Rules Secon Time 8:2 - Hawaii Pidgin Bible

² No foget how oua God, dass Da One In Charge a us, wen bring you guys all da way inside da boonies fo forty year. He do dat so you guys no mo big head, an fo tes you guys fo find out how you guys tink, if you guys goin do wat he tell you guys fo do, o not.

Rules Secon Time 8:2 ပူးပေါင်းရင်းမြစ်များ

Start 22:1

Long time afta, God tes Abraham. He tell um, “Eh Abraham!” Abraham tell, “Yeah, I stay hea.”

2 Records 32:31

But layta, get messenja guys come from da Babylon leada guys. Dey come inside da land fo aks Hezekiah bout da awesome sign he wen get dat he goin come good. Dat time, God go way from Hezekiah fo tes him, fo find out eryting Hezekiah tink bout fo real kine.

2 Records 33:12

Manasseh suffa plenny. So den, he go pray to his God, Da One In Charge. He tell God fo help him, an he come notting in front da God fo his ancesta guys.

2 Records 33:19

Da guys dat can see wass goin happen, dey write um all down. Dey write wat Manasseh tell wen he pray, an how Da One In Charge lissen him. Dey write all da bad kine stuff he do wen he stay agains Da One In Charge. Dey write bout da sacrifice places he build on top da hills, an bout da tiki poses he put up fo da wahine god Asherah an da idol kine gods, befo he come notting in front Da One In Charge.

Nehemiah 9:19

“Cuz you get plenny pity fo dem still yet, You neva go way an leave dem Ova dea inside da boonies. Da cloud dat go from da groun to da sky fo show um wea fo go Neva go way from dem. Nite time, da fire dat go from da groun to da sky Give um light fo see da way dey goin go.

Job 33:17

He do dat fo turn peopo away from da kine stuff dey do. He no let dem get big head.

Songs 103:2

I tink lidis: “Tell erybody dat Da One In Charge, He da One give me da powa Fo do eryting!” An I no goin foget All da good tings he do fo me.

Songs 106:7

Da time oua ancesta guys Stay Egypt side, Dey neva undastan Da awesome tings you wen do. Dey foget how plenny Da nice kine stuff you wen do. Dey even wen go agains you Dat time dey stay nea da Red Sea!

Songs 136:16

Da One In Charge, He wen take his peopo Thru da boonies wea nobody live, Cuz he stay tight wit his peopo foeva!

Songs 77:11

But you know wat, Da One In Charge?! I goin no foget all da tings You wen do awready. I goin tink bout Da awesome kine stuff You wen do befo time.

Songs 81:7

Wen you was presha out, You wen yell to me fo help you. An I wen get you outa trouble. I was dea, but you neva see me, I stay hide in da middo A da thunda cloud. An you wen call, An I wen do plenny fo you. Den, Meribah side, Da place wea no mo watta, I wen tes you Fo find out If you goin trus me, o wat. (Time out fo da music.)

Outa Egypt 15:25

Moses yell fo help to Da One In Charge an he show Moses one tree. Moses take one branch an throw um inside da watta, an da watta come good fo drink. Den God make one rule fo da peopo dat stay dea. Same time, God check out da peopo fo know if dey goin stick wit him.

Outa Egypt 16:35

Da Israel peopo eat da manna fo forty year, all da time till dey get to da land wea dey goin make house. Wen dey come jus outside da Canaan land, den no mo da manna no moa.

Outa Egypt 16:4

Da One In Charge tell Moses, “You know wat I goin do? I goin make bread come down outa da sky fo you guys jalike rain. Ery day, da peopo goin go out an pick up food from da groun. Dey gotta ony pick up enuff fo dat day. Dass fo check out da peopo, fo find out if dey goin stay do how I teach um fo do, o not.

Outa Egypt 20:20

Moses tell da peopo, “No sked! You guys know how come God come hea? He stay hea fo put presha on you guys fo you learn someting! An he like you guys no foget how you feel wen you stay sked a him, cuz if you get awesome respeck, bumbye you no goin go do someting bad.”

Smart Guys 17:3

Fo find out if silva an gold, good o no good, Gotta melt um on top da fire. But Da One In Charge, he da One Tell how peopo tink.

Isaiah 2:17

Anybody stay get real high nose, Dey goin come notting. Anybody ack real high makamaka, Dey goin come shame. Dat time, Da One In Charge da ony One Da peopo goin talk good bout.

Jeremiah 2:6

Dey neva even tink fo aks, ‘Wea Da One In Charge stay, Da One dat wen bring us guys hea outa Egypt? He da One wen bring us guys thru da boonies Wea up country eryting dry, An get plenny gulch wea no mo watta, An get real dark kine place wea can mahke. Wea no mo nobody go thru dea, An no mo nobody live ova dea.’

