Songs 71:5 - Hawaii Pidgin Bible

⁵ You my boss, an I stay shua Dat bumbye you goin do Good tings fo me. Eh! You Da One In Charge! From da time I was one young boy, I still stay trus you.

Songs 71:5 ပူးပေါင်းရင်းမြစ်များ

1 Kings 18:12

But afta I leave you, I donno wea God Spirit goin pick you up an bring you. If I go tell Ahab dat you stay hea, an he no can find you hea, he goin kill me! No matta I yoa slave guy, an I get awesome respeck fo Da One In Charge from small kid time.

2 Records 34:3

Wen he stay king eight year, an he still young, he start fo try stay tight wit da God dat his ancesta David wen pray to. Wen he stay king twelve year, he start fo throw out from Judah an Jerusalem da sacrifice places on top da hills, da tiki poses fo da wahine god Asherah, an da idol kine gods dey carve an da gods dey make wit da metal dey melt.

Songs 119:166

Eh! You Da One In Charge! I stay wait fo you get me outa trouble. Da tings you tell me fo do, I do um.

Songs 119:81

Inside, jalike I litto mo poho Cuz fo long time You no get me outa trouble. I stay wait fo you fo do Da ting you wen promise fo do.

Songs 13:5

But me, I stay trus you, you know. You goin stay tight wit me cuz I yoa guy. Bumbye you goin get me outa trouble, An I goin dance an sing.

Songs 39:7

So den, Boss—wat I stay wait fo?! You da one I stay shua goin help me.

Songs 42:11

I tink lidis: “Eh! How come I stay all bum out inside? How come I stay moan?! Mo betta I wait fo God help me! Cuz you know wat? I goin get good tings fo tell Bout him still yet! Him, he da God fo me, An he stay get me outa trouble.”

Songs 71:17

God, from da time I was one young boy, You stay teach me, An now, I goin tell erybody Bout da awesome tings you do!

Teacha 12:1

So all da time you stay young, No foget da One dat wen make you— Tink bout him befo da time come Wen you come ol an get trouble, An befo da time you figga, “No mo notting make me feel good inside no moa!”

Jeremiah 14:8

You da One us Israel peopo wait fo. You da One stay get us outa trouble Wen we get hard time. So! How come you ack Jalike one guy from anodda place dat donno us?! How come you ack Jalike you ony stay hea one nite?!

Jeremiah 17:13

You Da One In Charge, da One us Israel peopo wait fo! Erybody dat bag from you goin come shame. Da peopo dat no go yoa way, Ony get one place wea somebody goin write dea name: Az on top da dirt. Cuz dey wen bag from you, Da One In Charge. No matta you jalike one watta spring fo dem Wea da watta come out all da time an make peopo come alive.

Jeremiah 17:17

No make me come sked a you! You jalike my city a refuge wen bad kine tings happen.

Jeremiah 17:7

“But fo da guys dat trus me, Da One In Charge, An stay shua I goin do wat I tell um I goin do, I goin do good kine stuff fo dem.

Jeremiah 50:7

Anybody dat find dose sheeps eat um up! Da ones dat stay agains my peopo tell: ‘Poin finga dem, not us guys, fo us eat um lidat! Cuz was dem, not us, dat wen do bad kine stuff agains Da One In Charge An Da One In Charge, he jalike da fo real kine grass land, He da fo real kine res place fo his sheeps. Da One In Charge, he da One dea ancesta guys wen wait fo.’

Luke 2:40

Da boy grow an come strong. He come akamai, an God do good tings fo him.

Rome 15:13

I like you guys stay real good inside an notting bodda you cuz you trus God. Him da God dat make you guys stay shua bout wat goin happen bumbye, fo eryting come out good kine. Den da Good An Spesho Spirit goin make you guys mo strong fo wait fo wat God goin do fo you guys bumbye.

2 Timoty 3:15

From small kid time, you know awready da tings da peopo from befo time wen write inside God Spesho Book, da Bible. You know dat dis stuff can make you come smart fo know how fo ack, an fo get you outa da bad kine stuff you do. Az why gotta trus God Spesho Guy Jesus Christ, an gotta stay tight wit him.

1 Samuel 16:13

So Samuel take da cow horn bottle wit oil inside, an pour um on top David, wit his braddah guys all aroun. Right den an dea, da Spirit from Da One In Charge take ova David, so from dat time he stay get da powa from Da One In Charge. Den Samuel go back home Ramah side.