Teacha 1:13 - Hawaii Pidgin Bible

¹³ I make up my mind fo study, an fo try see if da stuff work dat da peopo dat know wat fo do erytime tell. I do dis cuz I like figga out eryting peopo do unda da sky. God give erybody one real hard job fo do, az why!

Teacha 1:13 ပူးပေါင်းရင်းမြစ်များ

Start 3:19

You gotta bus ass an sweat Fo get enuff food outa da groun, An afta, you goin go back to da dirt Cuz I wen make you outa da dirt. You come from dirt, An you goin come dirt one mo time.”

Job 28:3

Wen peopo take light inside da dark mines, No stay dark no moa. Dey look inside da mos far places down dea. Dey look fo da right kine stones inside da mos dark places.

Songs 111:2

Real importan, all da tings Da One In Charge stay do. Da peopo dat stay good inside Cuz a da tings Da One In Charge do, Good dey try fo undastan Wat he stay do.

Smart Guys 18:1

Da kine guy dat no like somebody tell him wat fo do Look ony fo da kine stuff he like. He no make um so notting bodda him Wen you talk to him bout wass smart fo him do.

Smart Guys 18:15

Da peopo dat undastan good, Easy fo dem learn stuff. An da peopo dat know wat fo do erytime, Dey still try fo lissen new kine stuff fo learn.

Smart Guys 23:26

Eh my boy, let me teach you how fo tink good! Wen you watch how I stay live, I like you stay real good inside bout wat you see.

Smart Guys 25:2

Wen God hide tings fo us no see um, Da peopo show respeck fo him. Wen one king guy work hard Fo help da peopo undastan wass happening, Peopo show respeck fo dea king.

Smart Guys 4:7

You like come da kine guy Dat know wat fo do erytime? Dis, da numba one ting: Go all out fo learn wat fo do erytime, An eryting you learn, Make shua you undastan um.

Teacha 1:17

Den, I make up my mind fo undastan wat “fo know wat fo do erytime” mean, wat “fo ack pupule” mean, an wat “fo ack stupid kine” mean. But wen I find out wat all dat stuff mean, jalike I stay try fo catch da wind too.

Teacha 11:5

You donno wea da wind goin blow. An you donno how one bebe grow inside da muddah. Same ting, you donno wat God stay do. He da One wen make eryting.

Teacha 12:12

Eh my boy! Get anodda ting too: Make shua you no trus da odda kine stuff dat some peopo teach. Peopo write mo an mo books. Too much study make yoa body come weak.

Teacha 2:23

Ery day gotta work an suffa an stay sad inside, an even nite time my head get plenny stuff fo tink bout an no can res. Dis no make sense too.

Teacha 2:26

If somebody do stuff dat make God stay good inside, God goin make dem know wat fo do erytime, know plenny, an stay good inside. But fo da guy dat do bad kine stuff, God give um da job fo ony stack up plenny stuffs, fo dem give um to some odda guy dat make God stay good inside. Dis no make sense too. Dey ony stay chase da wind.

Teacha 3:10

I see wat God give peopo fo do.

Teacha 3:11

He make eryting happen jalike suppose to happen, fo da time wen suppose to happen. He make peopo tink bout wat maybe goin happen bumbye, but dey no can undastan eryting dat God stay do from da start till da end.

Teacha 4:4

An I stay tink bout all da hard work an eryting dat peopo stay do. An how come dey do um? Fo shua, cuz one guy tink he do someting mo betta den some odda guy do um. Dat no make sense too. Dey chase afta da wind.

Teacha 4:8

Get one guy dat no mo nobody by him. He no mo boy an no mo braddah. He work all da time. But he no stay good inside wit wat he get. He start fo tink lidis: “How come I stay work dis hard?! How come I no do notting dass good fun?!” Dat no make sense! Ony poho, aah?!

Teacha 7:25

So den I change my mind an try fo study stuff. I like learn mo, an find out wat fo do erytime, an figga out how come eryting happen. An I like know how come az stupid fo do bad kine stuff, An how come da stupid guys come pupule.

Teacha 8:9

I see all dis stuff, an I tink bout eryting peopo stay do unda da sun. Wen peopo boss aroun odda guys, dat hurt da boss guys too.

1 Timoty 4:15

Try do all dose tings erytime ova an ova. Go all out fo do um fo erybody see how you do um mo betta.