Songs 81:2 - Hawaii Pidgin Bible

² Start one song, bang da tammorine! Play da small harp dat soun nice, An da ten string one too!

Songs 81:2 ပူးပေါင်းရင်းမြစ်များ

2 Records 5:13

Da guys dat blow da trumpets an da guys dat sing, dey all play an sing togedda jalike one voice, fo tell Da One In Charge “Mahalo plenny!” an tell good stuff bout um. Dey sing togedda wit da trumpets, da cymbals, an da odda tings fo make da music, an dey sing good stuff bout Da One In Charge lidis: “Sing! Cuz Da One In Charge, he good Cuz he stay tight wit us guys foeva.” Right den an dea, Da One In Charge fill his Temple wit one cloud!

Nehemiah 12:42

Odda guys sing: Maaseiah, Shemaiah, Eleazar, Uzzi, Jehohanan, Malkijah, Elam, an Ezer. Da singa guys wen do one good job fo sing. Jezrahiah was da leada.

Songs 59:17

You, da one dat make me strong. I goin make music fo you, Cuz you jalike one high place Fo me hide! You da God dat stay tight wit me!

Songs 92:3

I stay play da ten-string harp An da twelve-string harp, I stay play da small harp Fo help me tink plenny bout you.

Outa Egypt 15:20

Den Miriam, dass Moses an Aaron sistah, she talk fo God too. She pick up one tammorine. She start fo dance, an all da odda wahines, dey go pick up tammorine too an dance in circle wit her.

Mark 14:26

Den dey sing one Song Fo God an go ova dea by da Olive Ridge.

Efesus 5:19

Den you goin talk to each odda wit songs from da Bible, an songs bout God, an da kine song dat God Spirit give you. An you goin sing an play fo Da One In Charge cuz dass how you like do um.

Colosse 3:16

Make all da stuff you know bout Christ come strong inside you guys. Use all da smarts you guys get fo teach each odda. Show each odda wat stay right an wat stay wrong. Sing an tell God “Mahalo plenny” from inside you, wit all kine songs, da kine Songs Fo God, da kine songs dat tell God Da One In Charge, an da kine songs dat God Spirit give us fo sing.

James 5:13

Anybody ova dea by you guys get trouble? Good dey pray! Anybody feel good inside? Good dey sing to God!