Rome 8:35 - Hawaii Pidgin Bible

³⁵ You tink get somebody can cut us guys off from da love an aloha Christ get fo us guys? No ways! You tink presha, hard time, o wen get somebody dat like hurt us, o wen no mo notting fo eat, o no mo clotheses, o wen we sked, o wen we get peopo dat like kill us, dat can cut us guys off? Not even!

Rome 8:35 ပူးပေါင်းရင်းမြစ်များ

Songs 103:17

But Da One In Charge, He stay tight wit his peopo From long time befo time, An till long time from now, Da ones dat get choke respeck fo him. Da peopo dat stick wit da deal God wen make, An no foget fo do Da tings he wen tell um fo do, He goin do wass right fo dem An fo dea kids an grankids too!

Love Song 3:4

Right afta I go way from dem, I find da one dat I go all out fo love. I hold him an no let him go away, Till I take him inside my muddah house, Inside da room a da one dat wen come hapai wit me.

Jeremiah 31:3

From long time befo time, Me, Da One In Charge, I wen show up fo dem see me. I tell: “I get plenny love an aloha fo you guys fo long time. Dass why fo long time I stay tight wit you guys.

John 10:28

I goin make dem alive to da max foeva, an no come cut off from God. An nobody can grab dem away from me.

John 13:1

Was jus befo da Passova time. Jesus know dat was time fo him fo go outa dis world, an go by his Faddah. He erytime get love an aloha fo his peopo dat stay inside da world, an he get love an aloha fo dem to da max.

John 16:33

“I tell you guys all dis stuff fo notting bodda you, cuz you guys stay tight wit me. Da peopo inside da world goin make you guys suffa. But come strong! I da winna ova all da powa inside da whole world!”

Jesus Guys 14:22

Dey give good kine words to da peopo dat stay tight wit Jesus fo help um stick wit da Good Stuff Bout Jesus fo dem trus Jesus. Dey tell, “Us guys gotta suffa plenny befo us guys see God come oua king.”

Rome 2:9

Erybody dat stay do da bad kine stuff goin get hard time fo live, an dey goin stress out plenny. Dat goin happen to da Jew guys firs. Den goin happen to da odda peopos dass not Jew guys.

Rome 8:17

Cuz us guys God kids, dat mean, we goin get all oua share a da good kine stuff God give his kids cuz he oua Faddah. Da Faddah give eryting he get to his Boy Christ. Dass wat da Faddah goin do fo us guys too. But you know wat? Dat mean us guys gotta suffa too jalike Christ wen suffa, so den bumbye, God make us come awesome jalike he wen make Christ come awesome.

Rome 8:37

Cuz Christ get love an aloha fo us guys to da max, no matta wat kine trouble get, dat no bodda us, cuz we da winnas fo shua!

Rome 8:39

no matta get guys wit powa up dea inside da sky, o down dea inside da groun, no matta if get all kine odda tings dat God wen make. No mo notting dat can cut us guys off from da way God love us guys! Cuz us guys stay tight wit Jesus Christ, da Spesho Guy God Wen Sen, an he Da One In Charge a us guys.

1 Corint 4:11

Even now we stay hungry, but we still no mo food an no mo notting fo drink. We ony get puka kine clotheses. Peopo beat us wit sticks. We no mo place fo stay.

1 Corint 4:12

Eh, we work hard wit oua hands. Wen dey talk any kine to us, we tell um, “We like God do good tings fo you guys.” Wen dey bus us up an make us suffa plenny, we still hang in dea.

2 Corint 12:10

So den, no bodda me. I still stay good inside, wen I no can handle, wen peopo try make me come shame, wen I get hard time, wen peopo make me suffa, an wen I get plenny presha. All dis stuff happen cuz me, I one Christ Guy. Wen I no can handle, den I get da powa fo handle cuz a him!

2 Corint 4:17

We get plenny big time trouble now, but you know wat? Wen we tink bout how awesome us goin come to da max foeva, den we know all dat trouble ony manini kine!

2 Corint 4:8

Us get plenny presha from all ova, but us guys still can handle. We no undastan eryting, but we no give up.

2 Corint 4:9

Get guys dat make us suffa plenny, but God no bag from us. Dey bus us up, but dey no can wipe us out.

Efesus 3:19

An I like fo you guys blow yoa mind fo know how plenny love an aloha Christ get fo you guys, no matta no mo nobody can undastan eryting bout um. An den you guys goin be jalike God. Az wat he like you guys fo be, jalike him.

2 Tessalonika 2:16

Da One In Charge a us guys, Jesus Christ, an God oua Faddah too, dey get love an aloha fo all us guys. God get one good heart, an he no stop give us guys good kine words an help us wait till da good tings happen.

2 Timoty 1:12

Az why I gotta suffa, you know. But no matta to me cuz I no shame fo suffa! I know Jesus, dass why. He da One I trus. I know dis fo shua: he wen give me one big job fo do, an he stay trus me fo do um da right way. An I can do um! Cuz Jesus get da powa fo take kea eryting till he come back.

Jesus Show 1:5

An Jesus Christ, da Spesho Guy God Wen Sen, I like him do plenny good tings fo you guys. Can trus him fo tell da trut bout wat God tell him. He da firs One dat come back alive from mahke. He da main leada ova all da kings inside da world. He da One dat get love an aloha fo us guys. He wen bleed an mahke, An make us come clean From all da bad kine stuff we do.