Job 1:3 - Hawaii Pidgin Bible

³ He own seven tousan sheeps three tousan camel, five hundred pair cows, an five hundred donkey. He get plenny guys work fo him. From all da peopos from da east side, he da mos importan guy.

Job 1:3 ပူးပေါင်းရင်းမြစ်များ

Start 12:16

Da Pharaoh guy, he make nice to Abram cuz he tink Abram Sarai braddah. Dass why he give Abram plenny sheeps, cows, donkeys, camels, an slave guys an wahines.

Start 12:5

Abram take his wife Sarai, his nephew Lot, an all da big stack stuffs dey wen get Haran side, an all da peopo dat work fo dem dea too. Dey start fo go Canaan side, an bumbye, dey get dea.

Start 13:6

But dem two guys, dey get choke plenny animals. If dey stick togedda, no mo enuff land fo dem an dea animals.

Start 24:35

Da One In Charge, he do plenny good tings fo my boss. Abraham one importan guy awready. God give um sheeps, goats, cows, silva an gold, guys an wahines fo slaves, camels, an donkeys, eryting.

Start 25:6

Fo da odda kids dat born from Abraham an his odda wifes, Abraham give each kid plenny stuffs befo he mahke, but den he make um move house da east side fo no stay nea his boy Isaac.

Start 29:1

From Bethel, Jacob hele on, till he come da land wea da ohanas from da east side live.

Start 32:14

He pick 200 girl kine goats, an 20 boy kine goats. Den he pick 200 girl kine sheeps, an 20 boy kine sheeps.

Start 34:23

An if we do dis, dea cows an dea stuffs an all dea animals, all dat goin be fo us guys! Fo dem make house wit us guys, ony get dis one ting we gotta tell we goin do, jalike dey tell us fo do.”

2 Samuel 12:2

Da guy wit plenny stuffs get real plenny sheeps an goats an cows.

1 Kings 4:30

Dass how King Solomon know wat fo do, mo betta den all da smart guys dat live da east side, an all da Egypt smart guys.

2 Kings 15:20

Menahem wen make da rich kine Israel peopo give him dea silva. Ery rich guy gotta pay 20 ounce silva fo give um to da Assyria king. So da Assyria king go back home, an no stay inside da land no moa.

2 Kings 3:4

Befo time, Mesha, da Moab king, know how fo breed da sheeps spesho kine, fo get plenny sheep. Ery year, he gotta pay tax to da Israel king. He gotta give um one hundred tousan bebe sheep, an da wool from one hundred tousan boy kine sheep.

1 Records 27:30

Obil from da Ishmael ohana stay in charge a da camels. Jehdeiah from Meronot stay in charge a da donkeys.

2 Records 26:10

An he build strong towas inside da boonies, an dig plenny storage holes fo keep watta unda da groun, cuz he get plenny animals inside da low hills west side Jerusalem, an da flat land. He get farma guys fo work inside his fields. He get odda guys dat know how fo work da grape fields, on top da mountains an da places wea get da kine dirt az good fo grow stuff. He one guy dat fo real kine like grow stuff.

2 Records 32:29

He build towns an get plenny sheeps, goats, an cows, cuz God make him come real rich.

Job 1:10

You da one wen put jalike one fence all aroun him an his ohana, an aroun eryting he get. You stay make eryting he do come good, fo his sheeps an cows go all ova da land.

Job 1:4

Dis how Job stay away from do bad kine stuff: His boys take turns fo make one big luau inside dea houses, one afta da odda. An dey tell dea three sistahs fo come eat an drink wit dem.

Job 21:28

You guys tell, ‘Eh, gone awready, da house wea one real importan man live befo time! Fo shua, da tents wea da crooks wen live, no moa!’

Job 29:25

I da guy pick da way dey gotta go. I da leada guy fo dem. I stay jalike one king dat live wit his army guys. I make da sad guys feel mo betta.”

Job 31:25

I no feel real good inside cuz I get plenny rich kine stuffs, An cuz I tink dat was me wen bus ass fo get all dat.

Job 31:37

I like tell da one dat lissen, eryting I wen do. I like go in front him jalike I one prince dat get da right fo talk to him.

Job 42:10

Afta Job pray fo his frenz, Da One In Charge make eryting come good fo him one mo time. Da One In Charge even give him double wat he get befo time.

Job 42:12

Da One In Charge do plenny good tings fo Job afta dat, mo den befo time. He get fourteen tousan sheeps, six tousan camels, one tousan pair cows, an one tousan donkeys.

Smart Guys 10:22

Wen Da One In Charge do good tings fo peopo, He give dem plenny good stuff. He no give problem same time.

Jeremiah 49:28

Bout da Kedar ohana an da small town leada guys aroun Hazor, da ones King Nebukadnezzar wen take ova, dis wat Da One In Charge tell: “Stan up! Go attack Kedar! Wipe out da peopos dat live inside da east side boonies!

Census 23:7

An Balaam tell dis spesho message from God: “Balak wen bring me hea from da Aram land. He da king fo Moab. He call me from da mountains da east side a my land. He tell me, ‘Go come! Put kahuna on top da Jacob peopo fo me! Tell um how mad you stay wit dem!’

Local Leadas 6:3

Weneva da Israel peopo plant food, da Midian peopo, da Amalek peopo, an odda peopos from da east side attack da Israel land.

Local Leadas 6:5

Dey come wit dea animals an tents ova dea, jalike wen get real plenny locust kine grasshoppas. No can count da Midian guys an dea camels. Dey attack da land fo wase um.

Local Leadas 7:12

Da Midian guys, da Amalek guys, an da odda guys from da east side wen stay inside da valley. Dey get plenny guys, jalike locust kine grasshoppas. No can count dea camels, jalike no can count da sand on top da beach.

Local Leadas 8:10

Dat time Zebah an Zalmunna stay inside Karkor wit ony bout 15,000 army guys in dea camp. Az was all da guys dat still stay alive from da east side peopos, afta 120,000 guys wit swords wen mahke awready.

1 Samuel 25:2

Had one guy Nabal. He from da Caleb ohana. He live Maon town, an get biznis nea dea inside Carmel town. He one importan guy an own 3,000 sheep an 1,000 goat. Nabal wife, her name Abigail. She one good looking wahine dat know how fo tink real good. But her husban, he da kine guy come all huhu if somebody tell him he gotta do someting, an no bodda him wen he do bad kine stuff. Dat time, Nabal an his guys stay cut da wool from da sheeps Carmel side.

1 Samuel 27:9

Weneva David dem attack da peopo all aroun one place, he no leave nobody alive, no guy o wahine. But, he take da sheeps an goats, cows, donkeys, camels, an clotheses. Den he go back by Akish.