Rules Secon Time 16:19 - Hawaii Pidgin Bible

¹⁹ No judge da wrong way, an no make mo spesho fo some peopo. No take money from peopo fo you do tings fo dem. Cuz dat make da peopo dat know wat fo do erytime jalike dey no can see, an make da peopo dat do wass right erytime jalike dey donno notting.

Rules Secon Time 16:19 ပူးပေါင်းရင်းမြစ်များ

Songs 15:5

Dey no charge extra interes Wen dey lend money. Dey no take dirty money From somebody dat like hurt one guy Dat neva do notting bad.” Dass wat God tell. Dat kine peopo, dey da ones Dat goin stan solid foeva!

Outa Egypt 18:21

Same time, from all da peopo, go find an pick guys dat can handle dis job. Pick da kine dat stay sked weneva dey stay in front God cuz dey get awesome respeck fo him. Dey gotta be da kine guys you can trus, an dat no goin make any kine jus fo get plenny money. Make some a dem da main leada guys fo tousan peopo, an odda ones da main leada guys fo hundred peopo, fifty peopo, an ten peopo.

Outa Egypt 23:2

Even if get plenny peopo tell da same ting, no go togedda wit dem fo help um do someting bad. Wen you go in front da judge, no follow da oddas jus fo make um come good fo yoa frenz.

Outa Egypt 23:3

Same ting, if one guy dat no mo notting come in front da judge, no go make diffren kine to him, jus cuz da guy no mo notting.

Smart Guys 15:27

Da guys dat go all out fo make money, Dey make pilikia fo dea ohana. Da guys dat no touch Da unda da table kine money, Nobody goin try kill dem.

Smart Guys 17:23

Da bad guys, dey give money unda da table Fo make shua da judge no judge da right way.

Smart Guys 18:5

No good, one judge ony lissen To da guy dat do someting bad, An no lissen da guy dat stay hurt. Same ting, no good, if one judge go agains Da guy dat do wass right, An no do fo him wass right.

Smart Guys 24:23

An now, some odda tings from da guys dat know wat fo do erytime: Wen you da judge, No good you judge diffren kine fo some peopo.

Smart Guys 24:28

No go in front da judge An tell um wat you wen see anodda guy do, If da guy neva do notting. O if you gotta tell da judge someting, No bulai.

Smart Guys 31:5

Bumbye wen dey drink, dey foget bout da rules from long time befo, An dey change um so da rules no good fo da peopo dat suffa plenny.

Teacha 7:7

If one guy dat know wat fo do erytime scam somebody, goin make him come stupid. If he put presha on anodda guy fo give him money unda da table, dat goin jam up how he stay inside.

Isaiah 1:17

Learn how fo do wass good. Go all out fo do wass right. Kokua da peopo dat need help Fo da bad tings da bad guys do to dem. Da kids dat no mo faddah o muddah, help dem. Talk in court fo help da widow wahines.”

Isaiah 1:23

Yoa leada guys, dey go agains me. Dey hang aroun wit steala guys. Dey all like get unda da table kine money Fo eryting dey do. Dey no make jalike one good judge Fo kokua da kids dat no mo faddah o muddah. Dey no even tink notting Bout kokua da widow wahines.

Isaiah 33:15

Da peopo dat no need stay sked, Dey da ones stay do da right kine stuff, An tell wat stay right. Dey no presha peopo Fo take dea stuff fo come rich, An dey no even touch Da unda da table kine gif, Dey make deaf ear Wen peopo plan fo kill somebody. An no make jalike dey donno Wen somebody like do bad kine stuff.

Jeremiah 5:28

Dey come momona an dea skin come nice. Dey do plenny bad kine stuff an no stop. In front da judge dey no try help da kids dat no mo faddah Fo make shua da kids get wat dey suppose to get. Dey no do notting Fo help da pooa peopo dat need help get dea rights.”

