ISAIA 50:2 - PATHIAN LEKHABU IRTHIANG C.L. Bible (BSI)

² Ki hong lai khan tûte’n ni uksak mak chêia, Nangni ki koi lai khan tûte’n ni sâm mak chêi; sansuakna hrangin ki kut a ibong mo nin isôn? Sansuak hrangin ki ihrât loi mo nin isôn? tuipui khom ki hala, a kang theia, Tuipuihai khom kin chârtir thei, tui a om no sikin nga an thia, an thu zoi ta.

ISAIA 50:2 ပူးပေါင်းရင်းမြစ်များ

IRPHUTNA 18:14

Rengpa hrangin thiltho hi a intak hrang mo a isôn? zoro’nkunga, a zoro a hong tung tika chu, ni kuang zuang nôk ki ta, Sari’n nâipasal nei a ti,” a tia.

2 THURCHI SUINA 32:15

Khasikin, Hezekia hin nangni huang no ri se, a he la no unglân, Assuria rengata a biaktuhai khan a san thei tûte nam pathian om mahai. Nin Pathian khomin nangni sansuak zoi ni mo,” a tia.

INPÂKNA HLAHAI 106:9

Tuikhanglian Sen kha a hala, Khanchu a kang ta: Khanchu anni kha muang inzena fe’n varâl an kâi ta.

INPÂKNA HLAHAI 107:33

Ama khan tuipuihai chu ramchâra an changtir ngaia, Tuihnârhai chu irnêng châra an changtir ngai.

FESUAKNA 14:21

Mosia’n Tuipui chunga a kut a phara; Rengpa’n zân sôtin nisua tianga phâivua a hong inhrângtira, Tuipui kha a sêm inkîrtira, khanchu Tuipui kha irnêng châr a hon changtira, Tuihai kha irsen chitin a oma.

FESUAKNA 14:29

Khannisianlân, Israelhai rêk chu Tuipui sûnga irnêng châra khan an fesuak ving theia; tui kha an chang tiang le an vei tianga hrangin bang a hong chang pehai ta.

FESUAKNA 7:18

Kha tena chu tuia ngahai, khom thi ving an ta, tui khom a mirimhai hong siat ta a ti. Aigupta mihaiin kha tui khom kha in thei no nihai a ti, va ti ro,’ a tia.

FESUAKNA 7:21

Tuia nga om murdihai khom an hong thi zoi tâka; Aigupta mihaiin in thei ta mahaia; khanchu Aigupta ram lian dôra khan thisen a hong bit zoi tâka.

THUVÂRHAI 1:24

Nangni ki koi maia, hong hrangin nangni ki ifial a ni, khannisianlân, ite bê’n bê mak chêia, keima tiang khom nin mikuar sung nuam mak chêi.

ISAIA 11:15

Rengpa’n Suez-ah irkuang irngamna khom inkangtir a ta, Eufrates tuipui khom phâivua lum hmangin inkangtir a ta, an kezapha lua dui loiin irkân thei an ti.

ISAIA 19:5

Nail vadung chu kang a ta, lizôlhai khom inlang ving a ti.

ISAIA 23:11

Rengpa’n Tuikhanglian chunga khom a kut a thâk, Reng ram tamtak a hril insiata, Kanaan mihai hmunpui, insiatpai hrangin Rengpa’n thu a pêka.

ISAIA 36:20

Anni pathianhai khan hi ramhai hih an san thei no’n teh Rengpa nin itih khom hin Jerusalem khua hi inzôk thei ni mo?” tiin a tia.

ISAIA 41:28

Millimhai chu ki hong enhaia, Thu ni hrilpui thei hrang ite hmu ma unga, ki irdonhai khom ite ni sâm thei mahaia.

ISAIA 42:15

Tâng le mualhai insiathai ki ta, sûlhring inchâr ki ta, lungpuihai chu insimhai ki ta, dîlhai khom inkangtir ki ti.

