John 1:4 - Hawaii Pidgin Bible

⁴ He da Guy, if you like come alive fo real kine, you gotta come by him. Dass da kine life come from him. Wen peopo come alive lidat, jalike dey stay inside one place dat get plenny light. Den dey can see an undastan stuff.

John 1:4 ပူးပေါင်းရင်းမြစ်များ

Songs 49:6

Dey stay shua dey goin stay okay Cuz dey get plenny powa, An dey talk big Bout how much stuffs dey own.

Songs 84:11

Cuz oua God, Da One In Charge, He show us guys wea fo go Jalike wen da sun shine. An he proteck us guys Jalike one shield. He like do plenny fo us guys, An he make us come mo awesome. Da One In Charge, He no goin hold back notting good From da peopo dat stay do wass right.

Isaiah 42:16

I goin take da guys dat no can see On top one road dey neva know befoa. I goin show um wea fo go No matta dey donno da way. No matta stay dark all aroun dem, I goin shine light come in front dem. I goin make da rough kine place come smooth. All dese tings, I goin do um. I no goin leave dem.

Malakai 4:2

But fo you guys dat feel real sked Wen you tink bout wat kine god me, Erybody goin see fo real kine wat stay right, Jalike wen da bright sun come up An you can see eryting mo clear. An dass goin make all you guys feel good. Den, you guys goin run aroun an jump, Jalike wen peopo let da bebe cows outa da pen!

Matthew 4:16

Da peopo ova dea dat stay inside da dark, Dey see one big light now. An all da guys dat stay In da dark place wea peopo goin mahke, Da light come fo dem.”

Luke 2:32

He jalike one light Fo make yoa peopo come awesome, Da Israel peopo, An fo show all da odda peopos Inside da world Wat stay right.”

John 11:25

Jesus tell her, “I da Guy dat make peopo come back alive an stay live fo real kine. Whoeva trus me goin come alive, no matta dey mahke.

John 12:35

Jesus tell dem, “Me, I jalike da light fo you guys. Ony short time mo da light goin stay hea wit you guys. Live da right way now wen get light still yet, cuz no good da dark pio da light you get inside you. Whoeva walk aroun inside da dark, dey donno wea dey going.

John 12:46

I wen come inside da world fo da peopo know da trut, jalike me da light fo dem. An whoeva trus me, dey goin know da trut. Dey no goin stay jalike dey dark inside an donno notting.

John 14:6

Jesus tell um, “No mo anodda guy can bring peopo to da Faddah, ony me. I bring peopo to um, jalike I da road. I da guy dat get da trut. I da guy dat make da peopo come alive fo real kine.

John 3:19

“God wen sen da light inside da world. Da light show erybody how dey stay inside. But da peopo like stick wit da dark an dey hate da light, cuz dey stay do bad kine stuff. Dass why God goin punish da peopo.

John 5:21

My Faddah bring back da mahke guys an make um live. Same ting, me, cuz I his Boy, I can make anybody I like come back fo live one mo time.

John 5:26

Jalike my Faddah, he can make da peopo come alive fo real kine, same ting, cuz I his Boy he give me da powa fo make um come alive too.

John 8:12

Jesus talk to da peopo one mo time. He tell, “I jalike da light fo da peopo inside da world. Whoeva come by me an be my guy, dey no goin go aroun inside da dark. Dey goin get da light dat make dem live fo real kine.”

John 9:5

I stay inside da world now, an I jalike da light fo da peopo all ova da world.”

Jesus Guys 26:23

I tell um dat da Spesho Guy God Wen Sen gotta suffa. An he da firs guy fo come back alive from mahke. An he goin tell his peopo an da peopo dass not Jew guys bout da light from God.”

1 Corint 15:45

Dis wat da Bible tell befo time: Da firs guy dat was jalike us guys was Adam. He “wen come alive an he wen tink an feel.” But da las Adam kine guy is Christ. He get one spirit inside him dat make odda peopo come alive fo real kine too.

Efesus 5:14

God make da bad kine stuff come good, jalike da light make da dark kine stuff come jalike light too. Get one song dat tell: “Eh, you dat stay sleep, wake up! Go come back alive from mahke! Christ goin be da light fo you.”

Colosse 3:4

Christ stay live inside us, an he make us come alive inside fo real kine. Wen he come back, den you guys goin show up wit him too an eryting goin be awesome!

1 John 1:1

From befo da time wen eryting start, had one Guy. He da One tell us peopo how fo come alive inside fo real kine! You know, me an da odda guys dat was wit Jesus, us wen lissen him, see him, look at him real good, an touch him wit oua hands!

1 John 1:2

Da One dat can make erybody come alive inside, he wen come by me an da odda peopo. Us wen see him, an now us tell you guys fo shua bout da real kine life he give peopo, da life dat goin stay to da max foeva! Dat life come from him. He wen stay wit da Faddah, an den he show up by us.

1 John 5:11

Dis wat God tell: he wen give us da real kine life dat goin stay to da max foeva, an dat kine life come wen us stay tight wit his Boy.

Jesus Show 22:1

Den da angel guy show me da riva wit da watta dat make peopo come alive fo real kine. You can see thru da riva, jalike crystal. Da riva go from da throne wea God an God Bebe Sheep Guy stay,

Jesus Show 22:16

“Me, I Jesus. I wen sen my angel messenja guy fo tell you guys inside da churches all dis stuff. I come from David ohana. I jalike da plant dat come up from da root. I jalike da bright Morning Star.