Rules Secon Time 12:2 - Hawaii Pidgin Bible

² Broke down all da sacrifice place on top da high mountains an hills, an unda ery tree dat get plenny green leaf. Dis da kine place wea da peopo dat stay dea, go down in front dea gods. But you guys goin take ova dea land.

Rules Secon Time 12:2 ပူးပေါင်းရင်းမြစ်များ

1 Kings 14:23

Dem guys make spesho kine places on top da high part a da hills fo make sacrifice, an dey stan up big stones fo make places fo pray, an put poses fo pray to da wahine god Asherah, on top da high part a ery hill an unda ery big tree dat get plenny leaf.

1 Kings 3:2

Ony one ting—dat time, all da peopo still stay make sacrifice on top da hills, cuz dey still yet no build one temple fo Da One In Charge, fo show erybody wat kine god him.

2 Kings 11:18

Den all da peopo inside da land go by da Temple Fo Baal, an bus um up. Dey smash da altars an da idol kine god statues real small. Dey kill Mattan, da pries guy fo Baal, in front da altars. Den Jehoiada da pries guy put guard guys in charge a da Temple Fo Da One In Charge.

2 Kings 16:4

Plenny time, Ahaz go by da local sacrifice places an make sacrifice an burn incense dea fo da idol kine gods. Get plenny sacrifice place on top da hills an unda ery big shade tree.

2 Kings 23:13

An da king make um fo nobody use da sacrifice places on top da hills across Jerusalem, da south side a da Olive Ridge. Solomon, da king fo da Israel peopo, wen build dose places fo Ashtoret, da pilau wahine god fo da Sidon peopo, fo Kemosh, da pilau god fo da Moab peopo, an fo Molek, da god dat erybody hate, da pilau god fo da Ammon peopo.

Songs 78:58

Wen dey make place fo pray On top da hills, Dey make God feel bad. Dey go down an pray To dea idol kine gods, An dat make God come jealous.

Outa Egypt 23:24

You betta not go down in front dea gods fo pray to dem, an you betta not let dose peopo make you do stuff fo dea gods, da way dey make. You gotta broke up dea idol gods, an smash da big stones dat dey set up fo dem pray in front.

Isaiah 36:7

An if you guys tell me, ‘Us guys trus oua God, dass Da One In Charge a us,’ tink bout dis: Hezekiah, he da one wen take down da sacrifice places an da altars wea you guys pray to Da One In Charge! Hezekiah wen tell da peopo inside Judah an Jerusalem, ‘You guys gotta go down in front Da One In Charge, ony in front dis Jerusalem altar,’ aah?

Jeremiah 17:2

Even dea kids no foget fo pray in front da altars fo odda gods, An in front da tiki poses fo da idol kine wahine god Asherah, An undaneat ery big tree dat get plenny leaf An on top da high hills.

Jeremiah 2:20

“Long time befo time you guys wen no do wat I tell you fo do, Jalike one cow dat broke off da yoke fo pull da wagon, An broke da ropes dat tie um. You guys wen tell, ‘Us no goin work fo you!’ Fo shua, unda da trees wit plenny leaf on top ery big hill, You guys ack jalike da wahines Dat make sex dea fo get money.

Jeremiah 3:13

But one ting I tell you guys gotta do— You gotta tell wat you wen do az wrong, An dat you guys wen go agains me, yoa God, Da One In Charge, An dat you guys fool aroun all ova da place Wit odda peopo gods, Unda all da trees dat get big shade. An wen I talk, you guys no lissen, you make deaf ear! Az wat Da One In Charge tell.’ ”

Jeremiah 3:2

“Look up da high mountains Wea no mo plants grow cuz erybody go dea. You guys goin see all da sacrifice places dea Wea you wen go fool aroun in front da odda gods! You guys sit by da roads An wait fo somebody you can fool aroun wit, Jalike da steala guys from da dry boonies Stay wait fo jump somebody. You guys make da land pilau, Cuz you do real bad kine stuff Wen you stay fool aroun wit da odda gods.

Jeremiah 3:6

Da time Josiah stay king, Da One In Charge tell me, “You see wat da Israel peopo wen do? Dey ack jalike one wahine dat no stay tight wit her husban. Dey go up on top all da high hills an unda ery tree dat get big shade, an go fool aroun dea in front da odda gods, jalike da hoaz.

Hosea 4:13

Dey make sacrifice on top da mountains. Dey burn incense on top da hills, Unda da oak tree, da poplar tree, an da terebint tree, Dey do um wea get good shade. “Az how come yoa girls come hoaz, An az why yoa daughtah-in-laws go fool aroun Behind dea husban back.

Census 22:41

Da nex morning, Balak take Balaam up by Bamot Baal, an from dea he can see some a da Israel peopo.

Rules Secon Time 7:5

“Az why dis wat you guys gotta do to dem: Broke down dea altars, smash da big kapu stones dey put up fo da Baal god, cut down da kapu poses dey put up fo da Asherah wahine god, an burn up dea idol kine gods inside da fire.

Local Leadas 2:2

An you guys, you not suppose to make one deal wit da peopo inside dis land. You guys suppose to broke down dea altars. But you guys no lissen! How come you guys make lidat, aah?!