13 ख्याया़गी ङाहगी मिहनला च्यि लाङॱनाङ स़ेबु लाहमले याहपकी ज़िज्यिद ओहङज्यु म़ेदी ङाह ओ़ह पेहच्ये येह।
ख्याया़गी यिह-छ्य़े पेहती सोल्वाङ ताप्सीमाना, ख्याया़गी च्यि लाङगे ओ़हदी ज्योर्च्ये येह।”
“लाङदोङ ख्येगी ज्योर्च्ये येह, छोल्दोङ ख्येगी च्य़ेह सिहन्ज्ये येह, कोहला तुहङदी क़े क्याहप्तोङ ओहले ख्येगी तेहन्दाला नाहङलेगी कोह खा फ़ेज्ये येह
ओ़ह सोङबे ङाहगी ख्याला माएँ, ख्यागी किन्ज्योला सोल्वाङ ताप्ती च्यिॱआङ लाङसीमाना, ओ़ह स़ेह ङाहगी ज्योर सिहन्दी येह म़ेदी यिह-छ्य़े पेहतोङ ओहले ख्यागी लाङग्योगी से़हया़ ज्योर्च्ये येह
“ओ़ह सोङबे ङाहगी ख्याला माएँ, लाङदोङ, ओहले ख्याला ज्योर्च्ये येह, छोल्दोङ, ओहले ख्यागी च्य़ेह सिहन्ज्ये येह! कोहला लाहङदी कोह तुहङदोङ ओहले नाहङलेगी ख्यागी तेहन्दाला कोह खा फ़ेज्ये येह!
याहप दाङ ङाह च्यी़राङ यिहन।”
येशूगी सुङ-क़े छ्यिम्बु तेन्दी सुङ नाङसीन, “ङाहला यिह छ्य़ेगेया़गी ङाहला मिहम्बा, यिहॱनाङ ङाहला ताङ नाङगेन्दीला यिह छ्य़ेगे।
यहूदा काहल फान्ज्यो येशूगी सुङ नाङसीन, “ता़ह मिहगी स़ेबुती ज़िज्यिद-च्येन काहल्दी येह, ओहले ओ़ह लाहमले किन्ज्योदीॱआङ ज़िज्यिद काहल्दी येह।
ख्याया़गी ङाहगी मिहनला च्यि लाङनाॱआङ ङाह ख्याया़गी तेहन्दाला ओ़ह पेह तेर्च्ये येह।
ओहले येशूगी खोला सुङ नाङसीन, “लाहम, तेहन्दाम दाङ मिहली ङाहराङ यिहन। ङाह लाहमले पेहती मिहम्बानी सुज्यीॱआङ याहप्च्येन आबासाला लेप मी़हखुएँ।
ख्याया़गी ङाहला मा़हदाम यिहॱनाङ ङाहगी ख्याया़ला दाम्सीन, ओहले ख्या काहल्दी सेदो या़ह च्य़ूदोङ ओहले ख्याया़गी सेदो नाहम-माना या़हदे तेहच्यु म़ेदी ङाहगी ख्याला कुल्सीन। ओ़ह सोङबे ख्यागी ङाहगी मिहनला याहप ङ्याम्बु च्यि लाङगे ओ़हदी याहपगी ख्याला नाङज्ये येह।
का़हलेॱआङ ख्या ङाह ङ्याम्बु तेहसीन माना ओहले ङाहती सुङ ख्या ङ्याम्बु येहसीमाना, ख्यागी च्यि लाहङज्ये सेम क्येएँ ओ़ह लाङदोङ, ओहले ओ़हदी ख्यागी ज्योर्च्ये येह।
ओ़ह ती़हजीला ख्याया़गी ङाहला च्यिॱआङ टी़हज्ये म़ेह। तेहम्बाराङ ङाह ख्याला माएँ, ख्यागी ङाहती मिहनला याहप ङ्याम्बु च्यि लाङगे, ओ़ह मिहरोगी ख्याला नाङज्ये येह।
ओ़ह ती़हजीला ख्यागी ङाहती मिहनला लाङज्ये येह। ङाह ख्यागी तेहन्दाला याहप ङ्याम्बु ओहर-छ्य़े स्यी़ह तेर्च्ये येह म़ेदी ङाह ख्याला मेहमाएँ।
यिहॱनाङ, ङाह ख्याला तेहन्दामकी ताम माएँ, ङाह डोएँदीलाॱराङ ख्याला खेप्साङ येह। च्यिबेमाना ङाह मेहन्डोना, रो़हराम जे नाङगेन्दी ख्यासाला फेप नाङज्ये म़ेह। यिहॱनाङ ङाह डोसीमाना ङाह मिहरोला ख्यासाला ताङज्ये येह।
येशूगी मोहला सुङ नाङसीन, “ख्येगी किन्ज्योगी काबाप दाङ ख्ये ङ्याम्बु छ्यु लाङगे मिहला ङोह स्य़ेक्यो येहनानी ख्येगी गा खो ङ्याम्बु लाङज्ये येहकें, ओहले खोगी ख्येला मिहली तेर्केन्गी छ्यु तेर्च्ये येहकें।”
यिहॱनाङ का़हन्दीगी ङाहगी तेर्केन्गी छ्यु थुङगे खो नाहमॱआङ कोम्ज्ये म़ेह च्यिबेमाना ङाहगी तेर्केन्गी छ्यु खो नाहङला नाहम्माॱनाङ क्ये़दी तेहकेन्गी छ्यु क्येज्यु ओहङज्ये येह ओहले दिगी खोला था़ म़ेहबा मिहली ज़ाङबु तेर्च्ये येह।”