ISAIA 43:16

Tuipui irkân theina lampui ki siama, tui irsok but but laia fena lampui ki siam a ni.

ISAIA 44:27

Tuikhanglian khom kangchat hrangin thu ki pêka, a tuihai a kang ta.

ISAIA 51:10

Tuipui inkanga, ni mi inthang saihai irkânna hrang, tuikhangliana lampui siamtu kha ni mak che mo?

ISAIA 54:6

A thoibopa pasal neia, a pasal indit nôk ta loi, lungrîl na tuang ang hi ni ni; khannisian Rengpa’n nang koi nôk a ti.

ISAIA 59:1

Irngai roi, Rengpa kut chu saninhring thei loi hrangin inbong ni ual mah, inhre loi hrang rakin a mikuar khom sêt ual mah.

ISAIA 59:16

Dengtheina tuang zoi hrang tûte om mahai, Rengpa’n ar khêl a ti hrai tâka, ama kut ngêtin san nôk a ti, dikna chu a iti mai a ni.

ISAIA 63:13

Hmun irfûknaa sakor intân angin, intân loia tui dop tianga chalaitu kha khôn moh a om ta?” an ti.

ISAIA 64:6

Kin rêngin kin porinche zoi ta, kin satna murdihai khom puanbom porche tak ang a ni ta, thinghna chuai tâk angin kin om ta, kin inchâinahai hin a ni ihruai irhmang a ni ta.

ISAIA 65:12

Nin ituang hrang rammual hi chu khandaia thi a ni, that hrangtu kuang la kûn nin ti. Hihai hi ki koihai lai khan chu ni sâm mahaia, ki inuam loi sualna an thoa, ki hril laiin irngai nuam mahai, ki inuam loi lam tho an nuam ngai.

ISAIA 66:4

Keima’n anni hranga thilirkhêl tak tho pehai ki ta, an ichitak thil intungtir pehai ki ti; ki khêk lai khan ni lei sâm mahaia, ki hrilhai lai khan irngai mahaia, ki mithmua ki inuam loi thil an thoa. Ki ilôm loi hrang thil tho an inthanga.

JEREMIA 14:9

Itho mo hi dôra ni ichaninvâi, changpui theina nei sipai teh ni ang tâka? A dik takin, Rengpa kin kuang ni oma! ni mihai kin nia, ni ma viat no ro,” a tia.

JEREMIA 35:14

Jonadaba irchihaiin chu uain in loi hranga thupêk kha an zôma, a vuan sûn ten hin nin laia inkhat khom uain in la om mahai. Khan keima’n chu nin kuang thu kin sîr khomin ki thu zôm nuam ngai mak chêia.

JEREMIA 35:15

Nin laia a ni zui deipuhai ki tîrhai maia, nin omdân sualhai masana, thil sa tho hrangin nangni an lei hril ngaia. Nangni le nin irchibulhai ki ipêkna ram hin om kumkhua thei hranga pathian danghai chubai mûka an sin tho loi hrangin nangni an hril ngaia. Khan khomin ki chong irngai nuam mak chêia, nin ni uksak nuam loi a ni.

JEREMIA 5:1

Jerusalem mihai, in kongkâr tina intân unglân, Thîr unglân, nin bingin en roi! Bazârhaia zong unglân, thil diktak thoa, Pathian ta hranga iamom tum inkhat lua nin hmu thei ngân mo? Nin hmu theia ni’n chu, Rengpa’n Jerusalem hi lan zôk a ti.

JEREMIA 7:13

Hi sualnahai murdi hi nin itho a nia, vêl tamtak nangni ki hril khomin irngai nuam mak chêi. Nangni ki koi zoro’n nin ni isâm ngai loi a ni.

JEREMIA 7:27

Khasikin, Jeremia hi thuhai hi ki mihai kuang hril ni ta, khan nang irngai pe no nihaia, koi ni ta, khan nang sâm no ni.