Ezekiel 20:19

Me, I yoa God, Da One In Charge. Stick wit da rules I wen make, an wit wat I tell you guys bout wass right an wass wrong.

Amos 2:10

But wot! Was me dat wen bring you guys Outa da Egypt land to dis side. Forty year, I wen show you guys wea fo go inside da boonies Fo you guys take ova da land from da Amor peopo.

Census 14:33

Yoa kids goin take kea sheeps ova hea inside da boonies fo forty year. Dass how long you guys goin suffa, cuz you guys fool aroun ova an ova wit odda gods, till da las mahke bodies stay inside da boonies.

Luke 18:14

Jesus tell, “I tell you, wen dis tax guy go home, he get um right wit God awready. But not da Pharisee guy. Cuz whoeva make jalike he importan goin come not importan, an whoeva make jalike he not importan goin come importan.”

John 2:25

He neva need nobody fo tell um how da peopo stay, cuz he know how dey stay inside.

Rules Secon Time 1:3

But dat time, was forty year afta da Israel peopo come outa Egypt, an was winta time. Dass wen Moses tell da Israel peopo eryting Da One In Charge tell him he suppose to tell dem.

Rules Secon Time 1:33

Da One In Charge wen go in front you guys inside one fire nite time, an inside one cloud day time. He even look fo you one place wea you guys can make camp nite time! Az how he show you guys wea fo go.

Rules Secon Time 13:3

If dass how dey talk, den you guys betta not lissen dat talka guy o da guy dat dream. Cuz yoa God, Da One In Charge, he da One stay tes you fo find out if az fo real you get love an aloha fo him wit eryting inside, wit how you feel, an wit how you tink.

Rules Secon Time 2:7

An Moses tell, “Cuz oua God, Da One In Charge, do plenny good stuff fo us guys, an make eryting us guys make come out good. He take kea us guys inside da big boonies. He stay wit us guys fo all dis forty year, an us neva need notting eva.

Rules Secon Time 29:5

Moses tell dat Da One In Charge tell, “All da time fo forty year dat me Da One In Charge wen lead you guys inside da boonies, yoa clotheses an yoa slippas neva come boros.

Rules Secon Time 32:7

Tink bout da time long time befo time. Tink bout all yoa ancesta guys dat wen stay alive befo time. Go aks yoa faddah fo tell you wat wen happen. Go aks da older peopo fo tell you too.

Rules Secon Time 7:18

No sked a dem! You guys gotta rememba, an no foget, wat oua God, dass Da One In Charge a us, wen do to Pharaoh an all da Egypt peopo.

Rules Secon Time 8:16

He da One give you guys manna fo eat inside da boonies. Yoa ancesta guys neva see o know wat was manna befo time. He give um to you guys fo make you guys no come big head, an tes you guys fo find out how you guys goin ack. Az how bumbye he goin make eryting come good fo you guys.

James 1:3

Cuz you know, afta you guys go thru all dat real hard time, an you guys still yet trus God, den dat goin make you guys hang in dea mo betta.

James 4:10

No make jalike you mo betta den da odda guys da way Da One In Charge see you. Den, he goin make you come somebody fo real kine.

James 4:6

But God like do even mo plenny good tings still yet. Az why da Bible tell, “God stay agains da guy Dat get big head. But da guy dat make shua he da las one, An put da odda guy befo him, God goin do plenny fo dat guy.”

1 Peter 1:7

All dis happen fo erybody see dat you guys trus God fo real. Jalike dey put gold inside da fire fo wipe out all da junk stuff. Dass how come you guys suffa now. Dass fo wipe out all da junks you guys get inside, an fo show erybody dat you guys trus God fo real. All dat mo betta den gold. Cuz bumbye wen Jesus Christ come back, da peopo goin tell how awesome he stay, an dey goin get plenny respeck fo him.

Jesus Show 2:23

Fo shua, I goin kill erybody dat make jalike her. Den all da church peopo goin know dat I da One dat look inside da heart an da head an know wat erybody stay like, an wat dey tink, an I goin pay erybody fo wat dey do, good o bad.

Local Leadas 2:22

I goin use dose peopos fo tes da Israel peopo. Dass how I goin find out if dey goin stay tight wit me, Da One In Charge, an live how I tell um fo live, jalike dea ancesta guys wen do, o wat?”

Local Leadas 3:4

(Da One In Charge let dose peopos stay dea fo make one tes fo da Israel peopo. He like find out if dey goin lissen wat he tell um fo do, jalike da stuff he wen give Moses fo tell dea faddah guys.)