5 Cha lakuɏap makatullongcha, cha lapilay makatidchaɏancha, cha lakuteɏ lapapeɏkascha, cha latuɏong makadngeɏcha, cha latoy ummulicha latagu ya mibyegbyega Bibiɏuʼn Chameg kan cha kakapus.
Palin-awaonyu cha lasakit, taguwonyu cha latoy, papeɏkasonyu cha lakuteɏ, peɏyawonyu cha aɏan. Gapu ta lappun imbyayedyu si ilawatyu ked achi kayu bo mampabyayed lu tumuɏung kayu.
Intullong pun Jesus cha amod un taguʼn sintotodchak un umachali, ilomeɏala aɏan, un kalala, “Sikaʼn aɏan un lampatuɏong ya langumeɏ si allaʼn alak, ibyegak kan sika lumawaka kan siya ya achika mangulin kasin.”
“Awed kan sakon chi Ispiritun Apudyus ti chilutukalak kan siya un mangibyegbyega si Bibiɏuʼn Chameg kan cha kapus. Imbuulak un mangibyega kan cha tagu un isun chi libyaɏud un mawayawayaancha ya cha taguʼn isun chi lakuɏap makatullongcha kasin ya cha lapaligatan un makalin-awaancha.
Summongbyat si Jesus, “Imbyegak kabbo kan chikayu, ngim achipunyu sakon pilatpati. Ha kawachin lampeɏpu si kalobbongan Amak chi mampaloklok si mipanggop kan sakon.
Ngim lu kook cha kawachin Amak, ulay lu achipunyu sakon patiyon, patiyonyu otyan cha pin-ak koon ta mapaloklokanyu un awed si Amak kan sakon ya awechak si Ama.”
Si osaʼn labi, ummoy kan Jesus ot kalala, “Mistulu, ammumi un osaka un mistulu un imbuun Apudyus. Lappun makakopya si cha laoy un lakaskaschaaw un pin-am killingwa lu lappun si Apudyus kan siya.”
Ngim awed chi mantistigu kan sakon un langatngatu lu si John. Siya cha kawachiʼn impiyeɏn Ama kan sakon. Cha allaʼn kawachi un pin-ak koon chi mangipaila un imbuulak kan Ama.
Ot kalala kan siya, “Ingka mancheup si lalabbungan ud Siloam.” (Ha pion chi Siloam un uguchon ked libuun). Ot ummoy chi kuɏap lancheup ot langulin un makatullong.
Ot intuɏuy Peter un kalala, “Kailiyan un iyIsrael, chongɏonyu allaʼn ibyegak. Impaloklok Apudyus kan chikayu un si Jesus un iNazareth imbuunla gapu si cha lakaskaschaaw ya sinyeɏ un impakwala kan siya. Ammuyu hachi ti utla lakwaala kan chikayu.
Chongɏonyu, susuludkuʼn ay-ayatok. Siya chilutukan Apudyus cha kakapus un tagu si allaʼn lubung un byaklang si pammati ya chicha mipati si mampangatala un siya ingkarila kan cha mangay-ayat kan siya.