JEREMIA 8:6

Nangni ki irngai chiana, tûte thu dik hril zel om mak chêi. Tu mi khom ni unglân, a thil tho’nsual sikin a poi ti maka, tu mi khomin, thil dik loi ki isin ma nih ta o! tiin irdonna siam ma, sakor irdoina hmun pana intân angin mi tin mâni lampui nin ipan chit a ni ta.

DANIELA 3:15

Atûn hin bekul, theihle, perkhuang, rosem, têngrep le serânda irhâinei murdi an ringa khûksadela ki millim siam chubai nin la mûk hrangin chu la sa a ta; nin mûk nuam noa ni’n chu, kha zoro zel khan hâlirvômna meipuia lût nin ti; ki kut ata sansuak theitu pathian chu tu mo a ini hrang?” a tia.

DANIELA 3:29

“Khasikin mi tin, nam tin, chong tinhaiin Sadraka, Mesaka le Abednego-hai Pathian chunga thil saloi hril murdi chu sâtpai ni an ta, an inhai khom insiat ni an tih ti thupêk ki siam nôk ta. Ama ang dôra sansuak theitu pathian dang rêng rêng om ta mahai,” a tia.

DANIELA 6:20

Daniela omna khur a hong nâiin chu chap irhâiin an hriata, rêngin Daniela kuang khan, “O Daniela Pathian hring siahlo, ni Pathian a sin ni itho ngai khan kâmkeibaknei khur ata nang a inzôk thei mo?” a tia.

DANIELA 6:27

Ama’n a saninzôka, a saninhringa, irnêng le irvâna irsinsiana le thil irkhêl a tho theia; ama hi kâmkeibaknei sinthotheina ata Daniela sansuaktu chu a ni,’ tiin.

HOSEA 11:2

Ki koi lia an ni hla liaa, Baalhai kuang an irbôl uala, Millim siam chophai kuang mirimhoi an ihâl a ni.

HOSEA 11:7

Ki mihai khan nir heisan an tum maia, an ringkol riktak sikin, anchungtaka insam an ta, khannisian tûte’n indom irsâng pe no nihai.

NAHUMA 1:4

Tuikhanglian kha a halirchua, an kang inchârtira, tuidung tinrênghai khom an kangtir zoia: Basan ram le Karmel tâng kha a châr zoia, Lebanon tâng pârhai kha a ichuai a ni.

HABAKUKA 3:8

Rengpa chu ivadunghai chunga khan a milung a inchukloi ma ni? Vadunghai chunga khan ni ninginmurna kha a omin, Tuikhanglian chunga khan ni ninginmurna kha a iom ma ni? Ni sakorhai chunga khan chuangin, Ni saninhringna sakor tâlihaia khan ni ichuang hi?

NAMBAR 11:23

Khanchu Rengpa’n Mosia kuang, “Ki’rchamneina hi a ihek thei hrang ma ni? ki iti hi a tung le tung loi inhre lat ta ni ti?,” a tia.

MARKA 4:39

Khanchu a hong thoia, phâivua kha a hala, dîl kuanga khan, “Dâihrekin lân, om chian chian roh,” a tia. Phâivua kha a hong monga, a dâidup ta.

JOHANA 1:11

Ama ram ngeia a zuanga, aniachu ama mihaiin lei lôm mahai.

JOHANA 3:19

Thiamno an chang dân kha hiang hin a ni; vâr kha rammuala a zuanga, khannisianlân, mihaiin vâr nêkin chu inthim kha an nuam ual, thil sual an tho sikin.

JOSUA 3:16

sak tiang ata tui zuang luang chu a chata, a hnâr tianga Zarethan bul Adama khopui dênin tui chu irbukkhômin a’rngama. Araba tianga tuipui thia luang lût ngai chu a kanga, a chat zita; mipuihai chu Jeriko khua kôl irdîn taka khan an irkân kâi tâka.