Songs 8:1 - Hawaii Pidgin Bible

¹ Eh! You Da One In Charge! You oua Boss! All ova da world, peopo know wat kine god you, Dat you stay awesome! You make da sky Fo show you da bestes!

Songs 8:1 ပူးပေါင်းရင်းမြစ်များ

1 Kings 8:27

“But you know wat, God? How you goin make house Hea on top da earth, aah?! No can! You, mo big den da mos high part a da sky! Fo shua, no way you can live down hea Inside dis Temple dat I wen build!

Songs 145:1

You da God fo me! You da King! I goin tell erybody dat you da one! All da time, I goin tell peopo Wat kine god you, Dat you do good tings!

Songs 148:13

Good, dey all tell good tings Bout Da One In Charge, Cuz dey know wat kine god him! Cuz he da ony one dat get One big name dass fo real, Fo be da mos awesome king In all da world an inside da sky!

Songs 36:5

Eh! You Da One In Charge! You get one good heart Fo help yoa peopo, You get one big heart, Big jalike da sky! You da kine God us guys can trus plenny, Jalike get plenny clouds inside da sky!

Songs 57:5

God, I like erybody know, Dat you mo big even den da sky! I like erybody on top da earth, Know how awesome you stay!

Songs 63:1

Eh God! You da God fo me! I stay look fo you. Me, I go all out fo find you, Jalike I go find watta wen I thirsty! I desperate fo see you, My body come weak, Till I find you! Jalike I stay one place Wea no mo rain an erybody tired Cuz no mo watta ova dea.

Songs 68:4

Sing fo God! Sing bout how him da bestes, Sing bout wat kine god him! Tell he da mos importan one, Da One dat ride on top da clouds, He get da spesho name “Yah!” Dance an sing in front him!

Songs 8:9

Eh! You Da One In Charge! You oua Boss! All ova da world, peopo know wat kine god you, Dat you stay awesome!

Songs 81:1

Yell fo oua God, Cuz you stay good inside An him da One make us guys strong! Make big noise fo God, Da one oua ancesta guy Jacob Wen pray to!

Songs 84:1

Eh! You Da One In Charge! Real nice looking, Da place wea you live! You da Boss Ova All Da Armies!

Outa Egypt 15:11

“Eh! You Da One In Charge! From all da gods dat get, No mo nobody jalike you! No mo nobody stay awesome jalike you, Da way you stay good an spesho Wen you do stuff az real awesome An awesome an unreal fo us!

Love Song 5:16

Inside his mout, stay sweet! Eryting bout him, make me like take him! Eh! You young Jerusalem wahines! Dis one, da one I love, an he my fren too!

Isaiah 26:13

Da One In Charge, you da God fo us guys! Befo time, get odda bosses stay in charge a us, not you. So us guys goin make shua Dat you, da ony one us goin tink bout An use yoa name.

Habakkuk 3:3

God come from Teman, south side. Da God Dat Stay Good An Spesho, Come from Mount Paran. (Time out fo da music.) He real awesome, jalike he shine all ova da sky. Da peopo all ova da world talk good bout him.

Matthew 22:45

“Kay den. David call God Spesho Guy ‘Boss,’ aah? Den how he can be David boy, same time?”

John 20:28

Thomas tell Jesus, “You, you Da One In Charge a me! You my God!”

Efesus 4:10

Da One dat come all da way down to da earth, he da same One dat go all da way up inside da sky. He go mo high den da sky fo show he da King fo eryting.

Rules Secon Time 28:58

“If you guys no make shua fo do eryting dat stay write down inside dis book, an if you no show respeck fo da good rep Da One In Charge get,

Philippi 3:8

But you know wat? I tink eryting ony wase time. Cuz now, I know fo real kine Da One In Charge a me, Jesus Christ! An dass mo betta! I wen lose eryting cuz I his guy, you know. An I figga, all dat kine stuff I jus wen talk bout, ony bullshit! Cuz I like come real tight wit Christ.

Hebrews 7:26

Jesus, he da right kine Main Pries Guy fo us guys: He stay good an spesho fo God. Nobody can poin finga him notting. He stay clean inside. He stay diffren den all da peopo dat stay do bad kine stuff. An God make him mo importan den eryting inside da world o inside da sky.

Jesus Show 19:6

Den I hear someting dat soun like get plenny peopo making big noise, jalike big watta pounding, an jalike loud thunda. Dey tell, “God, he da greates! Hallelujah! Cuz he Da One Dat Stay In Charge, An he da King ova erybody! He Da God Dat Get All Da Powa!