ISAIA 41:18 - PATHIAN LEKHABU IRTHIANG C.L. Bible (BSI)

¹⁸ Mual le tângdunghaia tui inluangtir ki ta, irhôra tuihnâr inomtir ki ti, tâng chârna hmuna dîl siam ki ta, ramchârna khom tui luang a ti.

ISAIA 41:18 ပူးပေါင်းရင်းမြစ်များ

INPÂKNA HLAHAI 104:10

Ama khan phâihaia khan tuihnârhai ni siama; Tâng kârhaia khan a luanga.

INPÂKNA HLAHAI 105:41

Lungpui an honga, khanchu tui a hong suak zun zun tâka. Ramchâra khan tuidung angin a luang tâka.

INPÂKNA HLAHAI 107:35

Ramchâr chu dîl an changtir ngaia, Irnêng châr chu tuihnârhai an changtir ngai.

INPÂKNA HLAHAI 126:4

O Rengpa, suaka kin intâng hi kin rama ni hruai kîr nôk ro, Sim rama vadunghai angin.

INPÂKNA HLAHAI 46:4

Ivadung inkhat a oma, kha ônhai khan Pathian khopui an lômtir ngai, Anchungtaka omna hmun irthiang chu.

ISAIA 12:3

Saninhringna tuikuang ata, râifân takin tui chôi roi,

ISAIA 30:25

Nin râlhai isem an nia, an kulhai a chim zoiin chu, tâng irsâng le mual pônga tui luang loina hmuna luang a ta.

ISAIA 32:2

Phâivuapui a tho khoma an irbîkna hrang, ruapui lai ata an hul theina hrang, ramchâra tui luang le tângchâra lungpui raifân angin om an ti.

ISAIA 33:21

Khatak khan chu, Rengpa roiinpuina nin entir a ta, tui tamna rama, tui lam hoitak hmuna om ei ta, râlhaiin irkuang hong chôi thei loina hmuna, irkuang lian hong lût thei ta no ni.

ISAIA 35:1

Ramchâr le tânghai chu lôm an ta, Ram kol têt tût chu raifânin om a ti.

ISAIA 44:3

Ramchârhai tui buak ki ta, ramna hmuna tui inluangtir ki ti. Ni’rchihai chunga ki’rtha sem ki ta, ni tû le ni nâihai satvur ki ti.

ISAIA 48:21

Ramchârna hmuna a hruai khomin a tuiinhrâl loiin, lungpui sûng ata an hrangin tui a luang suaka, Lungpui rîl ata tuiphûl a hong suaka.

ISAIA 58:11

Rengpa’n nangni hruai mai a ta, misa lum hnuaia nin dangchâr chu hek a ti. Nin irzuk murdi nangni pe sa a ti. Nin taksahai nangni inhrâttir a ta, tui tamna hmuna irhuan angin le tuikuang kang ngai loi angin ni nin ti.

ISAIA 65:13

Rengpa Pathianin hiang hin a ti: “Ki siahlohaiin fâk hrang nei an ta, nangni chu nin phîngchâm a ti. Ki siahlohaiin in hrang nei intam an ta, nangni’n nin tuiinhrâl a ti.

JOELA 3:18

Kha nikhuaa khan hiang hin hong ni a ta, tâng irsânghai khan uain thum inzungtir a ta, tânghai kha irhnutuiin luang a ta, Judai ram vadungte murdihai kha tuiin luang a ta: Rengpa in ata tuihnâr zuang pût suak a ta, Sitim irhôr irziltir a ti.

ZAKARIA 14:8

Kha nikhua kha a hong tung tena chu, Jerusalem ata tuihringhai hong suak a ta, a chimrip chu Tuipui Thia luang lût a ta, a chimrip dang chu Mediteranean tuipuia lût a ti. Kumtuangin luang a ta, fûra khom, sâla khom.

THUPHUANG 22:1

Khan, vântîrtôn khan hringna tui vadung krustal lung anga irtêk, Pathian le Belrate rêngtoihmun ata zuang luang kha a nin entira,

THUPHUANG 7:17

Belrate, rêngtoihmun inlainaa om kha a enkoltu ni a ta, hringna tuikhanglianhaia tuang a ti. Khanchu, Pathianin an mit ata mitrithi tinrêng huipai ta a ti,” a tia.

ROIRÊLTUHAI 15:19

Khan, Lehi hmuna khur om chu Rengpa’n ar ônga, tui a hong suaka, a hong in tena chu a sôl a hong chan pe tâka, a hong har tâk. Kha tuikhur kha En-Hakkore an phuaa, Lehi hmuna hin atûn ten hin a la om.