Songs 23:4 - Hawaii Pidgin Bible

⁴ God, even if I go thru One real dark valley Wea can mahke dea, I no goin come sked Dat someting bad goin happen, Cuz you stay wit me. You carry one club Fo get me outa trouble, An one stick fo walk Fo show me wea fo go. An dat make me no worries Cuz eryting goin be okay.

Songs 23:4 ပူးပေါင်းရင်းမြစ်များ

Job 24:17

Dey all like da real dark nite, Cuz fo dem, az jalike morning time fo go work. Dey all know bout da skery kine stuff dat happen wen real dark!

Job 3:5

I like da shadows an da dark take ova dat day. I like da clouds come down on top um. An da black clouds take ova da light.

Songs 110:2

Da One In Charge stay On top Mount Zion, Jerusalem side, An he goin make you strong Fo be da king ova mo an mo peopo. No matta get peopo all aroun you Dat stay agains you, You da one goin be in charge.

Songs 118:6

Da One In Charge, he back me up. Az why I no need come sked notting. So wat odda peopo can do to me?! Notting!

Songs 138:7

No matta get trouble ery place I go, An da peopo dat stay agains me Stay huhu, You goin make shua I no mahke. You goin show yoa powa An bus dem guys up! You get da powa Fo get me outa trouble.

Songs 14:5

Cuz you know wat? Bumbye, someting goin happen Fo make dem guys come real sked. Cuz God stay ery place Wea get peopo dat stay do wass right. An he stay right dea wit dem.

Songs 3:6

No matta get ten tousan army guys Dat come agains me from all ova, I no sked.

Songs 44:19

Cuz jalike you wen bus up us guys An leave us inside one place Wea ony get wild dogs. Jalike you wen make eryting Dark aroun us.

Songs 46:11

Da One In Charge, Da God Ova All Da Armies, He stay right hea wit us guys! He da God Dat oua ancesta guy Jacob Wen pray to. He da One dat make shua Nobody attack us guys! (Time out fo da music.)

Isaiah 41:10

So no sked, Cuz you guys da one I stay wit. No come bum out, Cuz I yoa God. I make you guys come strong inside. Mo den dat, I help you guys. I no let you guys fall down! Az cuz I get plenny powa Fo do da right ting fo you guys.

Jeremiah 2:6

Dey neva even tink fo aks, ‘Wea Da One In Charge stay, Da One dat wen bring us guys hea outa Egypt? He da One wen bring us guys thru da boonies Wea up country eryting dry, An get plenny gulch wea no mo watta, An get real dark kine place wea can mahke. Wea no mo nobody go thru dea, An no mo nobody live ova dea.’

Micah 7:14

Den da peopo tell: “You Da One In Charge! Carry yoa club an come Jalike one sheep guy proteck his sheeps. Lead yoa peopo jalike dey yoa sheeps, Dey da peopo I wen give you jalike dey yoa property. Some a dem live wit nobody inside da fores, But now, give um fields wit green grass fo eat all aroun. I like dem make jalike sheeps Dat eat da green grass Bashan an Gilead side, Jalike befo time.”

Zekariah 11:10

Den I take da stick fo walk dat I call “I like um,” an broke um. Dat show dat da deal I wen make wit all da peopos no stay good no moa.

Zekariah 11:14

Den I broke my odda stick dat I call “Dey come togedda.” Dat mean, da Judah peopo south side an da Israel peopo no stay braddahs no moa.

Zekariah 8:23

An one mo ting: Dis wat Da One In Charge, Da God Ova All Da Armies, tell: “Dat time, fo ery Jew guy, goin get like ten odda guys from odda languages an peopos goin grab hold a his robe, an tell um, ‘Eh! Us guys like go wit you! Cuz us guys wen hear dat God stay wit you!’ ”

Matthew 1:23

“Lissen up! One young wahine Who neva sleep wit nobody, Goin get hapai. She goin born one boy. Dey goin name him Emmanuel.” (“Emmanuel” mean, “God stay hea now wit us guys.”)

Matthew 28:20

Teach um how fo do eryting I wen tell you guys fo do. An you know wat? I goin stay tight wit you guys ery day, till da world come pau.”

Luke 1:79

Da peopo dat stay do bad kine stuff, Jalike dey stay live inside da dark an no can see notting, An dey goin mahke inside, God goin help dem fo know da trut. Den us guys goin see da right way, An den notting goin bodda us guys.”

2 Timoty 4:22

I like Da One In Charge stay tight wit eryting inside you. An I like him fo do plenny good kine stuffs fo all you guys!