमु च्‍याहङज्‍यु सेम्‍बा थो़दी, सेम तिहङ यिहन्‍ज्‍युराङ यिह छ्य़ेदी ओहले थाक ताङदे किन्‍ज्‍योगी दिनला डो। च्‍यिबेमाना नावा चोक्‍पा लाहमले मिहरोगी ओहराङगी सेमला चाङमा ज़ो नाङदी येह ओहले छ्यु चाङमागी ओहराङगी ज़ुबुला ठु नाङदी येह।

हिब्रू 3:12

आदा-नो़ह दाङ आज्‍यी-नुहमुया़, जेम्‍बु पेह। ख्‍या सुज्‍यीॱआङ ङ्येहम्‍बा दाङ यिह मे़हछ्येएँ सेम्‍बागी ख्‍याला सोम्‍बो किन्‍ज्‍योलेगी था़-रिहङबु माहख्‍येर्ज्‍यु।

१ यूहन्‍ना 4:15

येशूॱराङ किन्‍ज्‍योगी स़ेबु यिहम्‍बा माएँ मिह ङ्याम्‍बु किन्‍ज्‍यो ज़्‍य़ू नाङगे ओहले खो किन्‍ज्‍यो ङ्याम्‍बु ओहङगे।

ज्‍याल्‍गा 2:13

ख्‍याया़ ती़हगी ॱठि येहकें ग्‍या़ला बा़सा तेहकें म़ेदी ङाहला क्‍यी़ह येह। यिहॱनाङ ख्‍या ङाहती मिहनला थिक-चि पेहती तेहकें। ङाहती यिह-छ्य़ेबु पाङबु एन्‍टिपासकी ती़हजीलाॱआङ ङाह थो़ला ज़्‍या़क्‍योकी तेहपा ख्‍याया़गी माहक्‍युर। ती़ह गो-छ्येवा तेहकें ग्‍या़ला ख्‍याया़गी पाहरक्‍यीलाराङ खोला सेसीन।