Matthew 13:23 - Lubuagan Kalinga

²³ Ked ha bukeɏ un liwagaweg si mallogway un pita, isun cha taguʼn langngeɏ si ugud Apudyus ot laawatancha ot lamungacha si achu. Cha uchum mamungacha si singgagasut, cha uchum sin-oolompuɏu, ya cha uchum sintutlumpuɏu.”

Matthew 13:23 ပူးပေါင်းရင်းမြစ်များ

Matthew 12:33

Oli pun lan-alig si Jesus un kalala, “Ha bibiɏuʼn kayu, bibiɏu bo mambubungala. Ngim ha lawwing un kayu, lawwing bo mambubungala. Ti milasin chi kayu si mambubungala.

Matthew 13:8

Ngim liwagaweg cha uchum un bukeɏ si mallogway un pita ot tummubucha. Ot lamungacha losan un ustu. Singgagasut chi bungan cha uchum, sin-oolompuɏu uchum ya sintutlumpuɏu uchum.”

Matthew 3:10

Si Apudyus isun chi taguʼn iyaallala wasaylaʼn mamokpok si puun chi kayu. Losan un kayuʼn achipun mamunga si bibiɏu ked mapokpok ya mitungu si apuy.

Matthew 3:8

Masapuɏʼn koonyu cha losan un mangipaila un tuttuwaʼn lambyabyawi kayu kan cha byasbyasuɏyu.

Mark 10:15

Tuttuwa ibyegak kan chikayu, lu silu achipun mangipakumbyabya si long-egla si mamatiyala kan Apudyus, un isun chi kilakumbyabyan cha allaʼn aalak, achipun makwa un mipati si Mampangatan Apudyus.”

Mark 4:20

Ngim cha liwagaweg si pitan mallogway, chicha cha taguʼn langngeɏ si ugud Apudyus ked tiluttuwacha. Ot lamunga pammaticha si sintutlumpuɏu, sin-oolompuɏu ya singgagasut cha uchum.”

Luke 13:9

Ked lu mamunga si umaliʼn tawon, bibiɏu. Ngim lu achipun, makwaʼn pokpokon.’ ”

Luke 8:15

Cha bukeɏ un liwagaweg si mallogway un pita, chicha cha taguʼn lanchongeɏ si ugud Apudyus ot illiggacha si somsomokcha ot tiluttuwacha. Ot chummakeɏ pammaticha inggala lamunga si sin-adchu.”

Luke 8:8

Ngim liwagaweg cha uchum un bukeɏ si mallogway un pita. Chummakeɏcha ot lamunga cha si singgagasut.” Ot kalan Jesus, “Chongɏonyu ya somsomkonyu pion chi inyaligku un uguchon.”

John 15:16

Chakampun un chikayu lamili kan sakon, ngim sakon chi lamili kan chikayu. Imbuunku chikayu ta ingkayu ya mamunga-bunga kayu si achu. Ked mantuɏuy otyan chi bungayu. Ta ulay lu silu chawatonyu kan Ama mipagapu si ngachenku, idchola kan chikayu.

John 8:47

Ha tuttuwaʼn aalak Apudyus ked chongɏoncha ya mamaticha si ugud Apudyus. Ngim chakampun si aalakla chikayu, hachi gapulaʼn achipun kayu chumngeɏ ya mamati.”

Acts 16:14

Osa kan cha lanchochongngeɏ ked si Lydia un iThyatira un mallalaku si langilan luput un man-ayumamon. Siya ked Gentil, lanchaychayaw kan Apudyus. Si lanchochongngeɏyala si imbyegbyegan Paul, impakaawat Apudyus kan siya ot lamati.

Acts 17:11

Cha Judio ud Berea, bibiɏu ugalicha lu cha iThessalonica, ti ammancha chongɏon chi ugud Apudyus ya ileɏgew un acha-achaɏoncha ta ilancha lu tuttuwa ibyegbyegan Paul.

