JEREMIA 25:9 - PATHIAN LEKHABU IRTHIANG C.L. Bible (BSI)

⁹ ‘Hmâr tianga mi tinhaiin le a ni zui rêng Nebukadnezara, ki ikoi hrang a ni. Judai ram le a luatuhai le a kôlvêla nam danghai doi hrangin ki hong ihruai hrang a ni. Hi nam le a kôlvêla nam danghai chu insiat chit ki ta, mihai khan ar khêl ti an ta, ar khêl ti ok an ti, kumtuangin an insiat hrang a ni. Keima Rengpa’n ki iti a ni.

JEREMIA 25:9 ပူးပေါင်းရင်းမြစ်များ

2 RÊNGHAI 24:2

Rengpa’n Babulon sipai rualhai, Moab hai, Amon sipaihai hmangin Jehoiakima a doia. Judai ram insiat hrangin a tîra. Hianga a tho hrang thu hi Rengpa’n a deipuhai hmangin a lei insîr sai a ni.

2 THURCHI SUINA 29:8

Hi sika hin Rengpa chu Juda le Jerusalema mihai chunga a ning an mura, mi tinin ar khêl tia danginchek khum rakin an isoisak tâk a ni; khahai kha nangni khomin nin ihmu mai a ni.

2 THURCHI SUINA 36:21

Jeremia bâia Rengpa thu lei hril chu, Kum sômsari sûng chu nin ram châr a ta, a iti kha a hong itung a ni ta.

THUVÂRHAI 21:1

Reng lungrîl chu Rengpa’n a zêka; tui luangna iva korong a isiam angin a nuamna tiang tak an kôitir ngai.

ISAIA 10:5

Assuria rêng chunga ningmurin that ki itum mai a ni, ki ningthik insumna’n ki hmanga.

ISAIA 13:3

Keima ngêtin ki mi indanghai thu ki pêka, ki mihriam songhai, a hrâthai chu, ki ningmur insumna hrangin ki ikoi a ni.

ISAIA 39:7

“Nangma inei ngêt, ni nâipasal laia senkhat chelhai an ta, an til la pehai an ta, Babulon rêng ina om an ti,” a tia.

ISAIA 44:28

Kura kuanga khan, “Ki belra enkoltu ni ni, ki thiltum chu hlo nin chuk pe ro, Jerusalem siaminsa nôk sianlân, Tempil sinna hrang lung inphûmtir ro,” ki ti saa.

JEREMIA 1:14

Ama’n, “Hi ram sûnga om murdi chunga hmâr tianga irthokin siatchit theina hor soi buan buan a ta;

JEREMIA 1:15

hmâr tianga nam tinhaiin hitaka hong hrangin ki koi sikin. An rênghai hong an ta, Jerusalem kotbâihai le kul bang irhualin an rêngtoihmunhai dong an ta, Judai ram khopui danghai khom hual sa an ti.

JEREMIA 10:22

Irngai ta roi, thuthang a hong tung ta! Hmâr tianga mihai irchunkhôm nî chu; Judai ram khopui inram chita, sihalhai lêngna hmun siam hrangtuhai chu,” ki tia.

JEREMIA 12:14

Rengpa’n a ti, “Israel kôlvêla om, ki mi Israelhai ram ki ipêk insiattuhai chungchânga hin ti nuam ki inei a ni. Kha mi sualhai kha thing ar zunga phâipai angin, an rama irthokin thonpaihai ki ta, an kuta irthokin Juda in sûngkuahai chu saninsuahai ki ti.

JEREMIA 18:16

Hi ram hi thil ichiomin an siama, irngaiinhlu loia om mai hrang angin. A theng irlôihaiin an thil hmu kha ar khêl ti an ti. Irngai irkhêlin an luhai khom notpol an ti.

JEREMIA 2:15

Kâmkeibaknei angin an inhrâm khuma; A ram chu ramchârin an siama, a khopui khom a lua hrang boiin a ram zoi tâk.

JEREMIA 20:4

Rengpa ngêtin a iti a ni, ‘Nangma le ni rual danghai hrangin ichiomin nang siam ki ta, an râlhai khandai leh an rêngin thata an iom kha hmu ni ti. Juda mi murdi chu Babulon rêng thuhnuaia ki isia hrang a nia, senkhat chu intângna ina om hrangin a rama hruaipaihai a ta, senkhat chu thathai a ti.

JEREMIA 24:9

An chunga vânduaina irkhêl tak intung ki ta, rammuala nam tinhai chu chi ta tak an ti. Mihaiin nuisohai an ta, tufiam thôna’n hmanghai an ta, êsêlhai an ta, ki inthekindarna hmun tina an irhming chu khosâlna’n hmang an ti.

JEREMIA 25:8

“Khasikin a thu irngai nuam mak chêia, Rengpa itinrêng thotheiin a ti.

JEREMIA 29:18

anni chu khandai, châm le hri le hrâihai leh irzûlhai ki ta, rammual nam tin chu an thil hmu chu an ichi sabak hrang a ni. Anni kin thekindarna hmun tina, an chunga thil tung sika khan, mihriamhai inlâiin chi sabak an ti. Mihaiin anni chu hnung songsanhai an ta, an irhming kha khomâksâmna’n hmang an ti.

