Rules Secon Time 13:16 - Hawaii Pidgin Bible

¹⁶ Bring all dea stuffs an put um all inside da middo a da town. Den burn up da whole town an all da stuffs. Az goin be jalike one sacrifice dass ony fo yoa God, Da One In Charge. Da town goin stay one rubbish pile foeva. Nobody goin build dea one mo time.

Rules Secon Time 13:16 ပူးပေါင်းရင်းမြစ်များ

Outa Egypt 22:19

Anybody go make sex wit one animal, gotta kill da guy o wahine.

Isaiah 17:1

Me, Isaiah, I get heavy kine stuff fo tell bout wat I see goin happen to da Damascus peopo: Look! Damascus no goin be one big town no moa. Da whole place goin come one pile a bus up junks.

Isaiah 25:2

I goin tell dat you da greates, Cuz get big towns dat you bus up An make um come one pile a rubbish. Get strong towns wea da army guys no can come inside, You make um all fall down. Da place inside odda countries Wea da peopo build palace, No even get one mo town dea now. No way dey goin build um up one mo time.

Jeremiah 49:2

But Da One In Charge tell: “Az why da time goin come Wen I goin make erybody hear Da trumpet blow fo war Agains Rabbah town, Da main town fo da Ammon guys! Rabbah goin come one big pile a dirt Cuz all da houses goin come bus up. All da towns aroun Rabbah goin burn down. Den da Israel guys goin kick out Da Ammon guys dat wen kick dem out befo time.” Dass wat Da One In Charge tell.

Ezekiel 26:14

I goin make you guys islan come one big bare rock fo ony come one place fo lay net. No mo nobody goin build you back up one mo time. Cuz az me Da One In Charge, da Boss, tell dis.

Micah 1:6

Da One In Charge tell: “Az why I goin bus up Samaria, An make um come one big pile rocks in da countryside, Goin come one flat place fo plant grapes. Da stones dey use fo build, I goin roll um all down da valley. An I goin leave ony litto bit dirt wea dey wen build house.

Rules Secon Time 7:25

You guys goin burn up dea idol kine gods inside da fire. No make jalike you like take da silva o gold on top da idols, an no take dat fo you. Cuz all dat kine stuff no good, an can catch you guys jalike az one trap. Fo yoa God, Da One In Charge, all dat kine stuff pilau.

Rules Secon Time 7:26

No take one idol kine god inside yoa house cuz az pilau da way Da One In Charge see dat. If you take um inside, Da One In Charge goin put kahuna on top you guys fo wipe you out jalike you one sacrifice fo him, jalike he goin wipe out da idol. You guys gotta hate dat kine pilau stuff fo real kine, an no take um, cuz Da One In Charge goin wipe um out jalike dass one sacrifice fo him.

Joshua 6:21

Dey make da town spesho fo Da One In Charge, jalike az one big sacrifice. Da Israel guys wipe out eryting inside um—da guys, da wahines, da young guys, da ol guys, da cows, da sheeps, an da donkeys.

Joshua 6:24

Den dey burn down da whole town an eryting inside um. But da silva, gold, an da bronze an iron stuffs, dey put um togedda with da odda rich stuffs fo Da One In Charge house.

Joshua 6:26

Dat time, Joshua make dis strong promise fo erybody know dat God goin do um: “If somebody like go build Jericho town one mo time, in front Da One In Charge I tell dis: Goin cost him plenny. If he put down da foundation, his firs boy goin mahke, an if he put up da gates, his las boy goin mahke.”

Joshua 8:28

Az how Joshua dem burn Ai an make um one small hill wit ony rocks an junk—one place wea nobody can live.