Rules Secon Time 28:25 - Hawaii Pidgin Bible

²⁵ “Da One In Charge goin make da peopo dat stay agains you guys win ova you. You goin go fo attack dem from one place, but run away from dem to seven places. Peopo in all da diffren countries on top da earth goin come bum out wen dey tink bout you guys.

Rules Secon Time 28:25 ပူးပေါင်းရင်းမြစ်များ

1 Kings 8:33

“An bumbye, yoa Israel peopo Goin go do bad kine stuff An go agains you. Cuz a dat, da peopo dat stay agains dem Goin fight um an win. But wen yoa peopo turn aroun An come back to you, An tell dat dey yoa peopo fo real kine, An dey come dis Temple fo pray to you An beg you fo help dem,

2 Records 28:8

Da Israel guys catch 200,000 wifes, boys, an girls from dea braddahs da Judah guys. Dey make um prisonas, an dey take plenny stuffs from dem too, dat dey carry back Samaria side.

2 Records 29:8

Az why Da One In Charge stay real huhu wit da Judah an Jerusalem peopo. He make dem da kine peopo dat odda peopo come bum out wen dey tink bout dem. An he make odda peopo stay sked cuz a wat wen happen to dem, an shake dea head at dem. You can see all dis.

2 Records 6:24

“Bumbye maybe yoa Israel peopo goin fight peopo dat stay agains dem. But dat time, maybe yoa guys no can win cuz dey wen do bad kine stuff agains you. But maybe dey change dea mind. Now dey tell, dat you dea Boss fo real. An dey pray to you inside dis Temple an aks you fo make good to dem one mo time.

Isaiah 30:17

One tousan a you guys goin run away Wen one a dea guys tell dat he goin hurt um. An if five a dea guys tell dat dey goin hurt you guys, All da res a you guys goin run away, Till you da ony one stay dea. Goin be jalike one pos Dass da ony ting stan on top one mountain, Jalike one flag on top da hill.

Jeremiah 19:7

“ ‘Right hea, I goin jam up da plans dat da Judah peopo an da Jerusalem peopo make. Da guys dat stay agains da Judah peopo, an like kill um, dey goin kill da Judah peopo wit swords. An I goin make dea mahke bodies come food fo da birds inside da sky an da wild animals on top da earth.

Jeremiah 24:9

I goin make to dem jalike peopo make to rotten figs, so all da odda kings inside da world an dea peopo goin tink horraz bout dem. Dey goin talk bout dem jalike da rotten fig nobody like. Dey goin make fun a dem. An dey goin use dea name fo put kahuna on top peopo wea eva I sen dem.

Jeremiah 29:18

I goin chase um wit war, an take away dea food, an give um one bad kine sick. I goin make all da king guys on top da earth an dea peopos come shock cuz a dem, an tink horraz bout dem an use dea name fo put kahuna on top odda peopo. Erybody goin shake dea head cuz a dem. All da peopos wea I make dem go, goin make fun a dem.

Jeremiah 34:17

“Az why dis wat Da One In Charge tell: ‘You guys no lissen me. You guys neva let yoa braddahs da Jew slave guys go fo real kine. So now, me Da One In Charge, I goin let you guys go too—so you goin mahke from war, from da bad kine sick, an from no mo food. I goin make all da countries all ova da world an dea kings come bum out wen dey tink bout you guys.

Ezekiel 23:46

“Dis wat Da One In Charge, da Boss, tell: Bring one army agains dem an give da army guys da right fo make um come sked an rip um off.

Hosea 8:3

But da Israel peopo like throw out wat stay good. Dass why da peopo dat stay agains dem goin go afta dem.

Prieses 26:17

I goin go agains you guys fo da guys dat stay agains you guys win ova you guys an come yoa boss. You guys goin run away, even wen no mo nobody stay chase you.

Luke 21:24

Peopo goin kill some wit swords, an take oddas away. Peopo all ova da world goin make um prisonas. Da peopos dass not Jew guys goin bus up Jerusalem an walk all ova um, till dea time pau.

Rules Secon Time 28:7

“Da One In Charge goin make you guys win ova da guys dat stay agains you guys, wen dey come fo attack you. Dey goin come fo you guys from one side, but dey goin run away to seven places wen you chase um.

Rules Secon Time 32:30

Dey no tink how come one army guy Make one tousan Israel army guys run away! O how come two a dea army guys Make ten tousan Israel army guys run away! Ony one way dat can happen! Gotta be, Da One In Charge bag from dem! Da One dat befo time stay strong Jalike one Rock fo dem, But now, he give up on dem!

Joshua 7:4

So ony bout three tousan army guys go up dea. But da Ai guys chase um away from da town gate.

Local Leadas 2:14

Da One In Charge stay huhu wit da Israel peopo. So he let some steala guys go rip dem off. Az jalike he sell dem to da peopo dat live all aroun dem an hate dem. Da Israel peopo no mo da powa fo stop da steala guys.

1 Samuel 4:10

So da Filisha army go fight. An you know wat?! Dey win ova da Israel guys! Thirty tousan Israel infantry guys mahke dat time, an all da oddas run away, back to dea tent. Da Filisha army beat um up good!