Rome 12:9 - Hawaii Pidgin Bible

⁹ Wen you show peopo love an aloha, do um fo real kine, no ack. Hate all da bad kine stuff, an stay tight wit da good kine stuff.

Rome 12:9 ပူးပေါင်းရင်းမြစ်များ

Songs 101:3

I no goin even look At good fo notting kine stuff. I hate peopo dat make Crooked kine deals. I no goin do notting lidat!

Songs 119:104

Da tings you tell me I gotta do Help me fo undastan all kine stuff. Dass why piss me off Da way some peopo bulai odda peopo.

Songs 119:163

Weneva peopo bulai somebody, I hate dat, an bodda me plenny. But I get love an aloha Fo da Rules you teach.

Songs 34:14

No go do bad kine stuff. Ony do good kine stuff. Work hard fo be frenz wit erybody.

Songs 36:4

Even wen dey on top dea bed, Dey plan fo how dey goin do Bad tings to somebody. Dey stay go da way dass no good, Cuz dey hard head. Dey make up dea mind Fo do bad kine stuff.

Songs 45:7

You like wen stuff stay right An no like wen stuff stay wrong. Dass why God wen pick you Fo come da king. He wen pour olive oil on top yoa head, An not on top yoa frenz head, Fo you stay good inside Cuz he wen pick you.

Songs 55:21

Da tings he wen tell soun nice, But inside, he ony like beef. He talk nice kine, But da tings he tell, Jalike one sword fo stab me.

Songs 97:10

You guys dat get love an aloha Fo Da One In Charge, Good, you stay hate Da bad tings peopo do, Cuz Da One In Charge take kea Da ones dat stay tight wit him. He get um outa trouble Wen da bad guys come afta dem.

Smart Guys 26:25

No tink az fo real Wat dat kine guy tell, No matta he make eryting he tell Soun real good. Cuz inside him, da guy get All pilau kine stuff he tink.

Smart Guys 8:13

(You know, if you sked wen you go In front Da One In Charge Cuz he so awesome, Dat mean, wen somebody do bad kine stuff, you no like dat.) Wen peopo get big head, O wen dey come high makamaka, O wen da way peopo live, dey ony like ack bad, O wen dey tell stuff fo try trick you, I no like dat too.

Ezekiel 33:31

My peopo come yoa house an go inside. Dey sit down in front you an hear wat you tell. But dey no do wat you tell! Dey ony talk bout sex, an inside dem dey like rip off peopo fo get eryting fo ony dem.

Amos 5:15

Go all out fo hate da bad kine stuff An get love an aloha fo da good kine stuff. Make shua you pick da judges dat goin tell wass right. Den, maybe Da One In Charge, da God Ova All Da Armies, Bumbye give chance to da litto bit peopo Dat stay alive still yet From yoa Israel ohana.”

Matthew 26:49

So Judas go by Jesus an tell, “Aloha, Teacha!” an he kiss um.

John 12:6

Da guy, he no mo aloha fo da peopo dat no mo notting, he ony talk lidat cuz he one steala guy. He stay in charge a da money bag fo Jesus dem, an he cockaroach um.

Jesus Guys 11:23

Wen he come, he see dat God wen do plenny good tings fo dem. He stay good inside, an give dem good kine words fo stay tight wit Jesus, Da One In Charge, an trus him bout eryting.

2 Corint 6:6

We stay clean inside. We know plenny from God. We hang in dea long time. We do good tings fo peopo. Da Good An Spesho Spirit stay in charge a us. We show plenny love an aloha to da peopo fo real kine.

2 Corint 8:8

I no tell you guys wat fo do, but I like see if you guys get plenny love an aloha fo real kine, an go all out, jalike da Macedonia church guys.

1 Tessalonika 2:3

Wen we wen tell you guys fo trus God, no was cuz we trus da wrong kine stuff, o cuz we like do pilau kine stuff, o cuz we like bulai you guys.

1 Tessalonika 5:15

Make shua nobody go do bad kine stuff to anodda guy fo pay um back fo da bad kine stuff he wen do. But try erytime fo do good kine stuff to each odda, an to all da odda guys too.

1 Tessalonika 5:21

Mo betta, go check out eryting, den stay tight wit da good stuff.

1 Timoty 1:5

Teach da peopo fo dem learn how fo show love an aloha fo odda peopo. If dey stay clean inside, an know dey stay do da right ting, an trus God fo real kine an no ack, den can get love an aloha.

Hebrews 1:9

You stay plenny good inside wen peopo do da right ting, An wen peopo broke da Rules, you had it wit dat. Az why you da one I wen pick from all da guys dat stay by you. Az why I put olive oil on top yoa head fo show dat you da King, An dat you feel mo betta inside Den anybody!”

Hebrews 12:14

Try erytime fo make pono wit erybody, an erytime da way you live, make um good an spesho fo God. Cuz ony da peopo dat go all out fo stay spesho fo Da One In Charge goin see him fo real kine.

James 3:17

But da peopo dat get da kine smarts from God in da sky, main ting, dea spirit stay all clean inside. An notting bodda dem. Dey make good to erybody an make frenz wit erybody. Dey get pity fo you an give you chance. Erytime dey make good tings happen. Dey no make good ony to dea frenz. Dey ony tell wat dey mean an no ack.

1 Peter 1:22

You guys wen do wat stay pono, az why now you stay all out fo God. Dat make you get choke plenny love an aloha fo yoa braddahs an sistahs. Az da kine love an aloha dat show you no jus ack. Eh, now show even mo plenny love an aloha fo each odda cuz you get one good heart.

1 Peter 4:8

Dis da main ting: Get plenny love an aloha fo each odda, cuz no matta how plenny bad kine stuff da odda guy wen do, still yet you can be frenz if you get love an aloha fo da guy.