Joel 2:27 - Hawaii Pidgin Bible

²⁷ Den you Israel peopo goin know dat I stay wit you guys. I yoa God, Da One In Charge. No mo anodda god. You guys my peopo, an you no goin come shame one mo time.

Joel 2:27 ပူးပေါင်းရင်းမြစ်များ

Songs 46:5

God, he stay right dea In da middo a da town. Az why no mo notting Can wipe out da peopo dea. God goin help dem, Even wen come early morning time.

Songs 68:18

You wen go up to da mos high place. You wen capcha plenny prisonas. You wen take da presents Peopo bring you, Even da peopo Dat no like fo Yah live dea, Dass God, Da One In Charge!

Smart Guys 1:23

You guys come back da right way an lissen, I goin tell you fo real kine wass wrong! An ho! I tell you wat stay inside me, Da kine stuff dat befo time I no can tell you. An I goin help you fo undastan wat I tell.

Isaiah 12:6

Yell loud! Yell cuz you guys feel good inside, All you peopo dat live inside Jerusalem town! Cuz da Good An Spesho God fo da Israel peopo Stay wit all you guys, Az why you know he da greates!”

Isaiah 44:3

I goin pour rain on top da thirsty peopo. I goin make plenny watta come on top da dry groun. I goin pour my Spirit inside yoa kids Fo take charge a dem. I goin do plenny good kine stuff Fo da peopo dat goin come from you.

Isaiah 44:8

Eh my peopo! No shake an no come sked! I wen tell you guys bout dis long time befoa. I wen tell you guys how stay. You guys can tell wat you know bout me. You tink get anodda god jalike me?! No! No mo no anodda god dat stay strong an solid, Jalike one big rock. I know, no mo anodda god lidat!

Isaiah 45:18

Az cuz Da One In Charge get dis spesho message, Da One dat wen make da sky, Da One dass God fo real kine! He da One wen plan an make da world. He make um solid. He neva make um so no mo notting dea. He make um fo peopo live dea. Dis wat Da One In Charge tell: “Me, Da One In Charge. No mo anodda one like me!

Isaiah 45:5

Me, Da One In Charge! No mo anodda One. No mo anodda God, ony me. I goin make you come strong, Cyrus, Ready fo fight, No matta you donno who me.

Isaiah 45:6

An how come I stay do all dat?! I do um fo da peopo all ova da world, From wea da sun come up To wea da sun go down, Know dat no mo anodda god. Me, Da One In Charge. I da ony One.

Isaiah 46:9

No foget da stuff dat wen happen Long time befo time. Cuz me, I God. No mo anodda god stay jalike me.

Isaiah 49:23

You Jerusalem guys, You goin get king guys fo take kea yoa kids An be jalike dea hanai faddahs, An da alii wahines goin be Jalike da muddahs fo breas feed yoa kids. Dey all goin go down Wit dea face on top da groun Fo show respeck fo you Jerusalem guys, Jalike dey stay eating da dirt on top yoa feet. Den, you guys goin know dass me, Da One In Charge. Da peopo dat wait fo me, fo see wat I goin do, No way dey goin come shame!”

Isaiah 53:6

We all go all ova da place jalike da sheeps. All us guys, we go wea we like go. But Da One In Charge, he let da guy dat work fo him Take da blame fo da bad stuff all us guys do.

Ezekiel 37:6

I goin put back da tendons an da meat on top you guys an cova you wit skin. I goin put my air inside you fo you breave an come alive. Den you guys goin know az me Da One In Charge do all dat.’ ”

Ezekiel 39:22

From dat time da Israel ohana peopo goin know dass me Da One In Charge dea God.

Ezekiel 39:28

Den dey goin know dass me dea God, Da One In Charge, do all dis. Cuz no matta I wen make dem come prisonas an sen dem far away inside da odda lands, I goin bring dem back inside dea land. I no goin even leave nobody far away.

Ezekiel 39:29

I no goin hide from dem no mo cuz I goin give da Israel ohana peopo my Spirit, jalike I pour watta on top dem. Az wat me Da One In Charge, da Boss, tell.”

Joel 2:26

Now you guys goin get plenny food fo eat. You guys goin come full. You guys goin talk good bout yoa God, Da One In Charge. He wen do plenny good kine stuff fo you guys. You guys my peopo, an you no goin lose face one mo time.

Joel 3:17

Da One In Charge tell, “Den you guys goin know Dat I yoa God, Da One In Charge. I live on top Mount Zion, da hill dat stay spesho fo me. All Jerusalem goin be spesho fo me. Da odda peopos no goin take ova Jerusalem eva one mo time.

Joel 3:21

I neva punish da Egypt guys an da Edom guys, Da ones dat wen make my peopo bleed an mahke. But now I goin punish dem! Me, Da One In Charge, Goin live on top Mount Zion, My spesho place!”

Zefaniah 3:11

Dat time, you guys no goin get shame, Fo all da wrong kine stuff you guys wen do agains me! Cuz den, I goin take away from Jerusalem town All da peopo dat feel good cuz dey get big head. You guys no goin ack high makamaka no moa, On top da hill dat stay spesho fo me.

Zefaniah 3:17

Yoa God, Da One In Charge, stay right dea wit you guys! He get plenny powa fo make you guys da winnas! He goin dance an sing bout you guys. He goin make you guys come so notting bodda you, Cuz he get love an aloha fo you guys. He goin yell, cuz he stay real good inside bout you guys!’ ”

Zekariah 2:9

Fo shua, I goin pay dose guys back an make dea slave guys rip dem off.” Den you guys goin know dat Da One In Charge, Da God Ova All Da Armies, wen sen me, Zekariah.

Census 11:29

Moses tell him, “You like go fo broke fo me, aah? I like fo all da peopo a Da One In Charge, get his Spirit in charge a dem, dat dey talk fo him!”

Census 23:21

“Da One In Charge look da Jacob peopo, An dey no stay do wat dey not suppose to do. No mo trouble dea fo da Israel peopo. Dea God Da One In Charge stay wit dem. Dey yell cuz he dea king, An az why dey feel good inside!

2 Corint 6:16

You guys tink you can go da temple fo pray to God, an same time you guys go in front da idol kine gods fo pray to dem? No way! Cuz da God dat stay alive fo real kine, he stay in charge a us guys, jalike us guys da temple wea he stay inside. God tell inside da Bible, “I goin make house wit my peopo An walk aroun wit dem. I goin be dea God An dey goin be my peopo.”

Rules Secon Time 23:14

Cuz yoa God, Da One In Charge, stay walk aroun inside yoa camp fo take kea you guys, fo you guys win agains da peopo dat stay agains you. Yoa camp gotta stay spesho fo Da One In Charge. If he see you do shame kine stuff ova dea, he goin tell “Laytas” to you guys.

1 Peter 2:6

Cuz inside da Bible, God tell, “Eh, try look. I put down da corna block inside Zion, Dass da one I wen pick. Dat stone real importan fo me. Anybody dat goin trus him plenny, Dey no need worry notting.”

Jesus Show 21:3

An I hear one loud voice coming from da throne dat tell, “Now God make house wit da peopo. He goin live wit dem. Dey goin be his peopo, An God goin stay dea wit dem fo real kine, An be dea God.