Sad Song 1:17 - Hawaii Pidgin Bible

¹⁷ Da Zion peopo put out dea hands, But no mo nobody stay fo make dem feel mo betta. Da One In Charge tell dat fo da peopo dat come from Jacob, Da peopo dat live nea dem goin stay agains dem. Fo dose peopo, Jerusalem goin be jalike one pilau rag.

Sad Song 1:17 ပူးပေါင်းရင်းမြစ်များ

1 Kings 8:22

Den Solomon face da front a da altar wea dey make sacrifice fo Da One In Charge. All da Israel peopo dat wen come ova dea stan behind him. Solomon put up his hands to da sky fo pray.

1 Kings 8:38

But anybody dat pray to you, O beg you fo help dem From all da Israel peopo in da land, An all da ones dat stay pray Know dey stay sad inside, An dey put up dea hands An look dis way wea dis Temple stay,

2 Kings 25:1

So den, da year numba nine wen Zedekiah stay king, January 15, Nebukadnezzar da Babylon king go fo attack Jerusalem, him an all his army guys. He make camp outside Jerusalem, an make ready fo take ova da town. His guys make one strong wall all aroun Jerusalem so nobody can go inside o come outside.

Teacha 4:1

I look one mo time, an I see all da presha dat some peopo put on top odda peopo unda da sun. I see peopo cry, da ones get presha on top dem. No mo nobody fo help dem come so notting bodda dem. Da guys dat put presha on top dem get plenny powa. No mo nobody fo help dem come so notting bodda dem.

Isaiah 1:15

Wen you guys put up yoa hands fo pray to me I goin look da odda way. No matta you pray long time, I no goin lissen. Yoa hands stay dirty all ova From da blood a da peopo you wen kill.

Isaiah 54:11

Da One In Charge tell: “Eh my peopo! You guys get hard time now, Jalike one town dat get hard time, Jalike big storms stay poun da town. An nobody kea Fo give you guys good kine words. But you know wat I goin do, How I goin change all dat fo you guys?! Dis da picha! Jalike I goin build yoa bus up town Real nice dis time. Jalike I goin put blue lapis lazuli jewel stones On top da foundation, An put up da building stones Wit da kine mud dat cost plenny.

Jeremiah 12:9

Da peopo dat stay mines, Dey come jalike one scavenja dat like eat me. Jalike get wild hyenas, Wit scavenja birds all aroun um. Go bring all da wild kine animals fo eat up my peopo!

Jeremiah 15:5

Da One In Charge tell: “Who goin show pity fo you Jerusalem peopo? Nobody! Who goin cry fo you guys cuz dey stay sad inside? Nobody! Who goin go by you an aks how you stay? Nobody!”

Jeremiah 16:6

“Da importan peopo an da not so importan kine peopo, dey all goin mahke inside dis land. No mo nobody goin bury dem, an no mo nobody goin stay sad inside an cry fo dem. No mo nobody goin cut dea body o make dea head bolohead fo show dey stay sad inside.

Jeremiah 34:22

I tell dem right now fo come back Jerusalem town. Dey goin fight um an burn um up. I goin wase da towns Judah side fo no mo nobody live ova dea.’ ” Dass wat Da One In Charge tell.

Jeremiah 4:31

“I hear somebody yell jalike one wahine dat stay hurt plenny! She moan jalike she stay born her firs bebe. Az da Jerusalem peopo yelling! Jalike dey stay try fo breave but no can. Jalike dey put out dea hands an tell, ‘Bummahs! Help me! I goin pass out! Da guys dat like kill me stay hea!’ ”

Jeremiah 6:3

King guys goin bring dea armies Fo attack Jerusalem town, Jalike dey sheep guys Dat bring dea sheeps an goats ova dea. Dey goin put up tents all aroun Jerusalem. An ery army get one place fo put dea camp.

Jeremiah 8:18

Jeremiah tell, “I real sad! No way I can come good from dat! Inside, I come weak.

Sad Song 1:16

“Dass why I stay cry plenny. No mo nobody stay nea fo make me feel mo betta. No mo nobody stay hea fo make me come strong inside. My kids, no mo notting. Cuz da peopo dat stay agains us guys win awready!”

Sad Song 1:19

“I call out to da peopo I get love an aloha fo, But da way dey ack, no can trus um! My pries guys an my older leadas mahke inside Jerusalem, Wen dey stay look fo food Fo dem stay alive.

Sad Song 1:2

Jerusalem jalike one wahine dat stay cry real hard nite time. Get tears all ova da cheeks. Jalike befo time get plenny guys dat get love an aloha fo her, But now, no mo nobody fo make her feel mo betta. Jalike all her frenz sell her out. Jalike dey go agains her.

Sad Song 1:21

“Peopo hear me moan, But no mo nobody come fo make me feel mo betta. All da peopo dat stay agains me wen hear I get trouble, An dey dance an sing cuz a wat you, Da One In Charge, wen do. I like you make da tings happen dat you wen promise goin happen, Fo dem suffa jalike I suffa!

Sad Song 1:8

Da Jerusalem peopo wen do plenny bad kine stuff. Dey come pilau an no can go in front God. All da peopo dat wen show respeck fo dem, Now dose peopo make to dem jalike dey no worth notting. Az jalike da Jerusalem peopo stay naked. Dey moan an dey stay plenny shame.

Sad Song 1:9

Dey get da blame fo da bad kine stuff dey do. Az jalike if one wahine get blood on her skirts from her time ery month, Cuz she no tink bout wat goin happen bumbye. Da Jerusalem peopo, dey no tink bout wat goin happen to dem Cuz a da bad kine stuff dey stay do! Da wahine fall down, an dey drop dea jaws. No mo nobody can make her feel mo betta. She tell, “Eh! You Da One In Charge! Try look da hard time us guys get! Cuz da peopo dat stay agains us win awready!”

Sad Song 4:15

Da peopo yell at dem, “Go way! You pilau! Go way! No touch us!” Wen dey run away an go stagga all ova da odda lands, Da peopo ova dea tell, “Dey no can stay hea no moa!”

Ezekiel 36:17

“Eh! Fo Real Kine Guy! Befo time, wen da Israel ohana peopo live inside dea land, dey make da land come pilau cuz a da way dey live. Dis da same kine pilau jalike da time ery month wen da Rules no let da wahine come in front me cuz she get her period.

Hosea 8:8

Az jalike odda peopo swallow da Israel peopo. Now da Israel peopo come jalike one a da odda peopos Dey jalike one ol pot dat not worth notting!