Jeremiah 7:9 - Hawaii Pidgin Bible

⁹ “ ‘You guys stealas, an killas! You fool aroun wit wahines dat not yoa wife! You guys make one strong promise, but you bulai! You guys burn incense fo da Baal god! You guys stay tight wit odda gods you guys neva know from befo time!

Jeremiah 7:9 ပူးပေါင်းရင်းမြစ်များ

1 Kings 18:21

On top Mount Carmel, Elijah go in front all da peopo. He tell, “You guys gotta make up yoa mind right now, one way o da odda way! If Da One In Charge stay God fo real kine, go wit him! But if Baal stay God fo real kine, go wit him!” Da peopo, dey no say notting.

Outa Egypt 20:3

You no go take odda gods fo you, cuz me, I da ony God fo you.

Isaiah 1:13

No bring me one sacrifice dat no mean notting! Da incense you guys burn fo me stay smell haunas. You guys come togedda ery month an ery week But I no like da kine meetings you guys make, Cuz dey ony bad.

Isaiah 58:2

Me, da One dey aks wat fo do, ery day! Dey ack jalike dey fo real kine like know how I ack. Dey ack jalike dey one nation Dat stay do wass right erytime, An lissen wat me dea God tell um fo do, Cuz I da Judge. Dey aks me fo judge da right way fo dem. Dey ack jalike dey like Fo me come nea dem.

Jeremiah 1:16

I goin tell wat I figga bout my peopo, cuz I da Judge. Cuz a all da bad tings dey stay do— Dey tell ‘Laytas!’ to me An burn sacrifice fo odda gods An go down in front da gods dey wen make wit dea hands.

Jeremiah 11:13

You Judah guys get plenny towns an plenny gods, jalike get one god fo ery town. An you Jerusalem guys put up plenny sacrifice places fo make one shame kine sacrifice, an dose sacrifice places fo da shame kine god Baal, jalike you guys get one sacrifice place fo ery street inside Jerusalem.’

Jeremiah 11:17

“Me Da One In Charge, me da God Ova All Da Armies! I wen plant you guys on top dis land jalike dat olive tree. But I tell dis bout you guys now: you goin get wipe out! Az cuz you Israel ohana an Judah ohana guys wen do bad kine stuff, an dat make me come real huhu, cuz you guys burn incense fo da god Baal.”

Jeremiah 13:10

Dese peopo, dey real bad. Dey no like lissen wat I tell um. Dey ony like do wat dey like do, cuz dey hard head. An dey go afta gods dat not dea god, fo dem work fo dose gods, an go down an show respeck fo dem. Cuz a dis, dey goin come jalike dis malo, good fo notting.

Jeremiah 18:15

But my peopo, dey not like da watta from da mountains! Dey no give a rip bout me. Dey burn incense fo da idol kine gods dat no can do notting. No matta da idol kine gods make my peopo Fall down from da good roads dat stay from long time. Da idol kine gods make dem go walk on top Da small kine trails dat nobody build um good.

Jeremiah 19:4

Az cuz da peopo wen bag from me. Dey make dis landfill come one place fo da gods from odda places. Dey burn sacrifice ova hea fo da idol kine gods dat dey neva know befo time. Dea ancesta guys an da Judah kings neva know dose gods befo time too. An dis da place dey wen kill plenny peopo dat neva do notting wrong.

Jeremiah 32:29

Da Babylon guys dat attack dis town goin come inside an make one big fire. Dey goin burn da town fo shua—da houses fo da peopo dat make me come huhu, cuz dey burn incense on top dea flat roofs fo da god Baal, an dey pour out wine fo make sacrifice dea fo da odda gods.

Jeremiah 44:3

Az cuz da peopo ova dea wen do real bad kine stuff. Dey make me come real huhu wen dey burn incense an do any kine stuff fo da idol kine gods. Dem guys an you guys an yoa ancesta guys, dey neva know dose gods befo time.

Jeremiah 44:8

How come you guys make me come real huhu wit yoa idol kine gods dat you guys make wit yoa hands, aah? Cuz you guys burn incense fo da odda gods inside Egypt wea you guys live now! You guys come wipe out. You goin make all da odda peopos on top da earth like put kahuna on top you. Dey goin poin finga you cuz a all da bad stuff you do.

Jeremiah 44:9

How come you guys foget awready, all da real bad kine stuff dat yoa ancesta guys an da Judah kings an queens wen do, aah?! An all da real bad kine stuff you guys an yoa wifes wen do inside da Judah land an on top da Jerusalem streets!

Jeremiah 48:35

Fo da Moab peopo, I goin make da ones Dat make da burn up kine sacrifice on top dea sacrifice places, No can make um no moa, An no can burn incense dea fo dea gods no moa.” Az wat Da One In Charge tell.

Jeremiah 5:2

No matta dey make one strong promise an tell, ‘Fo shua Da One In Charge stay alive, Same ting I stay shua I goin do wat I make one promise fo do!’ Still yet dass ony bulai Wen dey make one strong promise.”

