Zekariah 5:4 - Hawaii Pidgin Bible

⁴ Da One In Charge, da God Ova All Da Armies, tell, “I wen sen out dis paypa fo put kahuna on top da house a erybody dat rip off stuff, an erybody dat bulai wen dey make one strong promise an use my name. Da kahuna goin stay on top dose houses an wipe um out, even da wood an da stones.”

Zekariah 5:4 ပူးပေါင်းရင်းမြစ်များ

Job 18:15

Goin get tings inside da bad guys tents, dat not da bad guys stuff. Da new ones scatta burning sulfur inside um.

Job 20:26

Get one real dark place wea all dea rich kine stuffs goin go. One fire dat nobody start goin wipe out all dat stuff, An burn up eryting dat still stay inside dea tent.

Job 8:15

Da peopo dat no tink bout God lean on top da stuff dey get, But jalike da spida web, no hold dem up. Dey try fo make um solid, but no can.

Job 8:22

Da peopo dat hate you goin come shame. Da tents wea da bad kine guys live, no mo awready.”

Smart Guys 3:33

Da peopo dat stay do bad tings, Da One In Charge promise fo punish all dea ohana, But da peopo dat stay do wass right, He make eryting come good wea dey stay.

Isaiah 24:6

Dass why God put kahuna on top da world Fo burn up eryting dea. All da peopo dat live dea, Dey gotta suffa cuz dey wen do wrong. Dass why, from da ones dat live on top da earth, Ony litto bit peopo stay now.

Jeremiah 2:26

“Jalike one steala guy come shame wen da security guys catch um, Az how da Israel ohana come shame— Dem, dea king guys, an dea leadas, Dea pries guys, an dea guys dat suppose to talk fo God.

Hosea 4:2

Dose guys put kahuna on top each odda. Dey bulai each odda an murda each odda. An dey rip off peopo. Dey fool aroun behind dea wife o husban back. Dey bus up peopo an kill um one afta anodda.

Hosea 4:3

Cuz a dat, all da peopo stay sad inside. Eryting dat live inside da land goin come dry up— Da wild animals inside da boonies, Da birds inside da sky, An da fish inside da watta, dey all goin mahke.

Amos 3:10

You betta lissen! Da One In Charge, he tell dis: “My peopo, dey donno notting how fo do da right ting! Dey pile up dea palaces wit stuffs dey get From peopo dey wen bus up.”

Zekariah 5:3

An he tell me, “Dis paypa tell wass da kahuna dat Da One In Charge goin put on top all da peopo in da whole land. Da paypa tell on top one side dat erybody dat rip off stuff gotta get outa da land. An on top da odda side tell dat erybody dat bulai wen dey make one strong promise, dey gotta get outa da land.”

Zekariah 8:17

No go make plan fo do someting bad to da guys dat live nea you! No go tink az good you bulai wen you make one strong kine promise! I hate all dat kine stuff!” Az wat Da One In Charge tell.

Malakai 3:5

Da One In Charge Ova All Da Armies tell dis too: “I goin go by you guys in front da judge right den an dea, I goin tell da judge wat I know bout you guys, Bout da ones dat make kahuna kine ceremony, An da ones dat fool aroun behind dea wife o husban back, An da ones dat make one strong promise but dey bulai, An da ones dat make trouble fo dea worka guys cuz dey no like pay um, An make trouble fo da widows an da kids dat no mo faddah o muddah, An da ones dat give one hard time to da peopo from anodda place. All dose peopo, dey no sked me!”

Rules Secon Time 28:16

“God goin put kahuna on top you guys inside da towns an outside da towns.

Rules Secon Time 7:26

No take one idol kine god inside yoa house cuz az pilau da way Da One In Charge see dat. If you take um inside, Da One In Charge goin put kahuna on top you guys fo wipe you out jalike you one sacrifice fo him, jalike he goin wipe out da idol. You guys gotta hate dat kine pilau stuff fo real kine, an no take um, cuz Da One In Charge goin wipe um out jalike dass one sacrifice fo him.

Joshua 9:20

Dis wat we goin do to dem: We goin let dem stay alive, so God no come real huhu an punish us fo go agains da strong promise we wen make to dem.”