Ezekiel 18:8

He no loan money fo him get plenny mo money back, o take extra money on top dis. He hold back his powa fo do stuff dat no stay pono. Wen he judge, he make same same to erybody.

Ezekiel 22:12

Inside yoa town get guys dat take unda da table money fo go kill somebody. You lend money but charge choke plenny interes, an scam odda peopo. An you guys wen foget me too. Az wat me Da One In Charge, da Boss, tell.

Prieses 19:15

“Wen you guys judge peopo, make shua you do um da right way an make um even. No make diffren kine to da guys dat no mo notting an da guys dat stay rich. Make fair fair to erybody wen you judge odda peopo.

Micah 7:3

Fo do bad kine stuff, dey go all out! Da alii guys aks fo gifs fo make dem come rich. Da judge guys aks fo unda da table kine money fo do dea job. Da importan guys tell wat dey like erytime. Dey all make plan togedda fo do um.

Habakkuk 1:4

Az why da Rules come all jam up, An da judge guys make shua da guys Dat do wass right no win. Da bad kine peopo no let da good kine peopo Do wat dey suppose to do. Da bad guys make da right way come all kapakahi.”

Jesus Guys 10:34

Den Peter start fo talk. He tell um, “Now I know fo shua dat God treat erybody same same.

Jesus Guys 16:37

But Paul tell da police guys, “Dey wen whip us in front all da peopo, but dey neva even check fo find out if we wen do someting wrong. An dey throw us inside da jail. But us guys get da same rights jalike da Rome peopo too, you know. An now dey like throw us out so nobody know. No ways! Da govmen guys, dey da guys gotta come hea an take us outside.”

Jesus Guys 23:3

Den Paul tell him, “God goin wack you. You jalike one wall dey cova wit white kine paint. You sit dea fo judge me jalike da Rules From God tell, but den, you broke da Rules From God too, cuz you tell da guys fo slap me!”

Rules Secon Time 10:17

Cuz oua God, dass Da One In Charge a us, he da real God mo den all da odda gods, an he da real Boss mo importan den all da odda bosses. He da big an strong God, an you betta be sked a him. He no make to one guy mo betta den da odda guy, an you no can pay him fo make him do spesho stuff fo peopo.

Rules Secon Time 16:18

Pick local leada guys an govmen guys fo all da ohanas inside ery town dat yoa God, Da One In Charge, stay give you guys. Dey goin judge da peopo, an do um da right way.

Rules Secon Time 24:17

Make shua you guys do da right ting fo da peopo from anodda place, an fo da kids dat no mo faddah o muddah. No take away da coat from one wahine dat no mo husban an keep um till she pay you back wat she owe you.

Rules Secon Time 27:19

“Da Levi guys goin tell dem: ‘God goin punish whoeva no make right in front da judge to one guy from some odda place, one kid dat no mo faddah o muddah, o one wahine dat no mo husban.’ “All da peopo goin tell: ‘Az right!’

Rules Secon Time 27:25

“Da Levi guys goin tell: ‘God goin punish anybody dat take money unda da table fo kill somebody dat neva do notting bad!’ “All da peopo goin tell: ‘Az right!’

1 Samuel 12:3

I stan hea right now, in front Da One In Charge an da guy dat Da One In Charge wen pick fo be da king. If anybody get someting fo tell, okay fo dem poin finga me right now. I wen rip off somebody cow, o wat?! O somebody donkey? I wen scam somebody? I wen put presha on somebody? I wen take silva from somebody fo shut my eyes, o wat?! If I wen make lidat to somebody, right now, I goin make um come pono fo dem!”

1 Samuel 8:1

Dat time, wen Samuel come ol, he make his boys come da local leada guys fo all da Israel peopo.

1 Samuel 8:3

But Samuel boys no do stuff jalike dea faddah. Dey go da wrong way fo da money. An dey take unda da table money too! Dey suppose to judge wass right an wass wrong. But erytime, dey make shua dat dey judge da wrong way.