Zekariah 9:16 - Hawaii Pidgin Bible

¹⁶ Dat time, dea God, Da One In Charge, goin get his peopo outa trouble. Jalike one sheep guy get his sheeps outa trouble. His peopo goin shine all ova his land, Jalike jewel stones on top one crown.

Zekariah 9:16 ပူးပေါင်းရင်းမြစ်များ

Songs 100:3

Fo shua you gotta know dis: Da One In Charge, he God! He da One wen make us guys, An us guys his peopo! Jalike us da sheeps Dat he lead to da grass.

Outa Egypt 28:21

Ery stone, az fo one a da Israel ohanas. Cut da stone fo put dea names jalike fo make one seal, twelve name on top da twelve stone, fo da twelve Israel ohanas.

Outa Egypt 28:9

“Take two onyx stone, an cut da names fo da twelve Israel boys on top da stones.

Isaiah 40:10

Az cuz Da One In Charge, da Boss, stay come wit powa. He stay in charge cuz he strong. He stay ready fo pay good Da ones dat help him an work fo him.

Isaiah 54:12

Jalike I goin make da towas aroun da town Wit ruby kine stones, An da gates wit stone dat look jalike fire. Goin get rich kine stones all ova da land. Dass one picha fo da town, Fo how I goin make eryting come good fo you guys!

Isaiah 60:14

Get peopo befo time Dat wen make any kine to you guys, Dea kids goin come by you guys An go down in front you guys. Erybody dat wen ack jalike dey tink you no good, Dey goin go down on top da groun by yoa feets. Dey goin call yoa town, ‘Da One In Charge Town, Zion Town, Da Town Fo Da One Dat Stay Good An Spesho fo da Israel peopo.’

Isaiah 60:3

Da peopos from plenny countries Goin come by you guys fo see da light you get. King guys goin come fo see da light too, Cuz stay bright, Jalike da sun come up fo you.

Isaiah 62:3

You guys goin be jalike one nice looking lei Dat Da One In Charge get in his hand. Jalike da kine head cloth da king guys wear Dat God hold in his hand.

Jeremiah 23:3

“Me, I goin bring togedda da ones from my peopo dat still stay alive. I goin bring um all back dea place, from all da lands wea I wen make dem go. Dey jalike my sheeps, an dey goin get plenny bebes.

Jeremiah 31:10

“Lissen wat me, Da One In Charge, tell, you peopos! Make shua erybody inside da far away islans know dis! Tell um: ‘Da One dat wen scatta da Israel peopo, He da One goin bring dem back togedda. He goin take kea dem Jalike one sheep guy take kea his sheeps.’

Jeremiah 31:11

Cuz Da One In Charge goin do wat he gotta do Fo da peopo dat come from Jacob No need be one slave no moa. Jalike he goin buy um back fo dea ohana From da peopo dat mo strong den dem.

Ezekiel 34:11

“ ‘Cuz a dis, dis wat me Da One In Charge, da Boss, tell: I da One goin look fo my sheeps, find um an take kea dem.

Ezekiel 34:12

Jalike one sheep guy figga how fo take kea his sheeps dat wen scatta, an now he stay wit um, az how I goin take kea my sheeps. I goin get um outa all da place wea dey wen scatta on one day wen get plenny clouds an stay dark.

Ezekiel 34:31

You guys my sheeps, da sheeps inside my grass land. You my peopo, an I yoa God, Da One In Charge. Az wat me Da One In Charge, da Boss, tell.’ ”

Micah 5:4

Da leada goin stan up an take kea his peopo, Jalike one sheep guy take kea his sheeps. He goin stay strong cuz he stay tight wit Da One In Charge, An cuz he know wat kine god, his God, Da One In Charge. Den da peopo goin live dea, An nobody goin bodda dem. Cuz peopo all ova da world Goin know dat da Israel leada guy real importan.

Micah 7:14

Den da peopo tell: “You Da One In Charge! Carry yoa club an come Jalike one sheep guy proteck his sheeps. Lead yoa peopo jalike dey yoa sheeps, Dey da peopo I wen give you jalike dey yoa property. Some a dem live wit nobody inside da fores, But now, give um fields wit green grass fo eat all aroun. I like dem make jalike sheeps Dat eat da green grass Bashan an Gilead side, Jalike befo time.”

Zefaniah 3:20

An dat same time, I goin bring you guys togedda. I goin bring you guys back to yoa place. I goin make da peopos all ova da world Know wat kine peopo you guys, An make um talk good bout you guys. Dat time, I goin bring you guys back So you no goin stay prisonas no moa, An you guys goin see all dat happen!” Dass wat Da One In Charge tell.

Haggai 2:23

“Da One In Charge, Da God Ova All Da Armies tell: ‘Dat time, I goin take you, my worka guy Zerubbabel, Shealtiel boy. I goin make you jalike my spesho ring fo seal my paypas, cuz I wen pick you.’ ”

Zekariah 10:6

“I goin make da Judah ohana come strong. I goin get da Joseph ohana outa trouble. I goin bring dem back Cuz I get love an pity fo dem. Dey goin come jalike I neva leave dem. Cuz me Da One In Charge dea God, An I goin help dem wen dey pray to me.

Zekariah 8:23

An one mo ting: Dis wat Da One In Charge, Da God Ova All Da Armies, tell: “Dat time, fo ery Jew guy, goin get like ten odda guys from odda languages an peopos goin grab hold a his robe, an tell um, ‘Eh! Us guys like go wit you! Cuz us guys wen hear dat God stay wit you!’ ”

Luke 12:32

“You guys, you jalike bebe sheeps. No sked, cuz yoa Faddah da King like give you eryting he get.

John 10:27

My sheeps, dey hear my voice. I know dem. An dey stay tight wit me.