Jeremiah 6:21 - Hawaii Pidgin Bible

²¹ Az why Da One In Charge tell dis: “I da One goin make da peopo all jam up. Da faddahs an dea boys goin get wipe out same time. Frenz an peopo nea dem goin mahke.”

Jeremiah 6:21 ပူးပေါင်းရင်းမြစ်များ

2 Records 36:17

God bring da Babylon king agains dem. Da Babylon army guys kill da young Israel guys wit swords inside da place dat stay spesho fo Da One In Charge. He no show pity fo nobody, da young guys an young wahines, o da ol guys an real ol peopo. God turn dem all ova to Nebukadnezzar.

Isaiah 8:14

I stay good an spesho, Fo me come jalike one spesho place fo peopo hide an res. But fo da Judah ohana an da Israel ohana, I goin come jalike one stone an make dem trip an fall down. An one trap fo catch da peopo live inside Jerusalem.

Isaiah 8:15

Jalike plenny peopo goin fall down ova dat big stone, An come all bus up. An jalike dey goin get stuck inside dat trap An come prisonas.

Jeremiah 13:14

Den I goin smash um agains each odda jalike dey clay wine jars. I goin even smash da faddah-muddah guys agains dea kids too, all togedda. I no goin show pity fo dem, o make easy kine to dem, o give dem chance. I goin wipe um out.’ ” Az da message from Da One In Charge.

Jeremiah 13:16

Tell erybody right now Dat yoa God, Da One In Charge, stay awesome. Cuz if you wait, Da One In Charge goin make you guys come bum out, Jalike he goin make eryting come dark fo you, An jalike he make you guys trip an fall down on top da mountains Wen come litto mo dark. You guys stay wait fo light come, But Da One In Charge goin make eryting come real dark Jalike you stay inside one skery big black cloud.

Jeremiah 18:21

So make dea kids mahke cuz no mo food! Let dem get kill in da war! Make dea wifes come widows An lose dea kids too! Make dea guys mahke from da real bad kine sick! Kill dea young guys wit swords wen dey go war!

Jeremiah 18:23

But you, Da One In Charge, you know all dea plans fo kill me. No let dem go cuz a da wrong tings dey do! Make dem so dey no can stay tight wit you Wen dey get da blame fo do wat stay wrong. No foget da bad kine stuff dey do in front you! Make um fall down in front you! Make to dem how you like wen you stay real huhu!”

Jeremiah 21:7

An Da One In Charge tell wat goin happen afta dat—bout Zedekiah da king fo Judah, his palace guys, an da peopo dat live inside dis big town. He tell wat goin happen to da ones dat still stay alive afta da bad kine sick, an da fighting, an no mo food. Da One In Charge goin give dem to Nebukadnezzar, da king fo Babylon, an to da guys dat stay agains dem an like kill um. An Nebukadnezzar guys goin kill da Jerusalem peopo wit swords. Dey no goin feel pity fo dem o give dem chance.’

Jeremiah 8:12

You tink dey come shame cuz dey do pilau kine stuff? Nah! Dey no mo shame! Dey no even know how fo ack jalike dey shame! Az why dey goin fall down Wit da odda peopo dat get kill. I goin bring dem down Wen I come fo punish dem!” Az wat Da One In Charge tell.

Ezekiel 3:20

“An if you get one guy dat do da right kine stuff, but bumbye he tell ‘Laytas’ to do da right kine stuff, an do bad kine stuff, he goin mahke. Cuz I goin jam um up fo him mahke. But if you no tell him notting, fo shua da guy goin mahke cuz a all da bad kine stuff he do. No matta all da right kine tings he wen do befo time, I goin blame you dat he mahke.

Ezekiel 5:10

Az why, right wea you guys stay, da faddahs goin eat dea kids, an da kids goin eat dea faddahs. I goin punish you guys, an I goin scatta da peopo dat still stay alive fo dem go all ova da place.

Prieses 26:37

You goin fall down on top each odda, jalike you stay running away from guys wit swords, no matta nobody stay chase afta you. An you guys no get da powa fo even stan up in front da guys dat stay agains you guys.

Rome 11:9

David tell dis inside da Bible: “No matta dey throw party at dea table— I like God make dat party come one trap Fo catch um an pay um back!

1 Peter 2:8

An da Bible tell dis too, “Dis da stone dat wen make da peopo fall down.” Dey fall down cuz dey no do wat God tell um fo do. Dass wat God tell goin happen to dem.