येशूगी खुङया़ला सुङ नाङसीन, “तेहम्बाराङ ङाह ख्याया़ला माएँ, स़ेबु राहङगीनी च्यिॱआङ पेह मी़हखुएँ, यिहॱनाङ याहपगी च्यि जे नाङग्यो थोङगे ओ़ह च्यी़राङ पेहकें, च्यिबेमाना याहपगी च्यि जे नाङगे, स़ेबुगीॱआङ ओहराङ पेहकें।
ता़ह छ्येपागी तिङस्यो ङ्यिहमा पे यिहॱनाङ चा़ छ्येस्यो ङ्यिहमाला, येशूगी ज़्याङदी मिह थाम्ज्यीगी थे़गेन पेहती दि ल़ेहमु सुङ नाङसीन, “का़हलेॱआङ सुज्यीला खा कोम्ग्यो येहसीमाना खो ङाहसाला ओहङज्यु ओहले थुङज्यु।
ओ़ह सोङबे साम्बा-साम्बा ताम माएँ मिहगी, ओ़हगी तेहन्दा स्य़े ख़ूएँगी काबापगी तेहन्दालाॱआङ सोल्वाङ ताप्च्यु।
च्यिबेमाना मिहरो लाहमलेॱराङ यहूदी दाङ लेहमेन क्यिहपा ओहराङ थाम्ज्यीगी च्यिमे च्यी़राङ नाम्पार-ताहक्पा थु ज्योर्ती याहप साला डो ख़ूएँ काहल्दी येह।
मास्यीकाला क्याप्ती ओहले मिहरोला तेहपा पेहतीराङ ओहराङगी किन्ज्योगी दिनला डोज्येला स्युक दाङ आ़र ज्योर्ती येह।
ओ़ह सोङबे ङाह किन्ज्यो याहपकी स्याहपला पी़मु च़ूदी सोल्वाङ ताप्को येह।
च्यिबेमाना ङाहला ओङ नाङगे मास्यीका लाहमलेॱराङ ङाह ना थाम्ज्यी पेह ख़ूएँ।
ख्याया़गी च्यि पेहॱनाङ च्यि माॱनाङ ना थाम्ज्यी चो़वो मास्यीकागी छेनलाराङ पेहतोङ ओहले मिहरो लाहमलेॱराङ किन्ज्यो याहपला थुज्यी-छ्ये़ फुल्दोङ।
ओ़ह सोङबे ओहराङगी नाहम पेहॱनाङ येशूकी छेनला किन्ज्योला त़ेरा तेच्या फुल्दोङ। दिनी मिहरोकी छेन लेहन्गेया़गी खागी फुल्ग्योकी डेल्बा यिहम्बा।
च्यिबेमाना ओहराङ मा-फाम्बु डोएँमु ओहराङगी गो-छ्येवा पूजाहारीगी ओहराङला सेम सो च्य़ू नाङ ख़ूएँ। ओहराङ ल़ेहमुराङ मिहरोॱआङ थाम्ज्यीराङ से़हया़ला ङ्याहम्छेला छ्यि नाङसीन, यिहॱनाङ मिहरोगी तिहक्पा च्यिॱआङ जे माहनाङ।
ओ़ह सोङबे मिहरोला यिह छ्य़ेदी किन्ज्यो पोहला ओहङगेया़ला मिहरोगी ताहन्दा दाङ नाहम माॱनाङ थार्पा थोप च्य़ू थुप्कें। च्यिबेमाना खुङया़गी तेहन्दाला किन्ज्यो ङ्याम्बु सोल्वाङ ताप नाङज्येला मिहरो नाहम्स्यी किन्दु ज़्य़ू नाङगे।
ओहले ख्याया़ नाहङला सुलाॱआङ रिहक्स्यीती कोम्बु येहसीमाना किन्ज्यो ङ्याम्बु लाङदोङ ओहले ख्येगी रिहक्स्यी ज्योर्च्ये येह च्यिबेमाना किन्ज्योगी थु ज़ाङबु जेती थाम्ज्यीलाराङ बोलो-छ्योलो नाङज्ये येह।
टा़हज्येगी तेहन्दाला ख्या राहङगी पेहक्योगी तिहक्पाया़ च्यी़गी च्यी़ ङ्याम्बु राहङ-राहङगी तिहक्पाया़ लोक पेहतोङ, ओहले च्यी़गी च्यी़ला सोल्वाङ ताप तेर। टाहङदेन मिहगी ताप्क्यो सोल्वाङ स्युक छ्यिम्बु ओहङगे ओहले दिगी याहम्जेम्बागी ल़ेह पेहकें।
ख्याया़ॱआङ येशू मास्यीका लाहमले किन्ज्योकी ज़ी़लुला सी़ह ख़ूएँगी यिहक्तेन मार्च्ये फुल्गेन्गी नाम्पार-ताहक्पा पूजाहारीगी तेहन्दाला सोम्बो तोह-पा़रा ल़ेहमुराङ राहङला यिहक्तेन खाङबा ज़ो नाङगेराङ येहबा।
ओहराङगी किन्ज्योगी काया़ ची़क्यो दाङ मिहरोगी थु ङ्ये़एँगी ल़ेहया़ पेहक्यो सोङबे ओहराङगी च्यि लाङगे ओ़ह मिहरोगी नाङगे।
किन्ज्योगी थु-सेम जे नाङगेन्गी से़हया़ ओहराङगी लाङगेमु मिहरोगी सेन नाङगे। ओ़ह सोङबे ओहराङ किन्ज्योगी दिनला डोज्येला आ़र पेह ख़ूएँ।