Carta a los Hebreos 5:7 - Huitoto Murui

⁷ Enɨruemo Cristo ia, ɨimana naimɨe jailla jira, duere sefuide. Naimɨe fiodaiacana iaɨrei ia, Jusiñamuimo eo jɨɨde. Naimɨe fiodaiñena Jusiñamui jillotarede; iadedɨ Jusiñamuimo ado llote: “Cuena llegɨ cacaitañeno; iadedɨ cue comecɨ jitailla isoi fɨnoñeno. O comecɨ jitailla isoi fɨno” llote. Jusiñamui uaina naimɨe raise ɨɨnua jira, Jusiñamui naimɨe jɨɨana cacajano faɨriote.

Carta a los Hebreos 5:7 ပူးပေါင်းရင်းမြစ်များ

San Mateo 27:46

Ie meinomo judíuaɨ railla uaido Jesús ado jɨdaioide: —Elí, Elí, ¿lama, sabactani? —jɨdaioide. Iena oni dobaiñuamona raite: “Cue Jusiñamui, cue Jusiñamui, ¿bue ñellena cuena faɨnonocaidɨo?” raite.

San Mateo 27:50

Ieconi Jesús dane ado cuirioita, fiodaite.

San Marcos 15:34

Ie meinomo judíuaɨ railla uaido Jesús ado jɨdaioide: —Eloi, Eloi, ¿lama, sabactani? —jɨdaioide. Iena oni dobaiñuamona raite: “Cue Jusiñamui, cue Jusiñamui, ¿bue ñellena cuena faɨnonocaidɨo?” raite.

San Marcos 15:37

Ie facaise ado cuirioita fiodaite.

San Lucas 23:46

Jesús ado llote: —Ore Moo, cue joreñona feiño. —Ie mei naimɨe jai fiodaite.

San Juan 1:14

Iemo caɨna Jusiñamuina uiñotallena, Jusiñamui Jito comena jaide. Naie facaise caɨ comɨnɨ motomo naimɨe ite. Caɨ comɨnɨna eo duenaite. Uanaicɨnona llouide. Ie siño uaina uiñocana jaidɨcaɨ. Jusiñamui dajede ie Jitona cɨodɨcaɨ.

San Juan 11:35

Lázarona duenaillanona, Jesús eede.

San Juan 11:42

Jaca cuena cacadɨo. Iena uiñotɨcue; iadedɨ cue dɨga bene itɨno illa muidona, iese ado llotɨcue. Cuena o oretajana naimacɨ ɨɨnollena, o dɨga ado ñaɨtɨcue.

San Juan 17:1

Jesús bicɨnona llua mei, monamo eruaɨllano, jɨɨde: —Moo, cue fiodaiacanarui jai ride. Cue uai siñonana uiñota. Iemei o uai siñonana jɨaɨ uiñotaitɨcue.

Carta a los Romanos 8:3

Moisés mɨcorɨ llogacɨnona caɨ raise ɨɨnoñena jira, jeacɨnomona danɨ jillonidɨcaɨ. Ie jira Jusiñamuidɨ ie Jitona orede, ɨimana naimɨe jaillena. Caɨ isoi naimɨe jaide; iadedɨ naimɨedɨ jeacɨnona fɨnoñede. Jeacɨnona fɨnoraɨnɨdɨcaɨ. Caɨ jeacɨno facaina fiodaillena, naimɨena orede. Naimɨe uaidɨ caɨ jeacɨnona anafefitate. Ie jira jeacɨno anamona jai caɨna jillotate.

Carta a los Gálatas 4:4

iadedɨ ie jitaillɨruimo Jusiñamuidɨ ie Jitona orede, naicɨnomona caɨna jilloitallena. Jusiñamui uruiaɨna caɨ jaillena, ie Jitodɨ naicɨno anamo rɨñomona jeicɨga.

Primera Carta a Timoteo 3:16

Jusiñamui caɨna Cristona jai uiñotagafuedɨ jɨaɨe rafue baɨfemo faɨte. Iena caɨ uiñuanona, raitɨcaɨ: Enɨruemo Cristodɨ ɨimana jai bairede. Jusiñamui Joreñodɨ caɨna naimɨe uai siñonana uiñotade. Jusiñamui jaɨenisaɨ naimɨena jɨaɨ cɨodɨmacɨ. Jɨaɨe naɨraɨaɨmo naimɨena llotɨcaɨ. Iena cacajamona, ailluena comɨnɨdɨ dɨga naɨraɨmona naimɨena birui ɨɨnotɨmacɨ. Monamo naimɨe abɨdo jai jaide.

