Zekariah 13:1 - Hawaii Pidgin Bible

¹ Da One In Charge tell dis: “Dat time, jalike God goin open one puka fo watta fo da David ohana an da peopo inside Jerusalem. An from dat watta, dey goin make dea peopo come clean inside from all da bad an pilau kine stuff dey wen do.”

Zekariah 13:1 ပူးပေါင်းရင်းမြစ်များ

Songs 51:2

Make me come all clean inside, Cuz wat I wen do, no was right. Make me come all clean inside Fo me pray one mo time.

Songs 51:7

Make me come clean inside Fo no do bad tings no moa! Jalike wen da pries guys make one sacrifice An sprinkle da blood Wit one oregano branch, Fo me come clean inside fo pray! Wash me good till I come Mo clean inside, Mo clean den da white snow!

Isaiah 12:3

Bumbye, all you guys goin feel good inside, Cuz Da One In Charge get you guys outa trouble, Jalike you guys stay good inside Wen you like drink watta, An you get um outa one puka.

Isaiah 4:4

My boss goin clean up All da pilau kine stuff da Jerusalem wahines wen do. Jalike he goin wash clean da Jerusalem peopo Cuz dey wen make plenny oddas bleed an mahke. His Spirit goin be dea judge An jalike wit one fire, he goin clean out all da bad kine stuff.

Jeremiah 17:13

You Da One In Charge, da One us Israel peopo wait fo! Erybody dat bag from you goin come shame. Da peopo dat no go yoa way, Ony get one place wea somebody goin write dea name: Az on top da dirt. Cuz dey wen bag from you, Da One In Charge. No matta you jalike one watta spring fo dem Wea da watta come out all da time an make peopo come alive.

Jeremiah 2:13

“My peopo wen do two real bad tings: Numba one, dey wen bag from me, No matta I jalike one watta spring Wea da watta come out all da time An make peopo come alive. Numba two, dey go wit odda gods, dass good fo notting. Jalike dey dig big holes fo hold watta, But no can hold da watta!

Jeremiah 29:26

‘Eh Zefaniah! Da One In Charge wen make you, an not Jehoiada, da pries guy dat stay in charge a da Temple Fo Da One In Charge. Any guy dat ack pupule, you suppose to put dea feets inside da wood shackle an put one iron strap aroun dea neck.

Jeremiah 33:8

I goin hemo dea shame an wash um clean inside, fo dem no mo blame fo da bad kine stuff dey wen do agains me.

Ezekiel 36:17

“Eh! Fo Real Kine Guy! Befo time, wen da Israel ohana peopo live inside dea land, dey make da land come pilau cuz a da way dey live. Dis da same kine pilau jalike da time ery month wen da Rules no let da wahine come in front me cuz she get her period.

Ezekiel 36:25

“Jalike I goin splash clean watta on top you guys an you guys goin come real clean inside. I goin make you guys come real clean from all da pilau kine stuff you guys wen do an from yoa idol kine gods.

Ezekiel 36:29

I goin get you guys outa all da bad kine stuff you guys do. I goin bring plenny wheat an barley by you guys, so you no goin be wit no mo food no moa.

Ezekiel 47:1

Da bronze looking guy bring me back by da gateway fo go inside da open lanai fo go inside da temple. Den I spock watta come out from unda da door fo da Temple. Da watta go east cuz da Temple face east. Da watta flow by da south side a da temple, an south a da altar.

Prieses 11:36

But if da mahke body a dat kine animal fall down inside one puka fo watta o one big hole fo keep watta, still can drink da watta. But anybody touch da animal body, dey no can come in front me.

Micah 5:12

I goin wipe out all da kahuna kine stuff you guys make. You guys no goin get nobody fo call da spirits Fo come tell you wat goin happen bumbye.

Zekariah 12:14

An all da odda ohanas goin cry, an dea wifes goin cry too.”

Zekariah 12:3

But dat time wen all da peopos inside da world goin go agains Jerusalem, I goin make da Jerusalem peopo come jalike one big rock dat nobody from all da odda peopos can move. Wen dey try move um, dey goin hurt ony dem.”

John 1:29

Da nex day John spock Jesus stay coming by him, an he tell, “Eh, you guys, try look da guy ova dea! You know wat? He jalike God bebe sheep fo da sacrifice. He hemo da shame fo da bad kine stuff dat erybody inside da whole world stay do!

John 5:4

Cuz you know, sometimes one angel guy from Da One In Charge go down inside da watta an make um move. Afta dat, da firs guy dat go inside da watta, he come good from wateva kine sick he get.]

1 Corint 6:11

Dass how some a you guys was befo time. But God, he make you guys come clean from all da bad kine stuff you wen do. He make you guys come spesho fo him an make you guys get um right wit him. All dat happen cuz you guys stay tight wit Da One In Charge. Az Jesus, God Spesho Guy. An you stay tight wit oua God Spirit too.

1 Peter 1:19

He wen pay fo you guys wit his blood! Dat cost mo plenny den eryting! He wen mahke, jalike one good kine bebe sheep dat no mo notting wrong wit um an dey kill um fo da sacrifice.

1 John 1:7

But if we do good kine stuff, dass jalike us stay inside da light, jalike God stay inside da light. Den us stay tight wit each odda. You know, Jesus, God Boy, he wen bleed an mahke, an dass jalike his blood make us come clean inside from all da bad kine stuff us wen do.

1 John 5:6

Jesus, he da Guy dat wen come wit watta, da time John wen baptize him. He come wit blood, da time dey wen kill him. He come, not wit watta ony, but wit watta an blood. God Spirit tell us dat dis stay true, cuz his Spirit erytime tell da trut.