Jude 1:11 - Hawaii Pidgin Bible

¹¹ Wassamatta dem?! Dey goin get it! Dey goin go down da same road jalike Cain. Dey do any kine dey like do fo make money, jalike Balaam. Dey goin come wipe out, jalike wen Korah go up agains Moses.

Jude 1:11 ပူးပေါင်းရင်းမြစ်များ

2 Kings 16:16

Uriah da pries do eryting jalike King Ahaz wen tell um fo do.

Isaiah 3:11

Bummahs! fo da guys dat do bad kine stuff, Cuz eryting goin come out bad fo dem! Jalike wat dey do, Dass wat dey goin get.

Isaiah 3:9

Da way dea face look, Show dey no stay do da right kine ting. Dey talk big bout da bad kine stuff dey do, Jalike da peopo inside Sodom. Dey no try hide wat dey do. Bummahs! Dey da ones dat bring da horraz on top dem.

Jeremiah 13:27

I wen look an see da pilau kine tings you guys do On top da hills in da countryside. You guys fool aroun wit da guys an wahines Dat not yoa husban o wife. You guys come hot up an fool aroun fo money. Bummahs, you Jerusalem peopo! How long you goin stay pilau?”

Ezekiel 13:3

Dis wat da Boss, Da One In Charge tell: Ahanas, you stupid guys dat tell you talk fo me, Da One In Charge, cuz you ony lissen yoa spirit, an no see notting!

Micah 6:5

“My peopo, No foget wat Balak wen tell Da king fo da Moab peopo, Dat he wen like put kahuna On top you guys! No foget how Beor boy Balaam wen ansa him, Dat Da One In Charge ony goin do good stuff fo you guys! No foget how you guys wen go from Koa Town to Gilgal, Wen me Da One In Charge do awesome stuff Fo help you guys go da odda side a da Jordan Riva. Den you goin undastan dat me, Da One In Charge, Stay do wass right fo you guys erytime.”

Zekariah 11:17

“Bummahs, fo da sheep guy dat no worth notting! He bag from da sheeps. I like fo somebody wack his arm An his right eye wit one sword! I like his arm come all any kine, An he no can see notting wit his right eye.”

Census 31:16

But you know wat?! Was dem, da ones wen lissen Balaam! Dey da ones turn da Israel peopo away, fo go agains Da One In Charge. Dass wat wen happen Peor side. An cuz a dat, da peopo a Da One In Charge get one real bad kine sick!

Matthew 11:21

He tell, “Wassamatta you guys?! You guys from Korazin town, an you guys from Betsaida town! I neva show my powa to da Tyre an Sidon guys da way I wen show um to you guys. Az why dem Tyre an Sidon guys neva come sorry fo da bad kine stuff dey wen do, an no even come shame fo all dat. If dey wen see my powa da way you guys wen see um, dey put on burmbag clotheses an throw ash on top dea head fo erybody know dey sorry real quick, but dey neva do dat. But you guys wen see my powa fo real kine, an you still yet no stay sorry!

Rules Secon Time 23:4

Cuz wen you guys stay come outa Egypt, da Ammon peopo neva come out fo meet you guys wit bread an watta. An da Moab guys wen pay Baalam, Beor boy from Petor inside Aram-Naharaim fo put kahuna on top you guys.

Hebrews 11:4

Befo time, had one guy Abel. He wen trus God, an dass how come his sacrifice was mo betta den da sacrifice his braddah Cain wen give God. Cuz Abel wen trus God, az why God tell Abel stay get um right wit God, an dat Abel, he give God one good kine sacrifice. No matta Abel stay mahke awready, jalike he still yet stay talk to us guys cuz he wen trus God.

2 Peter 2:15

Befo time, dem guys go da right way, but den dey wen bag an go da wrong way. Dey wen ack jalike Beor boy Balaam wen ack long time ago. He was one guy dat talk fo God, but he ony like make money real bad, an he do tings dat no was right. Dat time, Balaam stay ride on top one donkey. Da donkey, he no can talk. But God make da donkey talk jalike one guy! Da donkey scold Balaam fo da bad kine stuff he was doing, an try fo make him no do da pupule kine stuff he like do.

1 John 3:12

Tink bout da Cain story inside da Bible from befo time. No make jalike Cain. He wen stay tight wit da Bad Guy, Satan, an he kill his braddah Abel. How come he wen kill Abel? Cuz Cain stay do bad kine tings, an his braddah stay do da right kine tings.

Jesus Show 2:14

“ ‘But eh! I get dis agains you guys: You guys get peopo ova dea dat make jalike da guy Balaam wen do long time befo time. Dat guy wen teach King Balak how fo make da Israel peopo do bad kine stuff. He make um eat food da odda peopo awready give fo make sacrifice to da idol kine gods, an go fool aroun wit peopo dey no stay married to.