JEREMIA 35:11

Khan rêng Nebukadnezara’n hi ram hi a hong rûna khan, Babulon ram le Suria sipaihai ata zôk hrangin Jerusalema hongin thu kin rêla. Khasika khan atûn hin Jerusalema kin iom tâk a ni,” an tia.

JEREMIA 36:2

“Lekhabu inzuat kha lan lân, Israelhai le Judahai le nam danghai chungthu nang ki ihrilhai kha irziak roh. Josia inlal phut laia ni kuanga ki thu insîr le a vuan sûn tena ki thu’nsîrhai a rêngin irziak ving roh.

JEREMIA 36:29

Rengpa’n rêng kuanga ti pe hrangin a nin hrila, “Lekhabu inzuat chu ni hâla, Babulon rêng hongin, hi ram hi insiat chit a ta, a mihai le a sahai thatpai a ti. Itho sika ni irziak moh ti Jeremia chu nir dona.

JEREMIA 4:7

Kâmkeibaknei a khur ata a hong isuak angin, nam tinhai insiatchit hrang chu a hong irthok a ni ta. Judai ram insiat hrang le a hong tâk Judai ram khopuihai chu irfangin om an ta, an laia tûte irleng no nihai.

JEREMIA 40:2

Sipai hruaitu khan a hruai irkêma ki kuang, “Rengpa ni Pathianin hi hmuna vânduaina tung hrang hi a lei inpuang tâka.

JEREMIA 43:10

Khanchu an kuang hiang hin ti ro, Rengpa Itinrêngthothei Israelhai Pathianin hiang hin a ti. A ni zui Babulon rama rêng Nebukadnezara chu hi hmuna hin hong hruai ki ta, hi lung nin iphunhai chunga hin a rêngtoihmun do a ta, a rêng puan in chu an chunga zâr a ti.

JEREMIA 46:20

Aigupta chu sial illa nâmzan enhoi tak ang a nia, khannisian hmâr tianga mitip hong vuangin a indôp a ni.

JEREMIA 49:19

Kâmkeibaknei rampui sêt tak ata Jordan dung hong zui sûlhringna hmuna hong angin hong a ta, Edom mihai chu an ram ata inrang takin irzûlpaihai ki ti. Khanchu hruaitu ki inthang khan nam chunga khan roirêl a ti. Keima le irkhi thei tu mo om? Tu mo ni doi ngam hrang? Tu roirêltu mo ni doi thei hrang?

JEREMIA 6:1

Benjamina mihaio, zôkna zongin intân ta roi; Jerusalem ata rot ta roi! Tekoa khuaa bekul tum unglân, Beth Hakerem-a irthokin inhriat theina mei inchok roi. Hmâr tianga irthokin intakna le siatchit theina a hong itung hrang a ni.

JEREMIA 8:16

Ei râlhai chu Dan khopuia an oma, an sakorhai hnârkhông irhâi khom ei inhriat a ni. A ram pumpui chu sakor inhrâm chiin an inthing a ni. Ei râlhaiin ei ram le a sûnga thil tinrêng ei khopuihai le a mihriamhai siatna hrangin an ihong a ni.

EZEKIELA 12:20

Khan, mi lêngna khopuihai chu siat chit a ta, a ram chu ramchitin om a ti. Khanchu Rengpa chu ki nih ti inhriat an ti,’ tiin hril ro,” a tia.

EZEKIELA 16:40

Nangma chunga inkhômpuina nei an ta, lungin nang dêng an ta, khandaiin nang irchan chit an ti.

EZEKIELA 21:11

Hmang thei ta hrangin khandai chu intât a ni ta, A ni, thîr ngaiha innôt infâi a ni ta, thattu kuta chuang hrangin.

EZEKIELA 26:7

Khan, Rengpa Pathianin hiang hin a tia, “Tura doi hrangin rênghai laia a roiinpui tak Babulon rêng Nebukadnezara chu zuang tuang ki ta, ama chu hmâr tiang ata sipai tamtakhai leh sakorhai tâli le sakor chung chuang mihai leh zuang an ti.

EZEKIELA 36:5

Kei Rengpa Pathian hin ningmurin a kôlvêla namhai le a bîktakin Edom chu irkôkhai ki ti. Râifân le hmusit takin ki ram chu an lâka, hloi hring hmunhai chu an lei lua tâka.

DANIELA 5:18

O inlaltak, ni pa Nebukadnezara chu inchungtak Pathian khan an laltira, an liantirin a sân a iroiinpuitir tak tak a ni;

HABAKUKA 1:12

O Rengpa ki Pathian, ki mi Irthiang, kumtuang mi ni ini loi ma ni? Thi ngai mak che. O Rengpa, nangin anni kha roirêlna hrangin nin thang tâka, O Lungpui, nangin anni kha ni sep hrangin ni inkunghai an ni.

HABAKUKA 1:17

Khasikin a lên kha inrong nôkin, Namhai that mai hrang chu a imâk loi hrang ma ni?

DÂN INHNINA 28:37

Rengpa nangni indartirna rama khan a hmu ka kai khan nin chunga thil tung kha a’rkhêl ti an ta, nangni hnuaisia an ta, nuiza siamna’n nangni hmang an ti.