2 Corinthians 9:10

Si Apudyus un meɏpuwan chi bukeɏ un imuɏan chi man-osok ya siya mangatod si makan un kalon cha tagu. Ked idchen chikayu si losan un bukeɏ un masapuɏyu ked paachuwola taplu umachu apitonyu gapu ta mallaay kayu un mangàatod.

Philippians 1:11

Tuɏungan Jesu Kristu chikayu taplu bibiɏu ugaliyu. Ked siya michayawan Apudyus ya siya main-an chi kilabiɏula.

Philippians 4:17

Manyamalak kan cha losan un tuɏungyu kan sakon. Ngim piok un ipakaammu kan chikayu un chakampun un hachi singsingtok, ngim siyad singsingtok chi machogchog-an chi gunggulayu.

Colossians 1:10

Ti lu katchi, matagu kayu un makaay-ayu kan Apu Jesu ya ipupuutyu un mangwa si mas-omala, ked mamunga kayu si mangkalakalasi un bibiɏuʼn koonyu ya machogchog-an cha ammuyu mipanggop kan Apudyus.

Colossians 1:6

Ha bibiɏuʼn chameg ked chumakechakeɏ ya miwaɏawaɏas si intilun chi lubung, ked isun chi lakwa kan chikayu si chamuʼn langngeɏanyu ya laawatanyu katuttuwaan mipanggop si kachegun Apudyus.

1 Thessalonians 4:1

Ked susulud, awed chi ibyegami kan chikayu. Lagamputyu ilacheɏ cha intudtuchumi kan chikayu mipanggop si mambibiyeg un mampagalas kan Apudyus. Ti ilammuyu imbilinmi mipagapu kan Apu Jesus un langatod si kalobbonganmi un mangibyega. Ked maila un laawatanyuʼn ustu ti siya mit cha pin-ayu koon si sala. Ngim byegbyegaanmi chikayu gapu si kalobbonganmi un illidchon Apu Jesus. Kewayu ta pabiɏubiɏuwonyu cha ugaliyu.

2 Thessalonians 2:10

ya mangkangkalasi bo koolaʼn lawwing taplu siya mangallilawla kan cha tagu un misila kan Apudyus ta machusacha. Ha panggop chi machusaancha ked achipuncha potgon ya patiyon chi katuttuwaan un siya mataguwancha otyan.

Hebrews 4:2

Ti chingngeɏ taku Bibiɏuʼn Chameg, un isun chi langngeɏan cha aappu taku si awi. Ngim kan chicha, lappun simbin chi chingngeɏcha ti achipuncha lamati.

Hebrews 6:7

Chitaku miyalig un pita. Ha pitaʼn lauche-uchelan tumubu cha bibiɏuʼn muɏa un tumutup kan cha langawachi ked hachi binchisyulan Apudyus.

Hebrews 8:10

Allaya baruʼn tuɏeg un kook kan cha taguʼd Israel si umaliʼn eɏgew. Pasigku ipaspasmok kan chicha cha lintogku ya kook ta igettokcha tuttuwaon. Ked sakon chi man-Apudyuscha ya chicha bo mantaguk.

2 Peter 3:18

Ngim chumakeɏ kayu si kachegu ya pallakaammu kan Jesu Kristu un Apu taku ya Malagu kan chitaku. Ipangatu ya ichaychayaw taku si Kristu, si sala ya si ing-inggala! Amen.

1 John 5:20

Ya ammu taku bo un ummali Alak Apudyus utla pita ked lilawagela somsomok taku taplu ammuwon taku tuttuwaʼn Apudyus. Ked litimpuyug taku kan siya un tuttuwaʼn Apudyus ti litimpuyug taku si Alakla un si Jesu Kristu. Siya tuttuwaʼn Apudyus ya siya lampeɏpuwan chi biyeg un mallalayun.