Jeremiah 5:7

Da One In Charge tell: “How come you Jerusalem guys tink I gotta let you guys go? Yoa kids wen dig out from me. Wen yoa kids make one promise, Dey call out to da gods dat not gods fo real kine, Fo make shua dey goin do wat dey wen promise fo do. I da One give dem eryting dey need. But dey fool aroun wit da wahines dat not dea wife, in front da odda gods. Dey all go togedda to da houses wea da wahines stay Dat fool aroun fo get money fo da odda gods.

Jeremiah 7:6

You guys no goin give hard time to da peopo from odda places dat stay live wit you guys, o da kids dat no mo faddah, o da widow wahines. You guys no goin go kill da peopo dat neva do notting wrong inside dis land. You guys no goin stay tight wit odda gods cuz dat goin hurt you guys.

Ezekiel 18:18

But his faddah goin get cut off ony fo da bad kine stuff he wen do cuz he get plenny extra money from wat he wen loan. He rip off his braddah, an do da wrong kine ting to his peopo.

Ezekiel 20:30

“Az why you gotta tell dis to da Israel ohana peopo: ‘Dis wat me Da One In Charge, da Boss, tell: You guys goin come pilau inside jalike yoa ancesta guys, o wat?! You goin like fool aroun wit dea real bad kine idol gods too, o wat?!

Ezekiel 23:39

Da same time dey kill dea kids fo make one sacrifice fo dea idol kine gods, den dey go inside my Temple too, an make um so no stay spesho fo me no moa. Dass da kine stuff dey go do inside my house.

Ezekiel 5:11

“Az why Da One In Charge, da Boss, tell dis: Cuz I stay alive, one ting fo shua—Me, I no goin do good kine stuff fo you guys no moa. Az cuz you guys wen make da place dat stay spesho fo me pilau wit all yoa idol kine gods dat I hate, an wit all da real pilau kine stuff you guys do! Wen I look you guys, I no goin pity you. I pau awready give you guys chance!

Hosea 2:13

I goin punish her fo all da times She go burn incense fo da Baal idols. She put on plenny rings an jewelry. She go wit da guys dat make sex wit her, But she foget bout me.” Az wat Da One In Charge tell.

Hosea 6:9

Da pries guys, dey one gang, Jalike da steala guys dat hide togedda fo jump somebody. Dey kill peopo on top da Shekem road. Dey make plans fo do real bad kine stuff.

Amos 4:5

Burn some a da bread you suppose to put wit da sacrifice Fo tell God ‘Mahalo plenny!’ An talk big plenny wen you guys give God someting you no need give. Cuz dass da way you Israel peopo do um cuz you tink dass real importan.” Dass wat Da One In Charge a me tell.

Zefaniah 1:5

I goin wipe out da peopo dat go on top dea flat roofs Fo go bow down in front Da sun, da moon, an all da star gods. An I goin wipe out da peopo dat use my name ‘Da One In Charge’ fo pray to me, An same time dey use da Molek god name fo pray to him too.

Malakai 3:5

Da One In Charge Ova All Da Armies tell dis too: “I goin go by you guys in front da judge right den an dea, I goin tell da judge wat I know bout you guys, Bout da ones dat make kahuna kine ceremony, An da ones dat fool aroun behind dea wife o husban back, An da ones dat make one strong promise but dey bulai, An da ones dat make trouble fo dea worka guys cuz dey no like pay um, An make trouble fo da widows an da kids dat no mo faddah o muddah, An da ones dat give one hard time to da peopo from anodda place. All dose peopo, dey no sked me!”

Rome 2:2

But we know dis: Erytime God tell dat da peopo wen do bad kine stuff, we know wat he tell stay true.

Rules Secon Time 32:17

You make sacrifice to da aumakua kine spirits. But dat kine spirits, dey not real gods! You guys neva know dose spirits befo time. Dey new kine spirits fo you peopo. Befo time, yoa ancesta guys neva stay sked a dem O show respeck fo dem.

Jesus Show 21:8

But da peopo dat no do notting cuz dey sked, da peopo dat no trus God, dat ack pilau kine, dat murda oddas, dat fool aroun somebody, dat do bad kahuna kine stuff, dat go down an pray to da idol kine gods, an erybody dat bulai somebody, dey goin go inside da lava lake dat stay burn wit sulfur. Dass wen dey mahke da secon time.

Jesus Show 22:15

Outside da town get da peopo dat dey jalike dogs, da peopo dat put kahuna on top watevas, da peopo dat fool aroun somebody, da peopo dat like murda oddas, da peopo dat go down an pray to da idol kine gods, an erybody dat like fo bulai peopo.

Local Leadas 5:8

Befo time, wen da peopo pick new gods, Den get war in front da gates fo da big town, But no mo shield o spear Fo 40,000 Israel guys.