Jeremiah 50:6 - Hawaii Pidgin Bible

⁶ “My peopo, dey jalike sheeps dat stay lost. Dea leada guys, jalike sheep guys Dat no give a rip wea dea sheeps go. Wen da sheeps go inside da mountains, Az cuz da sheep guys wen show um da wrong way fo go. Da sheeps wen go from one mountain to anodda hill, An foget wea dea res place stay.

Jeremiah 50:6 ပူးပေါင်းရင်းမြစ်များ

Songs 116:7

I know notting can bodda me No moa, Cuz Da One In Charge Wen do good tings fo me.

Songs 119:176

Jalike one lost sheep Dat donno wea he going, I wen go da wrong way. So, try come an find me, yoa worka guy, Cuz I no foget da tings You tell me fo do.

Songs 23:2

Jalike he bring me fo lay down Wea da choice an sof grass stay, An take me by da calm watta.

Songs 32:7

You, you jalike one place Wea I can hide from trouble. You proteck me wen get hard time. You put peopo aroun me Dat yell plenny Cuz dey stay good inside, Cuz you wen get me outa trouble. (Time out fo da music.)

Songs 90:1

Eh Boss! From oua ancesta guys time till now, You jalike oua home!

Songs 91:1

Da God Dass Mo Importan Den All Da Odda Gods, He stay hide you Inside his secret place. Cuz he Da God Dat Get All Da Powa, He let you stay wit him Fo no mo notting hurt you.

Isaiah 1:3

Da cows know who own um, An da donkeys know wea dea owna give um food. But da Israel peopo, dey donno me. Even my peopo no undastan notting bout me.”

Isaiah 30:15

But dis message come from Da One In Charge a me, Da One dat stay good an spesho fo da Israel peopo: “Fo you guys get outa trouble, You gotta come back my side, Fo come so notting bodda you. Fo you guys come strong inside, You gotta stay quiet an trus me.” But you guys still no like lissen!

Isaiah 32:2

Da king goin be da kine guy Dat goin be jalike one place Fo da peopo hide From da strong wind o da rain, So no can wack um. He goin help da peopo fo res, Jalike one watta ditch inside one dry place, An jalike one big rock Dat make one big shadow In da place wea no mo watta.

Isaiah 53:6

We all go all ova da place jalike da sheeps. All us guys, we go wea we like go. But Da One In Charge, he let da guy dat work fo him Take da blame fo da bad stuff all us guys do.

Jeremiah 10:21

Da leada guys dat suppose to help da peopo, Dey jalike sheep guys Dat donno notting. Dey no go find out from Da One In Charge wat fo do. Az why dey no ack jalike peopo dat know wat dey stay do. Da peopo dey suppose to lead Go all ova da place, jalike sheeps.

Jeremiah 13:16

Tell erybody right now Dat yoa God, Da One In Charge, stay awesome. Cuz if you wait, Da One In Charge goin make you guys come bum out, Jalike he goin make eryting come dark fo you, An jalike he make you guys trip an fall down on top da mountains Wen come litto mo dark. You guys stay wait fo light come, But Da One In Charge goin make eryting come real dark Jalike you stay inside one skery big black cloud.

Jeremiah 2:20

“Long time befo time you guys wen no do wat I tell you fo do, Jalike one cow dat broke off da yoke fo pull da wagon, An broke da ropes dat tie um. You guys wen tell, ‘Us no goin work fo you!’ Fo shua, unda da trees wit plenny leaf on top ery big hill, You guys ack jalike da wahines Dat make sex dea fo get money.

Jeremiah 2:32

You guys tink one young wahine goin foget her jewelry? You tink one bride goin foget her wedding clotheses? But still yet my peopo foget me Ova an ova.

Jeremiah 23:1

Anodda message from Da One In Charge: “Ho, da leada guys, dey all jam up! Dey suppose to take kea my peopo jalike da sheep guys take kea da sheeps. But dem, dey wipe out da sheeps inside my field! O dey make um run away all ova da place!”

Jeremiah 3:23

Fo shua, wat us wen do up dea on top da hills, Az ony one show! Eryting us wen do on top da mountains, Az ony fo make big noise! Cuz you, oua God, you Da One In Charge a us, Ony you can get us Israel guys outa trouble.

Jeremiah 3:6

Da time Josiah stay king, Da One In Charge tell me, “You see wat da Israel peopo wen do? Dey ack jalike one wahine dat no stay tight wit her husban. Dey go up on top all da high hills an unda ery tree dat get big shade, an go fool aroun dea in front da odda gods, jalike da hoaz.

Jeremiah 33:12

Dis wat Da One In Charge, da God Ova All Da Armies, tell: “Inside dis place dat no mo peopo o animals now, aroun all da towns dea, goin get fields wit grass wea da sheep guys goin take dea sheeps an goats fo res dea.

Jeremiah 50:17

“Da Israel peopo, dey stay run all ova da place Jalike sheeps an goats wen da lions chase um. Da firs lion fo eat um was da Assyria king. Da nex lion was Nebukadnezzar da Babylon king. He grind da meat off dea bones.”

Jeremiah 50:19

But I goin bring back da Israel peopo Jalike dey sheeps dat get dea place fo eat grass. An dey goin eat grass on top Mount Carmel An up country Bashan side. Dey goin eat plenny On top da hills Efraim side an Gilead side, Till dey come full.”

Ezekiel 13:10

“Dey lead my peopo fo go da wrong way, an tell, ‘Eryting stay good,’ wen notting stay good. Az jalike dey make one weak kine wall, an put litto bit white paint on top um fo make um look strong.

Ezekiel 34:14

I goin take kea dem inside da good grass land. Da high Israel mountains, az wea dey goin eat. Az da good land dat get plenny grass wea dey goin lay down inside, an dass da place wea dey goin eat plenny, on top da Israel mountains.

Ezekiel 34:15

I da One goin take kea my sheeps, an I da One goin let dem lay down fo res. Az wat me Da One In Charge, da Boss, tell.

Ezekiel 34:16

I goin look fo da lost sheeps, an bring back da sheeps dat get push off da trail. I goin bandage da sheeps dat get hurt, an make da weak ones come strong. But da real momona sheeps an da supa strong ones, I goin wipe dem out. I goin be one pono kine sheep guy an take kea my sheeps da right way.

Matthew 10:6

Go by da peopo from da Israel ohana, cuz dey jalike sheeps dat stay lost.

Matthew 15:24

So Jesus tell her, “My Faddah sen me ony fo help da Israel ohana peopo, cuz dey jalike da sheeps dat stay lost. He neva sen me fo help all da odda peopo.”

Matthew 9:36

Wen he see all da peopo, he get love an aloha an pity fo dem, cuz dey all wore out inside an no can do notting cuz a dat. Dey jalike da sheeps dat no mo one sheep guy fo take kea dem.

1 Peter 2:25

You guys was jalike da sheeps dat stay lost, but now you guys come back to God. He make shua he take kea a you guys good kine, jalike da sheep guy take kea his sheeps. An he da main leada guy fo make shua you guys no come pilau inside.