Carta a los Hebreos 10:10

Jusiñamui jitailla jira, Jesucristona orede. Caɨ facaina naimɨe fiodaillena naimɨena orede Jesucristo ie Moo jitaillacɨnona fɨnuamona, caɨ jeacɨnomona jai jaca jillobidɨcaɨ. Jai marebicaidɨcaɨ.

Carta a los Hebreos 10:5

Enɨruemo jaie billanona, Jusiñamuimo iena Cristo llote: Jeacɨno facaina toɨnɨaɨ fajana jai jitaiñedɨo. Ie jira enɨruemo comena jaillena, comɨnɨ jeacɨno facaina cue fiodaillena, cuena oredɨo.

Carta a los Hebreos 11:7

Noé mɨcorɨ Jusiñamuina jaie jɨaɨ ɨɨnote. Jusiñamui ɨco suille rafuena naimɨemo llote. Enɨrue buillena llote. Iena ɨɨnuanona, Noé mɨcorɨ aillue balsa emodomo jofona fɨnode. Enɨrue buillamona ie comɨnɨ dɨga jilloiacana jira, Jusiñamui llua isoi, balsana fɨnode. Jusiñamui lluana Noé mɨcorɨ ɨɨnua jira, jillode. Noé mɨcorɨ Jusiñamui lluana ɨɨnote; iadedɨ naimɨe facaise ite comɨnɨ ɨɨnoñena jira, Jusiñamui rɨicaillafue anamo itɨmacɨ. Jusiñamuina naimɨe ɨɨnua jira, Jusiñamui uruena naimɨe jailla jira, Jusiñamuimona Noé mɨcorɨ marebicaide.

Carta a los Hebreos 12:28

Illaɨmana naimɨe illamona, naimɨe caɨna sedaite. Ie jira naimɨemo iobillacɨnona caɨ fecaja. Naimɨena caɨ ɨɨnuamona, naimɨena caɨ raise sedajamona, naimɨena caɨ iobitaja.

Carta a los Hebreos 13:20

Jusiñamui coninɨ omoɨ comecɨaɨna uri itatajana jitaidɨcue. Caɨ Nama Jesús fiodailla mei, Jusiñamui naimɨena jai jillotate. Jusiñamui llua isoi, Jesús fiodaite. Naimɨe fiodailla jira, Jusiñamui caɨ jeacɨnona feitate. Naimɨe fiodailla jira, naimɨe anamo caɨ illamona, caɨna raise sedarede.

Carta a los Hebreos 2:14

Jusiñamuina ɨɨnotɨnodɨ comɨnɨna jira, caɨ isoi naimɨe illena, Jesúdɨ comena jaide. Caɨ fiodailla isoi, naimɨe jɨaɨ fiodaite. Taɨfe uaina caɨ ɨɨnoia, jeacɨno fɨnodɨcaɨ. Iemona fiodaicana jaidɨcaɨ. Jeacɨno anamona caɨna Jesús jai jillotaja jira, Jusiñamuimona Taɨfe uai jai saide. Jusiñamui dɨbeimo iñenanomona jai jillodɨcaɨ.

Primera Carta de San Juan 4:3

ia “Jusiñamui dɨnena Jesucristo biñede” naimacɨ lloia, Jusiñamuimona naimacɨ uaina oñedɨmacɨ. Cristona abɨna caitadɨmɨemona naimacɨ uaina otɨmacɨ. Naimɨe billena jai fɨdɨdomoɨ. Comɨnɨ comecɨaɨna feidocana birui jaidɨmacɨ.

Segunda Carta de San Juan 1:7

Dɨga taɨno lloraɨnɨ illa jira, iena ñaɨtɨcue. Jesucristo monamona jai billanona, ɨimana jaiñenana llofuecabitɨmacɨ. Bu iese llofueia, comɨnɨna jɨfuete. Naimɨedɨ Cristona abɨ caitadɨmɨe.