17 Israel mihai chu an rêngin irnêng châra Jordan vadung chu an irkâna; thuthung bôm irzôntuhai chu li laia khan irnêng châra mipuihai kâi zoi mâka chu an indinga.
Mosia’n Tuipui chunga a kut a phara; Rengpa’n zân sôtin nisua tianga phâivua a hong inhrângtira, Tuipui kha a sêm inkîrtira, khanchu Tuipui kha irnêng châr a hon changtira, Tuihai kha irsen chitin a oma.
Khannisianlân, Israelhai rêk chu Tuipui sûnga irnêng châra khan an fesuak ving theia; tui kha an chang tiang le an vei tianga hrangin bang a hong chang pehai ta.
Rengpa Pathianin thinahai chu invol a ta, a mihai mitrithi hui infâi a ti; rammual pumpuia a mihai inhnêa omhai khom om ta no ni, Rengpa’n kha kha a insîr tâk a ni.
Mosia’n Josua kuang thu a lei ipêk tâk murdi anga, Rengpa’n mipuihai kuanga ti hranga, Josua thu a ipêk kha an ti zoi mâka chu ochai thuthung bôm irzôntuhai chu Jordan vadung laia khan an inding maia, khanchu mipuihai kha inrang takin an irkân tâka.
Jordan dung nitâk tianga om, Amor rênghai murdi le Mediteranean tuipui panga om Kanaan rama rêng murdihaiin Israelhai Jordan dung an irkân sûng chu vadunga tui chu Rengpa’n an kangtir ti an lei inhriatin an chia, an lei rot zit tâka.