Songs 16:7 - Hawaii Pidgin Bible

⁷ I goin tell good tings bout Da One In Charge Cuz he da One show me how fo live. Even nite time, he make me know inside Weneva I jam up. Dass why I goin tell erybody Dat he do good tings fo me!

Songs 16:7 ပူးပေါင်းရင်းမြစ်များ

Songs 119:148

Nite time, my eyes stay open Fo me tink plenny Bout da tings You wen promise fo do.

Songs 119:55

Nite time, same ting, I tink plenny bout wat kine god you, Cuz you Da One In Charge. I stay do wat yoa Rules teach.

Songs 119:7

All da time I stay learn How you erytime judge peopo Da right way. Cuz a dat, I no goin hold back Fo tell good tings bout you!

Songs 17:3

You look inside me, An you know how I tink. Nite time, you come by me Fo tes me An see if get anyting pilau inside me, So you know no mo notting wrong. I make up my mind fo no tink bad kine tings. No way notting pilau goin come outa my mout,

Songs 22:2

Eh my God! Ery day I stay yell to you fo help me, But you no do notting fo help! Ery nite same ting, Dass why I no shut up!

Songs 42:8

Day time, Da One In Charge Stay show me Dat he stay tight wit me. He do dis fo do good tings fo me. Nite time, I get one song fo sing to him, Dat song, jalike one prayer To da God dat make me live.

Songs 63:6

Wen I lay down on top my bed, I tink bout you. I tink plenny how you stay.

Songs 73:21

Me, I wen come real sore inside, Jalike somebody wen stab my heart.

Songs 73:24

You stay teach me wass good fo do, Fo show me wea fo go. Bumbye you goin make me Come awesome.

Songs 77:2

Wen I get hard time, I pray to my Boss Fo him show me wat I gotta do. All nite, I put up my hands fo pray, An no come tired. But inside, I no can res.

Songs 77:6

I no foget how befo time I wen sing, nite time. I tink real plenny, An inside, I tink “Wassup?”

Smart Guys 8:14

“Me, I da one dat can teach peopo how fo make plan An fo tink real good bout eryting dey goin do. Me, I da Wahine Dat Undastan Stuff, An I get plenny powa.

Isaiah 26:9

All nite, I fo real kine tink bout you. An morning time, I go all out Fo know you fo real kine. Cuz wen you judge peopo an punish dem, Den peopo all ova da world Goin learn fo do wass right.

Isaiah 48:17

Dis one spesho message from Da One In Charge. Him, da One dat pay da price Fo get you guys outa trouble. He God, da Spesho One fo da Israel peopo. Dis wat Da One In Charge tell: “Me, Da One In Charge, yoa God. I da One stay teach you guys Wass da bestes kine stuff fo you. I stay show you guys da way fo go.

Isaiah 50:4

Da One In Charge a me, He make me know how fo talk fo him. He make me know wat fo tell da tired guys Fo dem come strong. He wake me up ery day morning time An make me lissen him real good, Jalike da peopo dat study plenny.

Jeremiah 12:2

You wen plant dem jalike one tree, An dey stay solid, an dey get strong roots. Dey get good kine stuffs, jalike one tree grow an get fruit. Dey erytime tell, ‘Da One In Charge stay tight wit us guys,’ But inside, dey no stay tight wit you.

Jeremiah 17:10

“Me, Da One In Charge, I da One dat know wat erybody tink. I tes how dey feel inside an wat dey like, So dis wat dey goin get from me fo wat dey do: Good if dey do good kine, O bad if dey do bad kine.

Luke 6:12

Dat time Jesus go up one hill fo pray. He stay dea an pray all nite.

Jesus Show 2:23

Fo shua, I goin kill erybody dat make jalike her. Den all da church peopo goin know dat I da One dat look inside da heart an da head an know wat erybody stay like, an wat dey tink, an I goin pay erybody fo wat dey do, good o bad.